Átus 27:23-39

²³Nah awna inakni mmanawa nuwohkiga nukipara amnihwiy. Amaka tiyegim ig awahkis pahapwi ahj numinhu. Igme ahj danuh nuthu ig awna nuthu:

²⁴“Kiyapwiye Pol, ka muwaka apis. Pis ka miyá. Amawka ku pis akki Uhokri ginetni ayhté gipetunat kiyapwiye Sésar. Nerras pihaptiyepwi kawnata miyá. Uhokri timá pipigyepkawni gidahankis. Ig apuriw madiktenek.” Hennewatbaki ig ahj awna nuthu.

²⁵Ka ba yi barukinama nikwe. Nah kamaxwene ta gipitit Uhokri. In kahayaknek wotwiy ku samah ig kuwis akki nuthu.

²⁶Henneme wixwiy sigihwe ta apitit pahá kewgihri.

²⁷Ayteke ariwnteke ini usuh padekwika apit mayg akiw. Usuh kuwis padekwika ahakwa parawhokwa adahan pina paka kuwis. Ayge nikwe pakwa mtipka nerras nawiy akaptena gihiyegapu igkis gipewkankis usuh kennesa udawnhan ta apitit pahá waxri.

²⁸Nikwe igkis iwé pahatra kuwawta akak siparad ay akigsa, igkis muhuksin unihkwat adahan igkis hiyepnes un gamini. Igkis uté gamini pina madikwa (20) iwanti. Ayteke eg nawiy wew aynessa akiw. Igkis muhukse ini kuwawta akiw. Igkis uté un gamini madikawku iwanti akak pohowku arawna (15).

²⁹Igkis hiyapni henne, igkis apisasew. Igkis awna: ―Kuri nawiy sigihwe apit tip. Uyay muhuksa nawiy ayokman. Igkis muhukse paxkamku nawiy ayokman abugiktak. Ayteke igkis piriyepkaw ta gitkis giwohkigakis adahan ahewkepka danuh kibentenwa.

³⁰Igkis gipewkankis bisikwiye amadgatak nawiy. Ayge nikwe igkis sarayh no umuh ahakwat un. Igkis awna wothu: ―Usuh muwaka muhukis nawiy ayokman nawenéwa akiw ay akigtak. Bawa igkis tipikwiyes gumadga umuh. Kameki igkis akkime wothu.

³¹Henneme ig kiyapwiye Pol awna ta git kiyapwiye Júlyu gikakkis gisuwtatapu. Giwn: ―Ku nerras awaykemni ka msakwa ay amadga nawiy, nikwe yis biyuke.

³²Igkis suwtat timapni henne, igkis ihuke no umuh akar. Egme umuh bohpika.

³³Kabeyweke ig kiyapwiye Pol awna ta gitkis madikte hiyeg: ―Uyay ax kamax unaktinwiy. Wixwiy kuwis mpiyasa pina paka ay abet mbeyne. Wixwiy kote axte.

³⁴Amawka wixwiy ax adahan wixwiy iwene udatniwiy mmanawa wixwiy ka miyá. Wixwiy danuh pahapwite. Usemnuwa ka matis.

³⁵Ig awna inakni henne, ig iwé aynessa bugut ig kiyé Uhokri giwtrikneswa madikte hiyeg. Ayteke ig kapusa ax.

³⁶Igkis hiyeg hiyapni henne, igkis kibowkehwe madikte. Igkis hawwata ax.

³⁷Usuh desah hiyeg akak ntewnehker madikwa akak puguhkuna arawna (276) ukebyi ayge gumadga nawiy.

³⁸Madikte hiyeg axe kabiha. Pisenwa gaxnikis igkis padeke iyakapti asemne akak fahhin asemne ta unihkwat kahadbe eg nawiy timis.

³⁹Pesante kamuw nerras nawiy akaptena gihiyegapu igkis ipeg tahhan pahá waxri henneme igkis mahikohpin. Igkis hiyá pahá apukrik ayge akak kahibrad. Ayge nikwe igkis awna: ―Uyay makarasa nawiy atere.