Kap 35:10-27

¹⁰Butnokon da yaŋ iyɨkeŋ, “Yawe, gak yombem kɨnda mɨni. Gak da tapmɨmni mɨni amɨn uŋun tagɨsi paŋpulugaŋaki amɨn tapmɨmni toŋ da dɨma paŋupbal aŋ. Gak da bupmɨ amɨn wadak wadak aŋ uŋun paŋpulugaŋaki kabo noknok da yoni dɨma tɨmɨkgaŋ.”

¹¹Top amɨn da aŋpak yokwi dɨ dɨma agɨmon gen yaŋ namaŋ.

¹²Nak aŋpak tagɨ baŋ aŋ yomɨŋapbo, uŋun da kobogɨ do aŋpak yokwi baŋ aŋ namaŋ. Do but yokwi nandɨsat.

¹³Mani sot awit bɨsapmon bupmɨ madepsi nandaŋ yomɨŋek bupmɨ dakon ɨmal wamgum. Nak jap kelek egek gak da paŋpulugoki do bɨsit agɨm.

¹⁴Uŋun notno bo ae padɨgɨno yombem kɨnda do bupmɨ nandagɨm. Nak amɨn kɨnda da meŋi kɨmagakwan bupmɨ ae kunamyokon da agɨsak uŋun yombem. But yokwi nandaŋek kunam ae bupmɨyo aŋek egɨpgum.

¹⁵Mani jɨgɨ pasat bɨsapmon uŋun muwugek kɨsɨk kɨsɨk aŋ. Ae amɨn dɨ dɨma nandaŋ yomɨsat uŋun da abɨŋ nep do muwukgaŋ. Ak nandarɨ mɨni gen yokwi yaŋ namaŋ.

¹⁶Uŋun da yaŋsul sigɨn yaŋ namɨŋek gen yokwisi nayaŋ. Dɨma galak taŋ namɨŋek mam noŋ.

¹⁷Amɨn Tagɨ, bɨsap niaŋ da sigɨn yum pɨndagek nak dɨma aŋpulugoki? Aŋpulugaŋaki nak dɨma aŋupbal ani. Uŋun laion yombem da nak nɨtdaŋ, do uŋun da kɨsiron baŋ pulugoki.

¹⁸Gak da yaŋ aŋaki mɨŋat amɨn kabi morapmɨ kɨsi gak gawak gamdo muwutnikon ya yaŋ gayɨkeŋ. Asisi, mɨŋat amɨn kabɨ madepsi da binapmon mango awɨgɨkeŋ.

¹⁹Amɨn dɨwarɨ ɨsal dogɨn uwal aŋ namaŋ. Yum pɨndakbɨ nak abɨŋ nepmaŋek kɨsɨk kɨsɨk dɨ abam. Uŋun ɨsal dogɨn nandaba yokwi tok aŋ namaŋ. Do yum pɨndagaki nak dakon jɨgɨ do kɨsɨk kɨsɨk dɨma ani.

²⁰Amɨn dɨwarɨ gat yɨtyɨt tagɨsi ak do genjok dɨ dɨma yoŋ. Amɨn kokupmon tagɨsi ekwaŋ uŋun paŋupbal ak do gen baŋ yoŋ.

²¹Uŋun da gen papmon da gen yaŋsi yaŋ namaŋ, “Asisi, nin da gandaŋapno aŋpak yokwi agɨl.”

²²Yawe, gak da uŋun amɨn kɨlɨ pɨndak mudal. Gen mapmɨt dɨma aki. Amɨn Tagɨ, gak nak da dubagɨkon dɨma egɨpbi.

²³Gak Piŋkopno ae Amɨn Tagɨno. Pɨdaŋ abɨŋ nak aŋpulugaŋek gen kokwin kɨlegɨsi aŋ nabi. Pɨdaŋek nak dakon gen aŋteban ak do yaŋ teŋteŋok abi.

²⁴Yawe Piŋkopno, gak aŋpak kɨlegɨ asal. Do nak aŋpulugaŋbɨ uwalno da nak aŋpak kɨlegɨ asat yaŋsi nandani. Yum pɨndagaki nak da yokwi toko nandaŋek kɨsɨk kɨsɨk dɨma ani.

²⁵Yum pɨndagaki iyɨ do “Nin yo ak do nandagɨmaŋ uŋun abɨsok tagɨsisi kɨlɨ uŋun amaŋ” yaŋ dɨma yoni. Yum pɨndagaki “Kɨlɨ aŋupbal amaŋ” yaŋ dɨma yoni.

²⁶Nagon jɨgɨ noman tak uŋun do kɨsɨk kɨsɨk aŋ, do paŋmayak aŋek paŋɨŋtok abi. Uŋun iyɨ dakon man pawɨgɨk do aŋek nak abɨŋ nepmaŋgaŋ, do mayaktok yomɨŋek mani pabɨŋ yopbi dosi nandɨsat.

²⁷Mani nak do amɨn kɨlegɨ yaŋ nayɨki do nandaŋ amɨn, uŋun kɨsɨk kɨsɨk dakon yaŋ tɨdok aŋek burɨ tagɨsi toni dosi nandɨsat. Bɨsapmɨ bɨsapmɨ yaŋ yoni, “Yawe uŋun mani wukwisi! Oman amɨni tagɨsi egɨpjak do but galaksi nandɨsak.”