تَرُشُي 27:4-33

⁴مُشُ تٌ كٍلِ نَا، مُشُ نَشَ دَنفِ سِثِرِ سُرِ مَ، بَرِ مَ قٌيٍ مُ نُ تِنشِ مُشُ بّ.

⁵مُشُ تٌ سِلِسِ نُن ثَنقِلِيَ بَا عِفِرِ، مُشُ نَشَ سٌ مِرَ، لِسِ بْشِ مَ.

⁶مّننِ، سْورِ مِشِ كّمّ شُنمَتِ نَشَ كُنكُي تٌ نَشَن كٍلِ عَلٍسَندِرٍ، عَ سِفَقٍ عِتَلِ. مُشُ نَشَ بَكِ نَ كُي.

⁷شِ وُيَشِ بُن مَ كُنكُي نُ تْورْ مَ حّرّدٍ. كَتَ نُن كَتَ مُشُ قَ سِنِدِ لِ كْنْ قٌيٍ مُ تِن مُشُ شَ كِلْن نَا. نَ نَن عَ تٌ مُشُ نَشَ دَنفِ كِرّتِ سُرِ لَابٍ رَ، سَلٍمٌنٍ سّيتِ مَ.

⁸نَا عِحّرّقٍ نُ شْرْشْ. مُشُ نَشَ يِرٍ ندٍ لِ، نَشَن شِلِ وَقُ تٌقَنيِ، لَسٍيَ قّ مَ.

⁹مُشُ نَشَ بُ نَا. حّرّ مَن نُ شْرْشْ بَرِ مَ سُنيِ تّمُي نُ بَرَ دَنفِ.

¹⁰نَ نَ عَ رَ، ثْلُ نَشَ عَ قَلَ، «ﭑ بِيَاسِبٌورٍيٍ، ﭑ بَرَ عَ كٌلٌن وٌن مَ حّرّ قَمَ نّ شْرْشْدٍ. كٌتٍيٍ، كُنكُي، نُن مِشِيٍ قَمَ نّ تْورْدٍ.»

¹¹سْورِ كّمّ شُنمَتِ نَشَ عَ تُلِ مَتِ كّثِنِ نُن كُنكُي كَنيِ شَ وْيّنيِ رَ، عَ تٌندِ ثْلُ شَ مَرَ سِ رَ.

¹²مِشِ فبٍفبٍ نَشَ وَ قٍنِكِ لِقٍ، بَرِ مَ عٍ نُ نَ وَقُ دّننَشّ، مّننِ مُ نُ قَن حّمّ رَدَنفِدٍ رَ. قٍنِكِ، كِرّتِ سُرِ وَقُ نَن عَ رَ، نَشَن يَ رَقِندِشِ سٌفٍفٌرٌدٍ بِرِ مَ. عٍ نَشَ وَ عٍ شَ حّمّ رَدَنفِ نَا.

¹³قٌيٍ دِ ندٍ نَشَ مِنِ كٍلِ كْولَ مَ. عٍ نَشَ عَ مَحْشُن عَ بِيَاسِ بَرَ قَن. عٍ نَشَ هَنفَ بّندُن، عٍ كُنكُي رَدَنفِ كِرّتِ سُرِ قّ مَ.

¹⁴كْنْ نَ تّمُي قٌيٍ شُنفبٍ، نَشَن شِلِ يُرَكِلْن، عَ نَشَ قَ كٍلِ سُرِ مَ.

¹⁵قٌيٍ نَشَ كُنكُي تُتُن، هَن كُنكُي مُ نُ نْمَ مَتِنشِندٍ. مُشُ نَشَ مُشُ رَشَرَ قٌيٍ يِ رَ.

¹⁶مُشُ نَشَ دَنفِ سُرِ لَنمَدِ لَابٍ رَ، نَشَن شِلِ كِلٌدَ. مُشُ نَشَ تْورْ كُنكُي لَنمَ مَسْتْقٍ رَ.

¹⁷عٍ تٌ فّ عَ رَتٍدٍ، عٍ نَشَ لُوتِ مَقِلِن كُنكُي مَ. عٍ تٌ نُ فَاشُشِ دْشْقٍ رَ سِرِتٍ بّنكِ مَ، عٍ نَشَ بّلَ رَفٌرٌ، قٌيٍ نُ قَ سِفَ مُشُ رَ.

¹⁸قٌيٍ نَشَ مُشُ بْنبْ عَ قَنيِ رَ. نَ كُيٍ عِبَ، مُشُ نَشَ كٌتٍ ندٍ وٌلِ بَا مَ.

