عِسِرَيِلَ مَنفّيٍ ١ 18:7-26

⁷عَبَدِيَسِ نَشَ نَرَلَن عَننَبِ عٍلِيَ رَ كِرَ شْن. عَبَدِيَسِ تٌ عَ تٌ، عَ نَشَ عَ قٍلٍن عَ بُن مَ، عَ عَ قَلَ عَ بّ، «ﭑ مَرِفِ عٍلِيَ، عِ تَن يَتِ نَن عَ رَ؟»

⁸عٍلِيَ نَشَ عَ يَابِ، «عِيٌ، ﭑ تَن نَن عَ رَ. سَ عَ قَلَ عِ شَ مَنفّ بّ، عِ بَرَ عَننَبِ عٍلِيَ تٌ.»

⁹عَبَدِيَسِ نَشَ عَ قَلَ، «ﭑ هَاكّ مُندُن نَبَشِ عِ رَ نَشَن عَ نِيَمَ عِ شَ يِ مْولِ رَبَ ﭑ نَ؟ يِ قِندِ مَ قَشّ نَن نَ ﭑ بّ عَكَبُ مَبِرِ.

¹⁰ﭑ شَ عَ قَلَ عِ بّ عِ مَرِفِ عَلَتَلَ شِلِ رَ، حَمَنّ نُن بْشِ يٌ مُ نَ، ﭑ مَ مَنفّ مُ عِ قٍنشِ دّننَشّ. مّننِكَيٍ نَ عَ قَلَ عِ مُ نَ، عَكَبُ عٍ رَكَلِمَ شَ عٍ مُ عِ تٌشِ.

¹¹يَكْسِ عِ نَشّ، ‹سَ عَ قَلَ مَنفّ بّ عِ بَرَ عَننَبِ عٍلِيَ تٌ.›

¹²كْنْ ﭑ نَ كٍلِ عِ شُن مَ يَ، عَلَتَلَ شَشِلِ سّنِيّنشِ قَمَ عِ شَنِندٍ يِرٍ ندٍ. نَ كُي، ﭑ نَ فّ شّيرَ عِبَدٍ عَكَبُ بّ، عَ لِمَ مُشُ مُ عِ تٌمَ بٍ سْنْن، عَ قَ ﭑ قَشَ نَ مَ. ﭑ تَن بَرَ فَاشُ عَلَتَلَ يَ رَ كَبِ ﭑ دِ مّدِ تّمُي.

¹³ﭑ مَرِفِ، عٍ مُ عَ قَلَشِ عِ بّ، ﭑ نَشَن نَبَ يٍسَبٍلَ نُ عَلَتَلَ شَ نَمِحْنمّيٍ قَشَمَ تّمُي نَشّ؟ ﭑ عَلَتَلَ شَ نَمِحْنمّ كّمّ نَن نْشُن قْنمّ كُي تٌنفٌ سُولِ سُولِ مَ. ﭑ نُ قَ عٍ بَلٌ تَامِ نُن يٍ رَ.

¹⁴كْنْ يَكْسِ، شَ عِ ﭑ شّي ﭑ مَ مَنفّ شْن مَ، ﭑ شَ عَ قَلَ عَ بّ ﭑ بَرَ عَننَبِ عٍلِيَ تٌ، عَ ﭑ قَشَمَ نّ!»

¹⁵عَننَبِ عٍلِيَ نَشَ عَ يَابِ، «ﭑ بَرَ ﭑ كَلِ ﭑ مَرِفِ عَلَتَلَ رَ، تٌ ﭑ نَن ﭑ يّتّ مَسٍنمَ نّ عَكَبُ بّ.»

¹⁶عَبَدِيَسِ نَشَ سِفَ عَكَبُ يِرٍ، عَ قَ دّنتّفّ سَ عَ بّ. عَكَبُ نَشَ سِفَ عٍلِيَ قْشْ رَ.

¹⁷عَ تٌ سَ عٍلِيَ تٌ، عَكَبُ نَشَ عَ قَلَ عَ بّ، «عِ تَن نَن عِسِرَيِلَ يَ عِسٌشِ يِ كِ؟»

¹⁸عَننَبِ عٍلِيَ نَشَ عَ يَابِ، «ﭑ تَن شَ مُ عِسِرَيِلَ يَ عِسٌشِ. عِ تَن نُن عِ بَبَ بْنسْي نَن عِسِرَيِلَ يَ عِسٌشِ، بَرِ مَ وٌ بَرَ عَلَتَلَ شَ يَامَرِيٍ رَبٌلٌ، عِ بِرَ بَلِ كُيٍ قْشْ رَ.

