Johanningundru 20:13-31

¹³Ja pudla nankangu jatana wonti: “Widlajai, minandru jidni jindrai?” Nani pudlangu jatana wonti: “Ngangau tanali Kapara ngakani manina warai, ja ngani ko, wodajeri nina kurana warai.”

¹⁴Nani jenia matja jatana, nandru najina karitjina wonti, Jesus terkanani najina wonti; ja nani ko nganana wonti Nau Jesus nganai.

¹⁵Jesus nankangu jatana wonti: “Widlajai, minandru jidni jindrai? Worana jundru wontiai?” Nandru ngundrana wonti, Nau gardenngamalkanietja nganai, ja nunkangu jatana wonti: “Kaparajai, jundru nina padakana warai? Jatau ngakangu woderi jundru nina kurano warai, ja ngato nina manila nganai.”

¹⁶Jesus nankangu jatana wonti: “Mariajai!” Nani karitjina wonti ja nunkangu jatana wonti: “Rabbuni!” jenia wondrai Ngujangujara jinkinietja.

¹⁷Jesus nankangu jatana wonti: “Ngana wata patau! ngangau ngani wata tarana warai ngakani Ngaperaia. Wapau ngatatani ngakanani ja tanangu jatau: Ngani tarai ngakani Ngaperani ja jurani Ngaperani, ja ngakani Godani ja jurani Godani.”

¹⁸Maria Magdalala wokarana wonti ja milini kaukaubana wonti nandru Kapara najina warai, ja Nau jenia nankangu jatana warai.

¹⁹Nunkangupini Godaia ditji kalkaurani mili pungani jela nganana wonti mana ngurunguruni, Juda kanandru japali; Jesus wokarana wonti ja tanangu terti terkana wonti, ja tanangu jatana wonti: “Murla jurangunto nganaiatimai!”

²⁰Ja Nau jenia matja jatana, Nau tanangu mara panki wondraterina wonti. Ja mili lnankina wonti, ngangau tanali nina najina wonti.

²¹Jesus nakaldra tanangu jatana wonti: “Murla jurangunto nganaiatimai! Worderu Ngapili ngana jinpanala, jeruja ngato jurana jinpala wapaia.”

²²Ja Nau jenia jatana, Nulu tanana pulkana wonti, ja tanangu jatana wonti: “Jaola kulikiri manianimai!

²³Jura tanangu madlentji kalinganani, tanali tanangu kalingani nganananto; ja jura tanangu madlentji ngamalkanani, tanali tanangu ngamalkani nganananto.”

²⁴Ja Thomas, marapratjana ja mandrundru kulno, nina tanali dikai Ditymus, wata tanangunto jela nganana wonti Jesus wokaranani.

²⁵Ja mili nguru nunkangu jatana wonti: “Ngaiani Kapara najina warai.” Nau tanangu jatana wonti: “Wata ngato mardatjinpiri nunkani najinani ja nunkangu mardatjinpirani ngana mara wutju kuraterinani, wata ngato jenia morlalu ngundranani.”

²⁶Ja ditji mara wora ja parkulani mili nunkani nakaldra jela nganana wonti, ja Thomas tanangunto. Jesus woka rana wonti mana ngurunguruni, ja tanangu terti terkana wonti ja jatana wonti: “Murla jurangunto nganaiatimai!”

²⁷Ngadani Nau Thomasangu jatana wonti: “Mara wutju jinkani jera kurana pararamai, ja mara ngakani najiamai, ja mara jinkani jera kurana pararamai, ja nina pankitirini ngakanani kurateriamai, ja wata gilbariamai, a-ai, morlalu ngundramai!”

²⁸Thomas kalabana wonti ja nunkangu jatana wonti; “Ngakani Kaparajai, ngakani Godajai!”

²⁹Jesus nunkangu jatana wonti: “Thomajai, jundru morlalu ngundrai; murlali pirna jenipara nganai, tana wata naji, nani ja morlalu ngundranani.”

³⁰Bakana malka morla marapu Jesujeli ngankana wonti milini, tanali tanana wata dakana warai nunkangupini jaurani.

³¹Tananapini matja dakana, jura morlalu ngundrananto, Jesus morlalu Christus nganai, Godaia Ngatamura; ja jura morlalu ngundrananto ja tepi ngamalkananto nunkani talani.