كِيتِسَيٍ 11:17-36

¹⁷نَ تّمُي عِسِرَيِلَ نَشَ شّيرَيٍ شّي عٍدٌن مَنفّ شْن، عٍ شَ عَ قَلَ عَ بّ، ‹عَ لُ مُشُ شَ دَنفِ عِ شَ بْشِ مَ.› كْنْ عٍدٌن مَنفّ مُ تِن نَ رَ قٍقٍ مَ. عٍ نَشَ شّيرَيٍ شّي مٌوَبَ مَنفّ قَن شْن. عَ نَشَ تٌندِ، عِسِرَيِلَكَيٍ قَ لُ كَدٍ سِ.»

¹⁸«نَ دَنفِ شَنبِ، عٍ نَشَ عٍدٌن بْشِ نُن مٌوَبَ بْشِ مَبِلِن فبٍنفبٍرٍنيِ مَ. عٍ عٍ حّرّ مٌوَبَ بْشِ سٌفٍتٍدٍ بِرِ، هَن عٍ عَرِنٌن شُرٍ عِفِرِ. نَ كُي عٍ مُ سٌشِ مٌوَبَ بْشِ مَ، بَرِ مَ عَرِنٌن قِندِشِ مٌوَبَ شَ نَانِنيِ نَن نَ.

¹⁹نَ تّمُي عِسِرَيِلَكَيٍ نَشَ شّيرَيٍ شّي سِشْن شْن، عَمٌرِكَيٍ شَ مَنفّ نَشَن نُ نَ شّسِبْن. عِسِرَيِلَكَيٍ نَشَ عَ قَلَ عَ بّ، ‹عَ لُ مُشُ شَ مِنِ عِ شَ بْشِ رَ، مُشُ شَ سِفَ مُشُ شَ بْشِ مَ عَلَ نَشَن سُفَندِشِ مُشُ بّ.›

²⁰كْنْ سِشْن مُ تِن عِسِرَيِلَكَيٍ شَ مِنِ عَ شَ بْشِ رَ. عَ نَشَ عَ شَ حَمَ بِرِن مَلَن، عٍ نَشَ كُرُ يَهَسِ، عٍ عِسِرَيِلَ فٍرٍ.

²¹عِسِرَيِلَ مَرِفِ عَلَتَلَ نَشَ سِشْن نُن عَ شَ حَمَ سَ عِسِرَيِلَ سَفٌي. عِسِرَيِلَكَيٍ نَشَ نْ عٍ رَ، عٍ قَ سَبَتِ عَمٌرِكَيٍ شَ بْشِ بِرِن مَ،

²²قْلْقٍ عَرِنٌن شُرٍ مَ، سَ دْشْ يَبٌكٌ شُرٍ رَ، قْلْقٍ فبٍنفبٍرٍنيِ مَ، سَ دْشْ يُرُدّن نَ.»

²³«عِسِرَيِلَ مَرِفِ عَلَتَلَ بَرَ عَمٌرِكَيٍ شَ بْشِ قِ مُشُ مَ، عِ تَن وَ مَ نَ بْشِ بَقٍ مُشُ يِ مُنقٍ رَ؟

²⁴عِ شَ عَلَ كٍمٌسِ، عَ بْشِ نَشَن سٌشِ عِ يِ رَ، عِ مُ عِ وَ سَسٌمَ نّ؟ مُشُ قَن، مُشُ مَرِفِ عَلَتَلَ بْشِ نَشَن بِرِن سٌشِ مُشُ يِ رَ، مُشُ نَ سُشُمَ نّ.

²⁵عِ حْشْ عَ مَ عِ سّنبّ دَنفِشِ نّ بَلَكِ رَ، سِثٌرٌ شَ دِ، مٌوَبَ مَنفّ؟ نَ تَن مُ تِن عِسِرَيِلَ فٍرٍدٍ قٍقٍ مَ.

