IOANE 8:20-30

²⁰Unu hereva be Iesu ese moni ihabouna gabuna ai e gwaurai, Dubu Helaḡa lalonai e hahedibava negana ai. Bona tau ta ese se dabaia tao, badina be ena nega na do se kau.

²¹Iesu ese ma e hereva henidia, eto, Lau na dauha bainala. Umui ese ba tahugu, to emui kara dika ai vada ba mase. Bainala gabuna umui na basiola diba.

²²Bena Iuda taudia e henanadai heheni, eto, Ina ia sibona baine heala a? Una dainai e tomu “Bainala gabuna umui na basiola diba”, eiava?

²³Ia ma eto, Umui na henu amo, lau na atai amo; umui na tanobada taumui, a lau be dia tanobada taugu.

²⁴Taunabunai na hamaoromui, nato “Emui kara dika ai vada ba mase”. Badina be umui na basio abiabiraigu, emui kara dika ai vada ba mase.

²⁵Bena idia ese e nanadaia, eto, Oi na daika? Iesu eto, Na hereva henimuimu anina be dahaka?

²⁶Herevamui diaḡau do baina gwaurai, bona baina hahemaoro henimui danu. Ḡau tamona, e siaigu Diravana na momokani, bona iena amo na abi herevadia na tanobada na hamaorolaiamu.

²⁷Idia na lalodia asie parara ia ese Tamana e herevalaia.

²⁸Bena Iesu ma eto, Umui ese Taunimanima Natuna ba piua isi negana ai vada ba diba, lau na Ia. Kara ta danu sibogu asina karaiamu, a Tamagu ese e hadibagumu heḡereḡerena ai na herevamu.

²⁹E siaigu Diravana ese e bamogumu, ia ese se rakatanigu, sibogu asina nohomu; badina be iena ura karadia nega idoidiai na karamu.

³⁰Ini hereva e gwaurai negana ai hutuma ese e abiabiraia.