ܡܙܡܘܪ̈ܐ 35:10-27

¹⁰ܟܠܵܗ̇ ܓܵܢܝܼ ܒܸܬ ܐܵܡܪܵܐ: ”ܝܵܐ ܡܵܪܝܵܐ، ܡܵܢܝܼ ܐܝܼܬ ܐܲܝܟ݂ ܕܝܼܘܼܟ݂؟ ܦܲܨܝܵܢܵܐ ܠܡܸܣܟܹܢܵܐ ܡ̣ܢ ܚܲܕ ܒܘܼܫ ܙܲܪܒܵܢܵܐ ܡܸܢܹܗ، ܘܠܡܸܣܟܹܢܵܐ ܘܠܣܢܝܼܩܵܐ ܡ̣ܢ ܚܵܛܘܿܦܹܗ.“

¹¹ܟܹܐ ܩܵܝܡܝܼ ܣܵܗܕܹ̈ܐ ܣܸܪ̈ܝܹܐ، ܟܹܐ ܨܲܚܨܹܐ ܠܝܼ ܒܘܼܬ ܡܸܢܕܝܼ ܕܠܹܐ ܝܵܕܥܹܢ.

¹²ܟܹܐ ܦܵܪܥܝܼ ܠܝܼ ܒܝܼܫܬܵ‌ܐ ܡܓܹܒܵܐ ܕܛܵܒ݂ܬܵ‌ܐ، ܠܸܥܒ݂ܵܕܘܼܗ̇ ܡܘܼܫܲܡܸܪ ܓܵܢܝܼ.

¹³ܐܝܼܢܵܐ ܐܵܢܵܐ، ܟܲܕ ܡܪܝܼܥ ܠܗܘܿܢ ܠܒ݂ܝܼܫ ܠܝܼ ܣܲܩܵܐ، ܡܘܼܥܝܸܩܵܐ ܠܝܼ ܒܨܵܘܡܵܐ ܓܵܢܝܼ، ܘܨܠܘܿܬ‌ܝܼ ܠܚܦܵܩܝܼ ܕܝܼܪܵܗ̇.

¹⁴ܐܲܝܟ݂ ܠܚܲܒ݂ܪܝܼ، ܐܲܝܟ݂ ܠܐܲܚܘܿܢܝܼ، ܚܕܝܼܪܝܼ ܠܸܥܒ݂ܵܕܵܐ ܐܸܒ݂ܠܵܐ، ܐܲܝܟ݂ ܥܵܒ݂ܕܵܢܵܐ ܕܬܵܥܙܝܼ ܠܝܸܡܵܐ، ܠܒ݂ܝܼܫܵܐ ܟܘܼܡܵܐ، ܡܘܼܟܸܦܵܐ ܠܝܼ ܓܵܢܝܼ.

¹⁵ܐܝܼܢܵܐ ܒܬܲܪܩܲܠܬ‌ܝܼ ܦܨܝܼܚ ܠܗܘܿܢ ܘܓ̰ܡܝܼܥ ܠܗܘܿܢ، ܓ̰ܡܝܼܥ ܠܗܘܿܢ ܥܲܠܝܼ ܡܵܚܝܵܢܝܼ̈ ܘܠܵܐ ܝܕܝܼܥ ܠܝܼ، ܦܘܼܪܦܸܛܸܢܗܘܿܢ ܘܠܵܐ ܫܠܹܐ ܠܗܘܿܢ.

¹⁶ܐܲܝܟ݂ ܚܲܢܦܹ̈ܐ ܡܲܣܚܘܼܪܹܐ ܡܘܼܣܚܸܪܗܘܿܢ ܒܝܼܝܼ، ܚܲܪܚܘܼܟ̰ܹܐ ܟܹܟܵܝ̈ܗ‌ܝ ܥܲܠܝܼ.

¹⁷ܝܵܐ ܡܵܪܝܵܐ، ܟܡܵܐ ܒܸܬ ܗܵܘܹܝܬ ܓܲܫܘܼܩܹܐ، ܦܲܨܝܼ ܓܵܢܝܼ ܡ̣ܢ ܚܪ̈ܵܒ݂ܵܝܗ‌ܝ، ܡ̣ܢ ܓܘܼܪ̈ܝܹܐ ܕܐܲܪ̈ܝܹܐ ܝܼܚܝܼܕܵܝܘܼܬ‌ܝܼ.

