Jon 20:13-31

¹³Dir ga tiri Maria bia, “Awai, u susuah warah?” Ma Maria ga balu dir hoken: “Di te kap leh no nugu Watong ma iau pai nunure bia di te bul ie he.”

¹⁴Ing ga tange tar huo ga tahurus gaam nes Jisas ma ga tur taar kaia. Iesen pa ga nes kilam ie bia Jisas mon.

¹⁵Ma Jisas ga tange, “Awai, u susuah warah? Sige iakanong u sisilih utana?” Maria ga lik bia aie no ut na harbalaurai ta iakano matana daha, kaik gaam tange tana bia, “Maris, bia u te kap leh ie, hinawase iau bia u te bul ie iahe, iau nigi a kap leh ie.”

¹⁶Jisas ga tange tana, “Maria.” Maria ga talinganei ma gaam tange tana hoken: “Rabonai!” (a kukuraina bia ‘tena harausur’ tano nianga gar na Iudeia.)

¹⁷Io, Jisas ga tange bia, “Waak bia u palpalim iau kanong iau pai tapukus baak uram ho Mama. Iesen haan uras ta ira tasigu ma nu hinawase diet bia iau hanahaan um uram tano ragu Sus ma nora diet Sus mah, uram tano nugu God ma no udiet God mah.”

¹⁸Io, Maria nong me Magadalen ga haan tupas ira bulu na harausur ma kanin ra hinhinawas: “Iau te nes no Watong!” Ma ga hinawase diet bia Jisas gate tange tar kaiken ra linge tana.

¹⁹Ta iakano Sade ra matarahien ruruk ira bulu na harausur diet ga kis hurlungen taar narakoman tiga hala. Ma diet gate banus bat hadadas tar ira matanangas kanong diet ga burte ira Iudeia. Ma Jisas ga hanuat ga me tur harue diet gaam hamatien diet ma ga tange bia, “A malum ta muat!”

²⁰Ga tange tar kaiken ga hamines ira iruo lapara limana ma no binabatine ta diet. Ma ing ira bulu na harausur diet ga nes no Watong diet ga manga guama sakit.

²¹Tiga pakaan balin Jisas ga tange bia, “A malum ta muat! Hoing Mama gate tule iau, io, iau mah, iau tultule muat huo.”

²²Io, namur, ga manasung taar ta diet ma ga tange, “Muat hatur kawase leh no Halhaliana Tanuo.

²³Bia ing muat lik luban se ira magingin sakena gar tikai, io, God i te lik luban se ira uno magingin sakena. Ma bia ing muat pai lik luban se ira magingin sakena gar tikai, io, God pai le lik luban se ira uno magingin sakena.”

²⁴Tomaas, nong di kilam ie bia no Kasang, ma aie tikai ta ira sangahul ma iruo, pa ga kis tika taar ma ira bulu na harausur ing Jisas ga hanuat.

²⁵Io kaik, ira mes na bulu na harausur diet gaam hinawasei bia, “Mehet te nes no Watong!” Iesen ga tange ta diet hoken: “Bia ing iau pa ni nes ira matana nil ta ira iruo lapara limana ma bia pa ni bul no kaskas na limagu kaia, ma bia pa ni bul halaka no limagu tano binabatine, taie tun at pa ni nurnur.”

²⁶Ma ra liman ma itul a bung namur ira bulu na harausur diet ga kis taar baling narako tano hala, ma Tomaas tika ma diet. Ma ira matanangas diet ga banus bat hadadas tar iesen Jisas ga hanuat ma ga tur harue diet gaam hamatien diet bia, “A malum ta muat!”

²⁷Io, ga tange ta Tomaas hoken: “Bul no limaam kai. Nes ira lapara limagu. Tul se no limaam ma nu bul halakai tano binabatigu. Waak u lilik iriruo iesen nu nurnur!”

²⁸Kaik, Tomaas gaam tange tana, “Augu no nugu Watong ma no nugu God!”

²⁹Io, Jisas ga tange tana bia, “U te nurnur kanong u te nes iau. Iesen diet daan ing diet pai nes iau ma diet nurnur at.”

³⁰Io, Jisas ga gil ra haleng mes na dadas na hakilang ra matmataan ta ira uno bulu na harausur ing iau pai le pakat halaka ta iakan ra pakpakat.

³¹Iesen iau te pakat kaiken waing muat naga nurnur um bia Jisas aie at no Mesaia, no Nati God, ma bia muat na nurnur tana, io kaik, muat na hatur kawase no nilon tutun nong i kis tana.