Yuhanna 20:13-31

¹³Malaa'ika'en ɓee mbii mo: —Banndam debbo, koɗum mboyataa? O jaabii ɓe: —Ɓe ittii Moobbo am ɗoo, mi anndaa fuu to ɓe ndesi ɗum.

¹⁴Nde o haalnoo kaa haala ndee, o yeeccitii, o yii Iisaa ana darii, kaa o annditaali ɗum.

¹⁵Iisaa wii mo: —Banndam debbo, koɗum mboyataa? Homo tewtataa? Mariyama miili golloowo nokku oo haaldata e mum, wii oon: —Giɗo, so aan itti mo ɗoo, haalanam ɗo ndesu-ɗaa mo, faa mi ɓamta mo.

¹⁶Iisaa wii mo: —Mariyama! O yeeccitii, o wii e ibaraninkoore: —Rabbunii! (Ɗum woni «Moobbo».)

¹⁷Iisaa wii mo: —Pati memam, sabi mi ŋabbitaali to Baabiraaɗo am tafon. Yaa to sakiraaɓe am, mbiyaa ɓe mi ŋabbitan to Baabiraaɗo am, Baabiraaɗo mon, Laamɗo am, Laamɗo mon.

¹⁸Mariyama mo Magdala martinoyi taalibaaɓe ɓee kumpa, wii ɓe: —Mi yii Moobbo oo. O haaltani ɓe ko Iisaa haalani mo koo fuu.

¹⁹Nde kiikiiɗe alan warnoo ndee, taalibaaɓe Iisaa coki baafal dow hoore mum'en nokku ɗo ɓe kawriti ɗoo, saabe kulol hooreeɓe Yahuudiyankooɓe. Nden Iisaa wari darii hakkunde maɓɓe, wii ɓe: —Onon e jam!

²⁰Nde o jowtunoo ɓe ndee, o holli ɓe nebbe juuɗe makko e wuttuldu makko. Taalibaaɓe ɓee ceyii nde njii Joomiraaɗo oo ndee.

²¹Nden Iisaa wii ɓe kasen: —Onon e jam! Hono no Baabiraaɗo neliri kam nii, neliran-mi on.

²²Nde o haalnoo ɗii haalaaji ndee, o fuufi e maɓɓe, o wii: —Njaɓɓee Ruuhu Ceniiɗo!

²³Mo njaafi-ɗon luutti mum, yaafaama ɗi, mo on njaafaaki luutti mum, yaafataake.

²⁴Kaa Tomaa noddirteeɗo Funeeru, gooto e sappo e ɗiɗon ɓee, walaano ɗon nde Iisaa ɓanngunoo hakkunde maɓɓe ndee.

²⁵Taalibaaɓe ɓee mbii mo: —Min njii Moobbo men! O jaabii ɓe: —So mi yiyaali batte tontanɗe ɗee e nebbe makko, mi waɗa feɗeendu am e majje, mi waɗa junngo am e wuttuldu makko, abada mi goonɗintaa.

²⁶Yontere wootere caggal mum, taalibaaɓe ɓee kawriti kasen. Tomaa ana wondi e maɓɓe. Baafe ɗee fuu ana cokii. Iisaa ɓanngi, darii hakkunde maɓɓe, wii: —Onon e jam!

²⁷O wii Tomaa: —Waddu ɗoo feɗeendu maa, ƴeew juuɗe am, waddu junngo maa, waɗu ngo e wuttuldu am. Sel sikkitaade, goonɗin tan.

²⁸Tomaa jaabii, wii mo: —Joomiraaɗo am, Laamɗo am.

²⁹Iisaa wii mo: —Saabe a yii kam ngoonɗinir-ɗaa. Ɓeen ɓe njiyaali kam so ngoonɗini, mbelii hoore.

³⁰Iisaa waɗii yeeso taalibaaɓe mum kaayɗe goɗɗe keewɗe ɗe mbinndaaka ley ndee dewtere.

³¹Ɗee ɗoo mbinndaama, yalla oɗon ngoonɗina Iisaa woni AlmasiihuƁii Laamɗo oo, yalla so on ngoonɗinii, oɗon keɓira nguurndam saabe makko.