Pesalem 40:3-17

³Eŋ kêkêŋ wê wakuc kêsêp aocsuŋ. Kêdôŋ wê lambiŋŋa teŋ kêpi aêacnêŋ Anôtô. Lau taêsam sêlic e selendec e mateŋ êsap Apômtaugeŋ.

⁴Aoc êôc ŋac, taŋ mata kêsap Apômtau naŋ, ma gêmoa gêwiŋ teŋbeleŋ aŋgeŋwaga atom to kêsa dansaŋtêna nêŋ lêŋ atom.

⁵O ma Apômtau Anôtô, aôm gôgôm gêŋtalô taêsam kêtu aêacŋa. Ŋac teŋ kêtôm aôm gêmoa atom. Aôm taêm gêjam lêŋ moasiŋŋa taêsam amboac tonaŋ. Aê embe jawa sa to jasa sa, oc jatôm atom gebe taêsam ŋanô lasê.

⁶Da sêbucŋa to da keleŋ gêjac aôm matamanô ŋajam atom, mago kômasaŋ taŋocsuŋ gobe jaŋô biŋ. Aôm koteŋ daja to da wama atom.

⁷Amboac tonaŋ jasôm gebe “Ôlic acgom, oc jawac sêwa aêŋoc biŋ sa gêc biŋsu ŋabuku.

⁸O ŋoc Anôtô, aê jaŋgôm aômnêm biŋ êtu tôŋ janac ŋawae. Nêm biŋsu gêc ŋoc ŋalêlôm.”

⁹Aê kasôm aôm gôjam aêac sa ŋawae lasê aŋga lau taêsam sêkac tauŋ sa ŋalêlôm. O Apômtau, aôm taôm gôlicgac gebe aê kagamiŋ gêdôcôlic atom.

¹⁰Aê gasaŋ nêm biŋ gôjam lau kêsiŋa ŋawae auc gêc ŋoc ŋalêlôm atom. Kasôm lasêgeŋ gebe aôm ŋac ŋaŋêŋ to gôjam lau sa.

¹¹O Apômtau, amboac tonaŋ ôŋgamiŋ taêm walô êndêŋ aêma atom. Nêm têmtac gêwiŋ teŋgeŋŋa to biŋ ŋaŋêŋ oc êkwa aê auc ŋapaŋ.

¹²Gêŋwapac ŋalêlêma atom kêgi aê auc. Ŋac sec kêtap aê sa gêjam aucgeŋ. Taêsam ŋasec kêlêlêc môkêclauŋ môkêcapacŋa su, tec gajac kapoac tauc gacgeŋ gamoa.

¹³O Apômtau, ôlic ŋajam ma ônam aê sa. O Apômtau, ônsaic taômgeŋ mêŋôpuc aê tôŋ.

¹⁴Êsêac taŋ dêdib aê sebe senseŋ aê su naŋ, ôkêŋ êsêac samob majeŋ to teŋbeleŋ ŋawapac êsa. Ôkêŋ êsêac, taŋ sêkêŋ mateŋgeŋ sebe aê jatu sec naŋ, sêc tomajeŋgeŋ sêmu sêna.

¹⁵Êsêac taŋ sêgôm Kec, kec kêpi aê naŋ, ôkêŋ êsêac têtakê tomajeŋgeŋ.

¹⁶Ôkêŋ êsêac samob, taŋ sesom aôm naŋ, ôliŋ êpi to têntac ŋajam êsa êtu aômŋa. Ôkêŋ êsêac samob, taŋ taêŋ kêka aômnêm moasiŋ naŋ, sêsôm lasê endeŋ tôŋgeŋ gebe Apômtau ŋac towae.

¹⁷O Apômtau, aê tec ŋac palê-palê to ŋac ŋalêlôm sawa jamoa naeo, mago aôm taêm gêjam aê. O ŋoc Anôtô, ônam gamêŋ tôŋ atom gebe ŋoc ônam-aê-sa to ôpuc-aê-tôŋwaga aômgoc.