Yowan 7:2-44

²Bong ye kene tani in lal kidi Yuda ke sungunu yo tiweta ye Mailang ke Badabada i, in iman potai oo.

³Le nga Yesu di taini tiwete panga nen, “Ai, ong i nga ole kuyege ni, inbe kulo pang Yudia, a be nen ngan di galium tikamata mos yo be kuyei nga.

⁴Yesoo, kumata tool sa lono be di tooltool lodi galanga ye nga, ngan ke be iyepe nen inbe iyei urata ki sollono, ngan tiap. Le lom be kuyei so nen nga, ngan kulo lo ong taum kupapos matam mallangana, a nen ngan di tooltool le imot tikamata so yo kuyei nga.”

⁵Yesu di taini tina ngan tiwete panga nen, yesoo di ngan titara lodi medana panga tiap.

⁶Motong la iwete pang di nen, “Lal nga le imot nga, ngan kiang, bong au i lal moolmool yo kiau i, in pombe tiao.

⁷Ngan di tooltool ke tana i nga, ngan o ke be lodi dook tiap pang, ngan tiap, bong ole lodi dook tiap pau, yesoo apapos di ye dada dook tiap kidi yo tiyei nga.

⁸Le be nen ngan ang kalo ye Mailang ke Badabada tani. E au i o alo tiap, yesoo lal moolmool kiau in pombe tiao.”

⁹Yesu iwete pang di nen a tilo, inbe ya sila iyepe Galili.

¹⁰Di taini tina ngan tilo pang ye mailang tani, motong la ya lapau itoo di a ilo. Ngan ipa mallangana tiap, bong ipa sollono le di tooltool tikamata tiap.

¹¹Ye kene tani ngan di tooltool maimai kidi Yuda yo tiyepe ye gaongo mai kidi tani in nga, ngan tisere Yesu. Le nga titortor ye a tiyei ne, “Ai, tool tani in ise lapau, too tiap?”

¹²Le di tooltool malala mai tina yo tigauagaua nga, ngan timangunngun a tiwetewete ye. Ngan di tooltool kapala tiyei ne, “Ya ni tool dook mata.” E di kapala ngan tiyei ne, “Tiap, ya ni illung di tooltool.”

¹³Bong di tooltool tina ngan ke be tiwetewete mallangana ye urata yo Yesu iyei, ngan tiap, yesoo titattadai di tooltool maimai kidi Yuda.

¹⁴Ye kene tani, in gaongo mai tani in imadit le ilo kataunu tiao, inbe Yesu ipa a ilo koongoo lono ke bareme mai ke sungunu a lo ipatomonai di tooltool.

¹⁵Ngan di Yuda tilongo betanga ki tina yo ipatomonai di tooltool ye nga, le nga titakrai ye patomonaingi ki. Inbe tiyei ne, “Ona, tool i iyepe touo ye ni ke patomonaingi pitiap. E nga ikaua lo galanga mai i ngai?”

¹⁶Motong la Yesu iwete pang di nen, “Betanga yo apatomonai ang ye nga, ngan betanga kiau au tauk tiap, bong ipa ye tool yo iwangau a asi i.

¹⁷Le kumata be sei tool itara lono moolmool be itoo Maro lono nga, ngan ole lon galanga nen, be betanga yo apatomonai ang ye nga, ngan ipa ye Maro, too akap ye au tauk lok la awete nga.

¹⁸Ngan tool yo ikap betanga ye ya taunu lono a iwete i, in lono be iyei nen a di tooltool tiyitmaki ye. Bong sei tool yo iyei urata be di tooltool tiyitmaka tool yo iwanga a isi in ene nga, ngan ya in betanga ki ngan moolmool, le dada yo ke kaplungunu ngan sa iken ye, nga tiap.

¹⁹Muku ngan Mose ikap ger ke Maro pang oo, bong ang ngan sa iparama ger tina, inbe itoo dook, nga tiap. E nga yelei a kakapye be karaumatau a amata nga?”

²⁰Motong la di tooltool malala mai tina ngan tiwete panga nen, “Ai, ong i o so sadi idiwidiwong! Ngan di sema tooltool tikapye be tiraumatong nga?”

²¹Le nga Yesu iwete pang di nen, “Au i ayeie mos atu ye lal kidi Yuda ke sungunu a kakamata, ngan la le ang le imot katakrai ye.