²⁶حّ كّمّ سَشَن نَن يِ كِ، عِسِرَيِلَ سَبَتِشِ شّسِبْن نُن عَ رَبِلِنيِيٍ، عَرٌوٍرِ نُن عَ رَبِلِنيِيٍ، عَ نُن تَا بِرِن نَشٍيٍ نَ عَرِنٌن شُرٍ دّ رَ. مُنقٍ رَ وٌ مُ عٍ رَ سُشُ نَ وَشَتِ بُن مَ؟

²⁷ﭑ تَن مُ هَاكّ يٌ رَبَشِ عِ رَ. عِ تَن نَن قٍ حَاشِ رَبَقٍ ﭑ نَ، فٍرٍ تِقٍ ﭑ بّ. عَلَتَلَ، كِيتِسَ شُنفبٍ، عَ شَ عِسِرَيِلَكَيٍ نُن عَمٌنِكَيٍ مَكِيتِ تٌ لْشْي.»

²⁸عَمٌنِكَيٍ شَ مَنفّ مُ تِن عَ تُلِ مَتِدٍ يٍقِتٍ شَ مَسٍنيِ رَ.

²⁹عَلَتَلَ شَشِلِ نَشَ فٌرٌ يٍقِتٍ مَ. يٍقِتٍ نَشَ فَلَدِ نُن مَنَسِ عِفِرِ. عَ نَشَ دَنفِ مِسِثَ رَ فَلَدِ بْشِ مَ. عَ نَشَ سِفَ هَن عَمٌنِكَيٍ شَ بْشِ مَ.

³⁰يٍقِتٍ نَشَ لَايِدِ تٌنفٌ عَلَتَلَ بّ، عَ عَ قَلَ عَ بّ، «شَ عِ سَ عَمٌنِكَيٍ بِرِن سَ ﭑ سَفٌي،

³¹نَشَن سِنفٍ نَ مِنِ ﭑ مَ بَنشِ نَادّ رَ قَقٍ ﭑ نَلَندٍ، ﭑ نّ فبِلٍنمَ كٍلِقٍ رَ عَمٌنِكَيٍ شَ بْشِ مَ سّيوّ كُي تّمُي نَشّ، نَ كَنيِ بَمَ سّرّشّ فَن دَاشِ نَن نَ مَرِفِ عَلَتَلَ بّ.»

³²يٍقِتٍ نَشَ سِفَ عَمٌنِكَيٍ شَ بْشِ مَ عٍ فٍرٍدٍ. عَلَتَلَ نَشَ عٍ سَ عَ سَفٌ.

³³عَ نَشَ عٍ بْنبْ عَ شْرْشْي رَ قْلْ عَرٌوٍرِ مَ، سَ دْشْ مِنِتِ بِرِ رَ، تَا مْشْحّن، هَن هَبِلَ كٍرَ مِمِ. عَمٌنِكَيٍ نَشَ لُ يَافِ كُي عِسِرَيِلَكَيٍ يَ عِ.

³⁴يٍقِتٍ نَشَ فبِلٍن مِسِثَ. عَ تٌ عَ شْنيِ لِ، عَ شَ دِ فِنّ نَشَ مِنِ عَ رَلَندٍ. عَ نُ قَرٍ بٌرٌنمَ مَشَسٍيٍ شُي رَ. عَ شَ دِ كٍرٍنيِ نَن نُ عَ رَ، دِ شّمّ مُ نُ نَ، دِ فِنّ فبّتّ قَن مُ نُ نَ عَ بّ.

³⁵عَ قّقّ عَ شَ دِ فِنّ تٌ، عَ نَشَ عَ شَ دٌنمَيٍ عِبْو، عَ عَ قَلَ، «ﭑ مَ دِ فِنّ، عِ بَرَ ﭑ نَسٌ تْورّ شُنفبٍ كُي، عِ بَرَ عَ نِيَ ﭑ شَ سُننُن عَ حَاشِ رَ. ﭑ بَرَ لَايِدِ تٌنفٌ عَلَتَلَ بّ، ﭑ مُ نْمَ فبِلٍندٍ نَ مَ سْنْن.»

³⁶عَ شَ دِ فِنّ نَشَ عَ قَلَ عَ بّ، «ﭑ بَبَ، عِ لَايِدِ نَشَن تٌنفٌ عَلَتَلَ بّ، عِ شَ نَ رَكَمَلِ. عِ نَشَن قَلَ عَلَتَلَ بّ، عِ شَ نَ رَبَ ﭑ نَ، بَرِ مَ عَلَتَلَ بَرَ عِ فبٍحْشْ عِ يَشُي عَمٌنِكَيٍ مَ.»