¹⁸ܒܸܬ ܫܲܟܪܸܢܘܼܟ݂ ܓܵܘ ܟܸܢܫܵܐ ܓܘܼܪܵܐ، ܓܵܘ ܥܲܡܵܐ ܙܲܪܒܵܢܵܐ ܒܸܬ ܫܲܒܚܸܢܘܼܟ݂.

¹⁹ܠܵܐ ܚܵܕܝܼ ܥܲܠܝܼ ܕܸܫ̃ܡܸܢܝܼ̈ ܕܒܕܘܼܓܠܵܐ، ܣܵܢܝܵܢܝܼ̈ ܕܠܵܐ ܥܸܠܬܵ‌ܐ ܠܵܐ ܠܵܟܙܝܼ ܥܲܝܢܵܐ.

²⁰ܣܵܒܵܒ ܠܹܐ ܗܲܡܙܸܡܝܼ ܫܠܵܡܵܐ، ܘܥܲܠܔ ܫܸܠܝܹ̈ܐ ܕܒܐܲܪܥܵܐ ܟܹܐ ܚܵܫܒ݂ܝܼ ܦܸܠܡܹ̈ܐ.

²¹ܘܡܘܼܪܘܸܚ ܠܗܘܿܢ ܦܘܼܡܵܝܗ‌ܝ ܥܲܠܝܼ، ܐܡܝܼܪܗܘܿܢ: ”ܐܲܗܵܐ! ܐܲܗܵܐ! ܚܙܹܐ ܠܗܘܿܢ ܥܲܝܢܲܢ̈.“

²²ܚܙܹܐ ܠܘܼܟ݂ ܡܵܪܝܵܐ، ܠܵܐ ܗܵܘܹܝܬ ܫܬܝܼܩܵܐ، ܝܵܐ ܡܵܪܝܵܐ، ܠܵܐ ܪܵܚܩܹܬ ܡܸܢܝܼ.

²³ܪܥܘܿܫ ܘܬܥܘܿܪ ܠܕܝܼܘܵܢܝܼ، ܝܵܐ ܐܲܠܵܗ‌ܝܼ ܘܡܵܪܝܼ، ܠܨܒ݂ܘܼܬ‌ܝܼ.

²⁴ܥܒ݂ܘܿܕ ܠܵܗ̇ ܕܝܼܘܵܢܝܼ ܐܲܝܟ݂ ܙܲܕܝܼܩܘܼܬܘܼܟ݂، ܡܵܪܝܵܐ ܐܲܠܵܗ‌ܝܼ، ܕܠܵܐ ܚܵܕܝܼ ܒܝܼܝܼ.

²⁵ܠܵܐ ܐܵܡܪܝܼ ܒܠܸܒܵܝܗ‌ܝ: ”ܐܲܗܵܐ! ܗܘܹܐ ܠܹܗ ܨܸܒ݂ܝܵܢܵܐ ܕܓܵܢܲܢ. ܠܵܐ ܐܵܡܪܝܼ: ܒܠܝܼܥ ܠܲܢ ܐܸܠܹܗ.“

²⁶ܢܵܟ݂ܦܝܼ ܘܦܵܝܫܝܼ ܡܘܼܢܟܸܦܹܐ ܟܠܵܝܗ‌ܝ ܡܸܚܕܵܕܹ̈ܐ ܚܵܕܝܵܢܹ̈ܐ ܠܒܝܼܫܓܲܕܘܼܬ‌ܝܼ، ܠܵܒ݂ܫܝܼ ܢܟ݂ܝܼܦܬܵ‌ܐ ܘܦܵܝܫܝܼ ܡܘܼܢܟܸܦܹܐ ܓܲܪ̈ܘܸܣܵܢܹܐ ܕܓܵܢܵܝܗ‌ܝ ܥܲܠܝܼ.

²⁷ܡܲܩܘܸܚܝܼ ܘܦܵܨܚܝܼ ܐܵܢܝܼ ܕܒܵܣܡܵܐ ܠܗܘܿܢ ܒܙܲܕܝܼܩܘܼܬ‌ܝܼ، ܘܐܲܡܝܼܢܵܐܝܼܬ ܐܵܡܪܝܼ: ”ܓܘܼܪܵܐ ܝܠܹܗ ܡܵܪܝܵܐ، ܗ̇ܘ ܕܒܵܣܡܵܐ ܠܹܗ ܒܫܠܵܡܵܐ ܕܪܹܓܹܗ.“