كِيتِسَيٍ 13:5-22

⁵بَرِ مَ عِ قَمَ تّفّدٍ، عِ دِ شّمّ بَرِ. عِ نَشَ عَ شُنيِ بِ، بَرِ مَ يِ دِ قِشِ عَلَ نَن مَ بٍينُ عَ شَ بَرِ. نَ كُي عَ شِلِ ‹عَلَ شَ نَسَرِ.› عَ تَن نَن عِسِرَيِلَكَيٍ رَكِسِ قْلْمَ قِلِسِتَكَيٍ مَ.»

⁶نَ فِنّ نَشَ سِفَ، عَ سَ عَ قَلَ عَ شَ مْرِ بّ، «عَلَ شَ مِشِ ندٍ بَرَ قَ ﭑ يِرٍ، عَ لُشِ ﭑ بّ عَلْ عَلَ شَ مَلٍكّ. عَ مَفَاشُ. ﭑ مُ عَ مَشْرِن عَ كٍلِشِ دّننَشّ، عَ قَن مُ عَ شِلِ قَلَ ﭑ بّ.

⁷عَ نَشَ عَ مَسٍن ﭑ بّ، ‹عِ قَمَ تّفّدٍ، عِ قَ دِ شّمّ بَرِ. عِ نَشَ سٍسٍ مِن نَشَن نْمَ عِ سِيسِدٍ. عِ نَشَ سٍسٍ دٌن نَشَن مُ سّنِيّنشِ، بَرِ مَ يِ دِ قِشِ عَلَ نَن مَ بٍينُ عَ شَ بَرِ، هَن عَ لَاشِرَ مَ تّمُي نَشّ. عَلَ شَ نَسَرِ نَ عَ رَ.›»

⁸مَنٌوَ نَشَ عَلَتَلَ مَشَندِ يِ كِ، «ﭑ مَرِفِ، عِ مَن شَ عِ شَ مِشِ شّي مُشُ شْن مَ عَلَكٌ عَ شَ مُشُ شَرَن نَ دِ شُرُ كِ رَ.»

⁹عَلَ نَشَ مَنٌوَ شَ دُبّ سُشُ، عَ مَن نَشَ عَ شَ مَلٍكّ شّي عَ شَ فِنّ شْن مَ. مَنٌوَ شَ فِنّ نُ دْشْشِ شّ مَ عَ شَ مْرِ مُ نُ نَ نَا.

¹⁰عَ تٌ عَ تٌ، عَ نَشَ عَ فِ كٍرٍن نَ، عَ سَ عَ قَلَ عَ شَ مْرِ بّ، «شّمّ نَشَن قَ ﭑ يِرٍ، عَ مَن بَرَ قَ.»

¹¹مَنٌوَ نَشَ كٍلِ، عَ بِرَ عَ شَ فِنّ قْشْ رَ. عَ تٌ نَ شّمّ لِ، عَ نَشَ عَ مَشْرِن، «عِ تَن نَن وْيّن ﭑ مَ فِنّ رَ؟» عَ نَشَ عَ يَابِ، «عِيٌ.»

¹²مَنٌوَ مَن نَشَ عَ مَشْرِن، «عِ شَ مَسٍنيِ نَ كَمَلِ تّمُي نَشّ، عَ لَنمَ مُشُ شَ نَ دِ شُرُ دِ؟»

¹³عَلَتَلَ شَ مَلٍكّ نَشَ عَ يَابِ، «عِ شَ فِنّ شَ عَ رَبَ عَلْ ﭑ عَ قَلَ عَ بّ كِ نَشّ.

¹⁴عَ نَشَ وّنِ سَنسِ بٌفِ يٌ دٌن، عَ نَشَ وّنِ نُن عَ مَنِيّ مِن، عَ نَشَ دٌنسٍ سّنِيّنتَرٍ دٌن. عَ شَ نَ بِرِن نَبَ عَلْ ﭑ عَ قَلَ عَ بّ كِ نَشّ.»

¹⁵مَنٌوَ نَشَ عَ قَلَ عَلَتَلَ شَ مَلٍكّ بّ، «عِ شَ لُ بٍ سِندٍن، مُشُ شَ سِ حِن عِ بّ.»

¹⁶عَلَتَلَ شَ مَلٍكّ نَشَ عَ يَابِ، «هَلِ ﭑ لُ بٍ، ﭑ مُ عِ شَ دٌنسٍ دٌنمَ، كْنْ شَ عِ وَ مَ سّرّشّ فَن دَاشِ تَن بَقٍ عَلَتَلَ بّ، نَ قَن.» مَنٌوَ مُ نُ عَ كٌلٌن عَلَتَلَ شَ مَلٍكّ نَن عَ رَ.

¹⁷مَنٌوَ نَشَ عَ مَشْرِن، «عِ شِلِ دِ؟ مُشُ شَ نَ كٌلٌن عَلَكٌ مُشُ شَ عِ مَتْشْ عِ شَ مَسٍنيِ كَمَلِمَ تّمُي نَشّ.»

¹⁸عَلَتَلَ شَ مَلٍكّ نَشَ عَ مَشْرِن، «عِ وَ مَ ﭑ شِلِ كٌلٌنقٍ مُنقٍ رَ؟ فُندٌ نَن عَ رَ.»

¹⁹مَنٌوَ نَشَ نَ سِ نُن قَرِن ندٍ بَ سّرّشّ فَن دَاشِ رَ قَنيٍ ندٍ قَرِ عَلَتَلَ بّ. نَ تّمُي كَابَنَكٌ ندٍ نَشَ رَبَ عٍ يَ شْرِ.

²⁰نَ تّ نُ نَ تٍقٍ كٌورٍ مَ تّمُي نَشّ، عَلَتَلَ شَ مَلٍكّ قَن نَشَ تٍ كٌورٍ مَ نَ تّ كُي. مَنٌوَ نُن عَ شَ فِنّ تٌ نَ تٌ، عٍ نَشَ عٍ قٍلٍن بْشِ مَ.

²¹عَلَتَلَ شَ مَلٍكّ تٌ سِفَ، مَنٌوَ نُن عَ شَ فِنّ مُ نُ عَ تٌ سْنْن. عٍ نَشَ عَ كٌلٌن عَلَتَلَ شَ مَلٍكّ يَتِ يَتِ نَن نُ عَ رَ.

²²مَنٌوَ نَشَ عَ قَلَ عَ شَ فِنّ بّ، «وٌن قَمَ قَشَدٍ يَ بَرِ مَ وٌن بَرَ عَلَ يَتِ يَتِ تٌ.»