¹⁹يَكْسِ، عِ شَ عِسِرَيِلَ حَمَ بِرِن مَلَن كَرٍ مٍلٍ فٍيَ مَ، عَ نُن وٌ شَ بَلِ كُيٍ شَ نَمِحْنمّ كّمّ نَانِ تٌنفٌ سُولِيٍ، عَ نُن عَسٍرَ كُيٍ شَ نَمِحْنمّ كّمّ نَانِيٍ، عِ شَ فِنّ يٍسَبٍلَ نَشٍيٍ رَبَلٌمَ.»

²⁰عَكَبُ نَشَ مِشِيٍ شّي عِسِرَيِلَكَيٍ شِلِدٍ. عَ نَشَ نَ نَمِحْنمّيٍ مَلَن كَرٍ مٍلٍ فٍيَ قَرِ.

²¹نَ تّمُي عٍلِيَ نَشَ عَ مَسٌ حَمَ بِرِن نَ، عَ قَ يِ مَسٍنيِ تِ عٍ بّ، «وٌ تَن لُمَ قِلَنكَقُيحَ كُي هَن مُن تّمُي؟ شَ عَلَتَلَ نَن عَلَ رَ، وٌ بِرَ عَ قْشْ رَ. شَ بَلِ نَن عَلَ رَ، وٌ بِرَ عَ تَن بَلِ قْشْ رَ.» حَمَ مُ عَ يَابِ.

²²عَننَبِ عٍلِيَ مَن نَشَ عَ قَلَ عٍ بّ، «ﭑ كٍرٍن نَن بٍ عَلَتَلَ شَ نَمِحْنمّ رَ. بَلِ شَ نَمِحْنمّيٍ مِشِ كّمّ نَانِ تٌنفٌ سُولِ نَ بٍ.

²³وٌ شَ تُورَ قِرِن سٌ مُشُ يِ رَ. بَلِ نَمِحْنمّيٍ شَ عٍ فبٍ سُفَندِ، عٍ شَ عَ عِبٌلٌن، عٍ عَ سَ يٍفٍ قَرِ، كْنْ تّ مُ دْشْمَ عَ رَ. ﭑ تَن قَن شَ تُورَ بٌورٍ عِبٌلٌن، ﭑ عَ سَ يٍفٍ فبّتّ قَرِ، ﭑ قَن مُ تّ دْشْمَ عَ رَ.

²⁴مُشُ نَ فّ نَ رَبَدٍ، بَلِ نَمِحْنمّيٍ شَ وٌ مَرِفِ عَلَ مَشَندِ. ﭑ تَن قَن شَ عَلَتَلَ مَشَندِ. عَلَ نَشَن نَ تّ رَفٌرٌ سّرّشّ مَ، نَ نَن قِندِ مَ حَمَ بِرِن مَرِفِ عَلَ رَ.» حَمَ بِرِن نَشَ تِن نَ قٍ رَ.

²⁵عٍلِيَ نَشَ عَ قَلَ بَلِ شَ نَمِحْنمّيٍ بّ، «وٌ تُورَ كٍرٍن سُفَندِ، وٌ سِنفٍ شَ عَ عِبٌلٌن، بَرِ مَ وٌ تَن نَن فبٌ. وٌ وٌ مَرِفِ عَلَ مَشَندِ، كْنْ وٌ نَشَ تّ سَ.»

²⁶عٍ نَشَ تُورَ كٍرٍن تٌنفٌ، عٍ عَ عِبٌلٌن، عٍ عَ سَ يٍفٍ قَرِ، عٍ قَ بَلِ مَشَندِ قْلْ. كٍلِ فّيسّفّ مَ، هَن يَنيِ تَفِ، عٍ عَ قَلَمَ، «بَلِ، مُشُ يَابِ.» كْنْ يَابِ يٌ مُ قَ، شُي ندٍ يٌ مُ مّ. عٍ نَشَ تُفَن تُفَن قْلْ عٍ شَ سّرّشّبَدٍ يَ عِ.