Zozuwe 4:8-17

⁸Izelayɛle nuiti ti naa ɠɛɛni, nii Zozuwe boni ti ma. Ti kɔtu puugɔ maazu felegɔ (12) zeɠeni Zuludɛn ziɛ laazuʋɛ, kɔtu ɠilagila Izelayɛle wolodai ɠilagilagi ʋɛ, eɠɛʋelei Ɠɔoɠɔ GALAGI dɛɛni la ga Zozuwe. Ti liini ga tiye ti-ʋuuzuʋɛ, ti ti la ná.

⁹Zozuwe kɔtu puugɔ maazu felegɔ (12) ɠiligaa loni Zuludɛn ziɛ laazuʋɛ, ʋɛ zalaɠa ɠula nuiti ti ɠɛni loni ná, niiti minazeɠe kesui ɠɛni ti ya. Kɔtui naati ta ná zaaɠaza.

¹⁰Zalaɠa ɠula nuiti ti ɠɛni minazeɠe kesui zeɠezu, ti yɛni loni Zuludɛn ziɛ laazuʋɛ, eyɛsu devei nii kpein Ɠɔoɠɔ GALAGI boni Zozuwe ma, nuɓusɛiti ti naati kpein kɛ. Zozuwe deveiti kpein kɛɛni, eɠɛʋelei Moize feeni la zea. Nuɓusɛiti ti ɠaazuvilɛni, ti leʋe.

¹¹Siɛgi zu nuɓusɛiti kpein ti leʋeni da ziɛ ʋolu ʋelei, Ɠɔoɠɔ GALAGI ná-minazeɠe kesui ta zalaɠa ɠula nuiti ti leʋeni, ti lo nuɓusɛiti untuɠɔ.

¹²Luɓɛn ná-bolodai, ta Gade ná-bolodai, ta Manasee ná-bolodai ɠilazuʋɛ, naati ta-zunuiti ti ɠɛni ziɛzu Izelayɛle nui zɔiti tuɠɔ, ti maaɠiliai ga kɔɔɠɔ zɔɔlaiti, eɠɛʋelei Moize ma levei veeni la ti ya.

¹³Kɔɔɠɔ nu waaʋuunaanigɔ (40 000) ɠɛɠala, ti maaɠiliai ga kɔɔɠɔ zɔɔlaiti, naati ka ti liini kɔɔɠɔ vai ma, Ɠɔoɠɔ GALAGI ɠaazu, Zeeliko nɛmɛi zu.

¹⁴Naama voloi, Ɠɔoɠɔ GALAGI Zozuwe wɔɔlɔni Izelayɛle nuiti gaazu, ti unfema veeni ná-kundiɠilai ʋɛ, eɠɛʋelei nɔ ti kɛɛni la Moize ʋɛ, sii ma voloi pɛ su.

¹⁵Ɠɔoɠɔ GALAGI ɠɛni Zozuwe ma:

¹⁶«Devei ve zalaɠa ɠula nuiti zea, ti zeele woo ɠesui zeɠezu, ti lɛ, ti ɠula Zuludɛn ziɛ laazuʋɛ.»

¹⁷Zozuwe naama levei veeni zalaɠa ɠula nuiti zea, é ɠɛ ti ma: «À lɛ, wo ɠula Zuludɛn ziɛ laazuʋɛ.»