ܡܙܡܘܪ̈ܐ 40:3-17

³ܘܡܘܼܬܸܒ݂ ܠܹܗ ܒܦܘܼܡܝܼ ܙܡܵܪܬܵ‌ܐ ܚܲܕܬܵ‌ܐ ܕܬܸܫܒܘܿܚܬܵ‌ܐ ܠܐܲܠܵܗܵܐ، ܒܸܬ ܚܵܙܝܼ ܪܵܒܵܐ ܘܒܸܬ ܙܵܕܥܝܼ، ܘܒܸܬ ܣܵܒܪܝܼ ܒܡܵܪܝܵܐ.

⁴ܛܘܼܒ݂ܵܐ ܠܐܢܵܫܵܐ ܕܥܵܒܹܕ ܠܡܵܪܝܵܐ ܬܘܼܟ݂ܠܵܢܹܗ، ܘܠܵܐ ܦܬܝܼܠܔ ܠܹܗ ܠܚܵܬܪ̈ܵܢܹܐ، ܐܘܼܦ ܠܵܐ ܠܐܵܙܵܠ݇ܢܹ̈ܐ ܒܵܬܪ ܕܘܼܓܠܵܐ.

⁵ܪܵܒܵܐ ܥܒ݂ܝܼܕ ܠܘܼܟ݂ ܐܲܢ݇ܬ، ܝܵܐ ܡܵܪܝܵܐ ܐܲܠܵܗ‌ܝܼ، ܕܘܼܡܵܪܹ̈ܐ ܘܚܘܼܫܵܒܹ̈ܐ ܐܸܠܲܢ، ܠܲܝܬ ܐܲܝܟ݂ ܕܝܼܘܼܟ݂، ܐܸܢ ܡܲܕܥܸܢ ܗܘܵܐ ܘܗܲܡܙܸܡܸܢ ܗܘܵܐ، ܒܸܬ ܗܵܘܝܼ ܗܘܵܘ ܒܘܼܫ ܙܵܘܕܵܐ ܡ̣ܢ ܠܸܡܢܵܝܵܐ.

⁶ܒܕܸܒ݂ܚܵܐ ܘܒܩܘܼܪܒܵܢܵܐ ܠܵܐ ܒܣܝܼܡ ܠܵܗ̇ ܠܘܼܟ݂، ܩܵܡ ܦܵܬܚܹܬ ܠܗܘܿܢ ܢܵܬܝܵܬ‌ܝܼ̈، ܕܸܒ݂ܚܵܐ ܡܘܼܩܕܵܐ ܘܕܸܒ݂ܚܵܐ ܕܚܛܝܼܬܵ‌ܐ ܠܵܐ ܛܠܝܼܒ ܠܘܼܟ݂.

⁷ܗ̇ܝܓܵܗ ܐܡܝܼܪܝܼ: ”ܗܵܐ، ܐܬܝܼܵܐ ܝܘܸܢ، ܒܟܸܪܟ݂ܵܐ ܕܟܬܵܒ݂ܵܐ ܦܝܼܫܵܐ ܠܹܗ ܟܬܝܼܒ݂ܵܐ ܒܘܼܬ ܕܝܼܝܼ.

⁸”ܠܸܥܒ݂ܵܕܵܐ ܨܸܒ݂ܝܵܢܘܼܟ݂، ܝܵܐ ܐܲܠܵܗ‌ܝܼ، ܩܘܼܒܸܠܔ ܠܝܼ ܒܘܼܣܵܡܵܐ، ܘܢܵܡܘܿܣܘܼܟ݂ ܓܵܘ ܠܸܒܝܼ ܝܠܹܗ.“

⁹ܡܘܼܫܚܸܕ ܠܝܼ ܙܲܕܝܼܩܘܼܬܵ‌ܐ ܒܟܸܢܫܵܐ ܓܘܼܪܵܐ، ܗܵܐ، ܣܸܦܘܵܬ‌ܝܼ̈ ܠܹܐ ܡܲܟܠܸܢܗܘܿܢ، ܐܲܢ݇ܬ ܟܹܐ ܝܵܕܥܹܬ، ܝܵܐ ܡܵܪܝܵܐ.

