Zone 8:20-30

²⁰Zama ni Zisu sari na zinama arini, sipu variva tumatumae si Asa pa Zelepade, tata koasa vasina pu ta veko sari na poata vinariponi. Ba loke tie tuqe vagia si Asa, sina lopu ele kamo sa Nana totoso.

²¹Meke zama pule la i Zisu si arini, “Kote taloa si Rau meke kote hatau gamu, meke kote mate pa mia sinea si gamu. Ke lopu kaqu boka la ia gamu sa vasina sapu korapa la ia Rau,” gua si Asa.

²²Meke vari zamai sari na koimata tadi na tie Ziu, “ ‘Lopu kote boka la ia gita sa vasina sapu korapa la ia Sa,’ gua. Hokara kote va mate pule nia Sia?” gua si arini.

²³Ba olaṉa se Zisu, “Gamu si mae gua panapeka, ba Arau si mae gua panaulu. Gamu si mae mia pa kasia popoa, ba Arau si lopu mae guaqu koasa kasia popoa.

²⁴Gua asa ke tozini gamu Rau sapu kote mate pa mia sinea si gamu. Kaqu mate pa mia sinea si gamu, be lopu va hinokarau gamu sapu ‘Arau, si Arau tugo,’ ” gua si Asa.

²⁵“Esei si Agoi?” gunia rini si Asa. Meke olaṉa se Zisu, “Ele tozini gamu tu Rau tatasana.

²⁶Soku tiṉitoṉa si boka zutuni gamu Rau. Ba Asa sapu garunuqu Rau si hinokara, meke sapu gua tozia Rau koasa kasia popoa, si gua mo sapu avosi Rau koa Sa.”

²⁷Ba lopu gilania rini sapu sa Tamana mo pa Maṉauru si zama gunia Zisu koa rini.

²⁸Ke zama si Asa, “Pana ovulu sage nia gamu sa Tuna na Tie, si kote tiqe gilania gamu sapu ‘Arau tugo si Asa’. Meke kote gilania tugo gamu sapu loketoṉa si tavetia Rau telequ, ba sapu va tumatumae Nau mo sa Tamaqu si zama nia Rau.

²⁹Meke Asa sapu garunuqu si Arau, si koa somana koa Rau. Meke lopu veko pani Au Sa sina taveti Rau doduru totoso gua sapu qetuni Sa.”

³⁰Sipu korapa zama Sa, si sokudi si va hinokaria si Asa.