Än Salomon Afalafal 7:18-29

¹⁸Iwe, a mürina pwe kopwe amwöchü ewe eu, nge kosap pöütala pwal ewe eu. Pun eman mi niueiti Kot esap achomonga an föför mi pwüng ika an föför mi ngau.

¹⁹Tipachem ellet a fokun tümwünü eman mi mirit lap seni engol samol ra tümwünü eu telinimw.

²⁰Ellet, esap fokun wor eman chon pwüng won fanüfan a chök föri mine a pwüng fansoun meinisin, nge esap wor an tipis.

²¹Kosap rongorong ngeni meinisin mine aramas ra apasa, pun a tongeni fis pwe kopwe rong än noum chon angang alalangauok.

²²Pun ka püsin silei pwe ka fen pwal alälängaua aramas fän chomong.

²³Ekei mettoch meinisin üa sotuni ren ai mirit. Üa fokun achocho ngeni ai üpwe tipachem, nge üsap tori.

²⁴Ifa usun än eman epwe tongeni küttafesifesi tipachem? A fokun, fokun alolol, pwe esap wor eman a tongeni tori.

²⁵Iwe, üa achocho ngeni ai üpwe silei o küttafichi mirit me masouen mettoch, üa pwal achocho ngeni ai üpwe silei ngauen umwes me feiengauan.

²⁶Iwe, üa küna pwe eman fefin mi atuputup a afeiengau seni mäla. Letipan a usun chök eu sär ika uk, nge pöün ra wewe ngeni selimächä mwän ra föfö ren. Eman mwän mi chen me ren Kot a tongeni sü seni neminewe, nge eman chon tipis epwe tup ren.

²⁷Iwe, ewe chon afalafal a apasa, “Nengeni, iei ükükün mine üa küna, lupwen üa achufengeni eu me eu kei mettoch, pwe üpwe silei unusan.

²⁸Üa chüen kükütta, nge üsamwo küna. Üa küna eman chök mwän mi mirit lein engeröü aramas, nge üsap küna eman fefin mi mirit leir.

²⁹Iei chök mine üa wesewesen küna: Kot a föri aramas pwe repwe wenechar, nge aramas ra püsin ekiekietä föför mi rikirik.”