¹⁰ܙܲܕܝܼܩܘܼܬܘܼܟ݂ ܠܵܐ ܟܘܼܣܝܵܐ ܠܝܼ ܓܵܘ ܠܸܒܝܼ، ܗܘܼܡܙܸܡ ܠܝܼ ܒܘܼܬ ܡܗܘܼܡܢܘܼܬܘܼܟ݂ ܘܒܘܼܬ ܦܘܼܪܩܵܢܘܼܟ݂، ܠܛܲܝܒܘܼܬܘܼܟ݂ ܘܫܲܪܝܼܪܘܼܬܘܼܟ݂ ܠܵܐ ܛܘܼܫܹܐ ܠܝܼ ܡ̣ܢ ܟܸܢܫܵܐ ܓܘܼܪܵܐ.

¹¹ܐܲܢ݇ܬ، ܝܵܐ ܡܵܪܝܵܐ، ܠܹܐ ܚܵܣܟܹܬ ܪ̈ܲܚܡܘܼܟ݂ ܡܸܢܝܼ، ܛܲܝܒܘܼܬܘܼܟ݂ ܘܫܲܪܝܼܪܘܼܬܘܼܟ݂ ܐܲܡܝܼܢܵܐܝܼܬ ܟܹܐ ܢܵܛܪܝܼ ܠܝܼ.

¹²ܣܵܒܵܒ ܩܵܡ ܟܵܪܟ݂ܝܼ ܠܝܼ ܒܝܼܫܵܬܹ̈‌ܐ ܒܠܵܐ ܡܸܢܝܵܢܵܐ، ܡܸܛܝܸܢܗܘܿܢ ܥܵܘܠܝܼ̈ ܘܠܹܐ ܝܘܸܢ ܒܸܡܨܵܝܵܐ ܕܚܵܙܹܝܢ، ܙܝܼܕ ܠܗܘܿܢ ܡ̣ܢ ܣܲܥܪܵܐ ܕܪܹܝܫܝܼ ܘܠܸܒܝܼ ܩܵܡ ܫܵܒܹܩ ܠܝܼ.

¹³ܒܵܣܡܵܐ ܠܘܼܟ݂، ܝܵܐ ܡܵܪܝܵܐ، ܠܦܲܨܘܼܝܝܼ، ܡܲܠܝܸܙ ܠܗܲܝܲܪܬ‌ܝܼ، ܝܵܐ ܡܵܪܝܵܐ.

¹⁴ܢܵܟ݂ܦܝܼ ܘܦܵܝܫܝܼ ܡܘܼܢܟܸܦܹܐ ܟܠܵܝܗ‌ܝ ܛܵܥܝܵܢܹ̈ܐ ܠܓܵܢܝܼ ܠܛܲܠܘܼܩܘܼܗ̇، ܕܵܝܪܝܼ ܠܒܵܬܪܵܐ ܘܗܵܘܝܼ ܡܘܼܣܠܝܼܹܐ ܐܵܢܝܼ ܕܒܵܣܡܵܐ ܠܗܘܿܢ ܒܒܝܼܫܬ‌ܝܼ.

¹⁵ܦܵܝܫܝܼ ܬܡܝܼܗܹܐ ܡ̣ܢ ܢܟ݂ܝܼܦܬܵܝܗ‌ܝ، ܐܵܢܝܼ ܕܟܹܐ ܐܵܡܪܝܼ ܐܸܠܝܼ: ”ܐܘܿܚܲܝ! ܐܘܿܚܲܝ!“

¹⁶ܚܵܕܝܼ ܘܦܵܨܚܝܼ ܒܝܼܘܼܟ݂ ܟܠܵܝܗ‌ܝ ܛܵܥܝܵܢܹ̈ܐ ܐܸܠܘܼܟ݂، ܐܵܡܪܝܼ ܐܲܡܝܼܢܵܐܝܼܬ ܡܲܚܸܒܵܢܹ̈ܐ ܕܦܘܼܪܩܵܢܘܼܟ݂: ”ܗܵܘܹܐ ܓܘܼܪܵܐ ܡܵܪܝܵܐ.“

¹⁷ܘܐܵܢܵܐ ܡܸܣܟܹܢܵܐ ܝܘܸܢ ܘܣܢܝܼܩܵܐ، ܡܵܪܝܵܐ ܟܹܐ ܬܲܚܡܸܢ ܒܘܼܬ ܕܝܼܝܼ، ܗܲܝܲܪܬ‌ܝܼ ܘܦܲܨܝܵܢܝܼ ܐܲܢ݇ܬ ܝܼܘܸܬ، ܝܵܐ ܐܲܠܵܗ‌ܝܼ، ܠܵܐ ܥܲܪܩܸܠܸܬ.