¹⁹شِ سَشَن تٌ دَنفِ، مُشُ يَتِ نَشَ كُنكُي عِسٍيٍ بِرِن نَفٌرٌ يٍ مَ.

²⁰شِ وُيَشِ نَشَ دَنفِ، سٌفٍ مُ نَ، تُنبُييٍ مُ نَ، قٌيٍ سّنبّ نُ فبٌمَ نَن تُي. مُشُ مُ نُ لَشِ مُشُ كِسِقٍ رَ سْنْن.

²¹كَبِ شِ وُيَشِ مُشُ مُ نُ دٌنسٍ دٌنمَ. عَوَ ثْلُ نَشَ تِ مِشِيٍ تَفِ، عَ نَشَ عَ قَلَ عٍ بّ، «ﭑ بٌورٍيٍ، شَ وٌ وٌ تُلِ مَتِ ﭑ نَ نُ، وٌن مُ كٍلِمَ كِرّتِ نُ، وٌن مُ يِ كَسَرّ نُن لْسِ سْتْمَ نُ.

²²كْنْ يَكْسِ، ﭑ وٌ رَ سِمَ نّ، وٌ شَ لِمَنِيَ، بَرِ مَ مِشِ يٌ مُ قَشَمَ وٌ يَ مَ، كُنكُي نَن فبَنسَن كَسَرَ مَ.

²³ﭑ مَرِفِ عَلَ، ﭑ وَلِمَ نَشَن بّ، عَ شَ مَلٍكّ ندٍ بَرَ مِنِ ﭑ مَ يِ كْي رَ.

²⁴عَ نَشَ عَ قَلَ ﭑ بّ، ‹ثْلُ، عِ نَشَ فَاشُ، قٌ عِ شَ تِ نّ مَنفّ شُنفبٍ يَ عِ. عَلَ بَرَ تِن عِ بِيَاسِبٌورٍ بِرِن نَتَنفَدٍ.›

²⁵نَ نَ عَ رَ، وٌ شَ لِمَنِيَ بَرِ مَ ﭑ لَشِ عَلَ شَ مَسٍنيِ رَ.

²⁶وٌن قَمَ سُرِ ندٍ لِدٍ.»

²⁷كْي قُ نُن نَانِ ندٍ، مُشُ نَشَ عَدِرِيَتِكٍ بَا لِ. نَ كْي تَفِ كُنكُي رَحّرّ نَشَ سٌفِ عَ مُشُ بَرَ مَكْرّ بْشِ ندٍ رَ.

²⁸عٍ تٌ يٍ تِلِنيِ مَنِيَسٍ رَفٌرٌ، عٍ نَشَ كَنكٍ يَ مْشْحّن سْتْ. عٍ تٌ مَكُيَ دٌندٌرٌنتِ، عٍ مَن نَشَ عَ رَفٌرٌ، عٍ نَشَ كَنكٍ يَ قُ نُن سُولِ سْتْ.

²⁹عٍ تٌ فَاشُ فَرِندٍ قَنيٍ ندٍ رَ، عٍ نَشَ هَنفَ نَانِ وٌلِ كُنكُي شَنبِ رَ. عٍ نَشَ فبَتَ كُيٍ عِبَقٍ رَ.

³⁰كْنْ كُنكُي رَحّرّيٍ نُ وَ مَ كٍلِقٍ كُنكُي شُن. عٍ نَشَ كُنكُي لَنمَ رَفٌرٌ بَا مَ عَلْ عٍ نَ هَنفَيٍ نَن نَفٌرٌقٍ كُنكُي يَ رَ.

³¹ثْلُ نَشَ عَ قَلَ سْورِ مِشِ كّمّ شُنمَتِ نُن سْورِيٍ بّ، «شَ يِ مِشِيٍ مُ لُ كُنكُي كُي، وٌ مُ نْمَ كِسِدٍ.»

³²عَوَ، سْورِيٍ نَشَ كُنكُي لَنمَ لُوتِ بٌلٌن، عٍ نَشَ عَ رَبّحِن عَ شَ سِفَ.

³³بٍينُن كُيٍ شَ عِبَ، ثْلُ نَشَ عٍ بِرِن نَسِ عٍ شَ دٌنسٍ دٌن. عَ نَشَ عَ قَلَ عٍ بّ، «عَ شِ قُ نُن نَانِ نَن تٌ وٌ مَمّ تِقٍ، وٌ مُ تِنشِ وٌ دّفٍدٍ.