سُوكِ 8:1-10

¹«شَ عِ قِندِشِ ﭑ تَارَ شّمّمَ نَن نَ نُ، ﭑ نفَ شِحّ قِشِ نَشَن مَ، ﭑ نُ نْمَ عِ مَسُنبُدٍ مِشِ يَ شْرِ ﭑ مُ يَافِمَ نَ رَ.

²ﭑ نُ نْمَ عِ شَنِندٍ ﭑ نفَ يِرٍ، عِ شَ قِندِ ﭑ كَرَ مْشْ رَ، ﭑ قَ وّنِ قَنيِ نُن مَنفٌي يٍ سٌ عِ يِ رَ.»

³«ﭑ شُنيِ نَ ﭑ شَنُنتٍنيِ بّلّشّ، عَ نَ ﭑ مَقُرُكُقٍ عَ يِرٍقَنيِ رَ.

⁴دَرِ سَلَمُ فِنّدِ مّيٍ، ﭑ بَرَ وٌ مَيَندِ، وٌ نَشَ شَنُنتٍيَ رَشُنُ، وٌ نَشَ عَ رَكٍلِ، بٍينُ عَ وَ مَ عَ شْن مَ تّمُي نَشّ.»

⁵«ندٍ نَ يِ فِنّ رَ نَشَن كٍلِشِ فبٍنفبٍرٍن يِرٍ، عَ عَ شَنُنتٍنيِ بّلّشّ سُشُشِ؟» فِنّ شَ مَسٍنيِ شّمّ بّ «ﭑ بَرَ عِ رَشُنُ مَنفٌي بِلِ بُن مَ، عِ نفَ تْورْشِ عِ بَرِدٍ دّننَشّ.

⁶ﭑ شَ قِندِ عِ كٍرٍن فبٍ رَ، عَلْ عِ شَ تْنشُمَ نَشَن فبَكُشِ عِ كْن مَ، شَ نَ مُ عَ رَ نَشَن نَسٌشِ عِ بّلّشّسٌلٍ رَ، بَرِ مَ شَنُنتٍيَ سّنبّ فبٌ دَنفِقٍ قَشّ رَ. ﭑ وَ مَ عِ شْن ﭑ يّتّ بّ، عَلْ عَلِفِيَمَ وَ مَ مِشِيٍ شْن مَ كِ نَشّ. شَنُنتٍيَ سّنبّ فبٌ عَلْ تّ، عَلَتَلَ نَشَن نَدّشّشِ، عَ مُ شُبٍنمَ.

⁷بَا يٍ مُ نْمَ شَنُنتٍيَ رَشُبٍندٍ، شُرٍ يٍ مُ نْمَ عَ بَدٍ. مِشِ نَشَن وَ مَ عَ هَرِفٍ بِرِن مَسَرَقٍ شَنُنتٍيَ رَ، مِشِ نَ كَنيِ مَيٍلٍمَ نّ.»

⁸«شُنيَ فِنّمَ نَ مُشُ يِ رَ، عَ مُ مْشِ سِندٍن، عَ شِحّيٍ شُرُن. مُشُ قَمَ مُنسٍ رَبَدٍ عَ بّ مِشِ نَ عَ قٍن تّمُي نَشّ؟

⁹شَ عَ لُشِ عَلْ تّتّ نَشَن بَلَنشِ، مُشُ عَ يّنسّمَ نّ فبٍتِ رَ، كْنْ شَ عَ لُشِ عَلْ نَادّ نَشَن نَبِشِ، مُشُ عَ بَلَنمَ نّ.»

¹⁰«ﭑ تَن لُشِ نّ عَلْ تّتّ نَشَن مُ رَبِمَ، ﭑ شِحّيٍ قِندِشِ يِرٍ مَكَنتَشِيٍ نَن نَ. نَ كُي ﭑ بَرَ قِندِ ﭑ شَنُنتٍنيِ شَ بْحّسَ رَ.