וַיִּקְרָא 8:6-11

⁶ויקרב משה את אהרן ואת בניו וירחץ אתם במים׃

⁷ויתן עליו את הכתנת ויחגר אתו באבנט וילבש אתו את המעיל ויתן עליו את האפד ויחגר אתו בחשב האפד ויאפד לו בו׃

⁸וישם עליו את החשן ויתן אל החשן את האורים ואת התמים׃

⁹וישם את המצנפת על ראשו וישם על המצנפת אל מול פניו את ציץ הזהב נזר הקדש כאשר צוה יהוה את משה׃

¹⁰ויקח משה את שמן המשחה וימשח את המשכן ואת כל אשר בו ויקדש אתם׃

¹¹ויז ממנו על המזבח שבע פעמים וימשח את המזבח ואת כל כליו ואת הכיר ואת כנו לקדשם׃