²²Bong muku ngan Mose ikap betanga pang ye dada ke koranga tiniidi nga, ngan le kakoro di natumim yo tamoto ngan tinidi ye lal kiidi Yuda ke sungunu lapau. (Ngan moolmool dada in nookoot imadit ye Mose a ise, nga tiap, bong in dada gurunu ipa ye di sasa kidi.)

²³Ngan nen le ang ngan kumata le lal kidi natumim ke koranga tinidi in be igoro lal kidi Yuda ke sungunu nga, ngan kapas le kakoro tinidi leu. Yesoo, lomim be katoo ger ke Maro yo iwete pang Mose a iwodo ngan dook. E nga yelei be katemim malmal pau ye tool atu yo akarata ye lal kidi Yuda ke sungunu a tinini dook mata mulu le imot, in nga?

²⁴Ang nga kin kakamata tool leu, inbe kawete be ya in tool dook mata, too dook tiap, ngan be! Bong be nen ngan kayepe a lomim kaua urata ye dada ki dook ngan, lo ngan be kawete nen kooti.”

²⁵Yesu iwetewete nen a imot, motong la di tooltool pattu ke Yerusalem timadit tina le tiwete nen, “Ai, i tool tani yo tikapye be tiraumate a imata i?

²⁶Kakamata, ya in iwetewete betanga ki mallangana la di tooltool matadi a tilongo ngan le tiwete touo kan betanga siap. Ngan di tooltool maimai nga lodi tar belei, i Kirisi tani yo Maro ipootoo be si ikap di tooltool ki a ipamulu di i, in naii, too?

²⁷Bong tool i, lod galanga ye malala ki, le ya in o Kirisi tiap. Yesoo, ye kene yo be Kirisi isi pombe ye in nga, ngan o ke be tool sa lon galanga ye malala ki yo ipa ye a isi i, in tiap.”

²⁸Ngan Yesu iyepepe koongoo lono ke bareme mai ke sungunu a ipatomonai di tooltool go, inbe isulu katkat a iwete nen, “Ai, ang nga lomim galanga yau, inbe lomim galanga ye malala kiau yo apa ye a asi i. Bong atoo au tauk lok la asi nga tiap, Tamak la iwangau a asi i. Inbe dada ki yo iyei nga, ngan moolmool le imot. Ang nga lomim galanga ye tiap,

²⁹bong au i lok galanga ye, yesoo au i amru amyepe, motong la iwangau a asi nga.”

³⁰Yesu iwete nen, le nga di Yuda tina ngan tilongo le katedi malmal a tikapye be tikauu a tiparama. Bong ngan le tool sa iparama tiap, yesoo lal ki in pombe tiao.

³¹Bong di tooltool yo tiyepe ye ni tani nga, ngan alunu la tilongo betanga ki le titara lodi medana panga nga. Le nga tiwete nen, “Ye kene yo be Kirisi isi ye in nga, ngan ole iyei gogo mos a iyei ben tarkilanga panga le illoso tool i tiap, too?”

³²Di Paresi tilongo yo di tooltool malala mai tina ngan tiwetewete a timangunngun ye so yo Yesu iyei nga, le nga tiye di tooltool maimai ke paroranga so pang Maro ngan tiwanga di bianga yo tikodokala bareme mai ke sungunu nga, ngan be la tikaua Yesu a tiparama.

³³Motong la Yesu iyei ne, “Lal yo be ayang tayepe ye nga, ngan mooloo tiap, lo ngan be amulu a alo pang ye Tamak yo iwangau a le asi i.

³⁴Ang nga ole kakaua urata mai ye serengau, bong o kakamatau tiap. Inbe ni yo be lo ayepe ye i, in o ke be kalo ye tiap.”

³⁵Le nga di Yuda tina ngan di tapdi tiwetewete nen, “Ai, tool i nga ole be ilo pang ngai a be takamata mulu tiap nga? Ole ila pang ye di diede kapala yo la tiyepe nin la nin kataunu ye di Girik nga, a be nen ngan la ipatomonai di Girik, too?

³⁶Ngan nookoot nga iwete nen, ‘Ole kakaua urata mai ye serengau, bong o kakamatau tiap. Inbe ni yo be lo ayepe ye i, in o ke be kalo ye tiap.’ Ngan betanga ki nga, ngan punu belei?”

³⁷Ngan ke yo Mailang ke Badabada tani be imot ye i, in tikamata ben lal maiyoko pang di. Le nga ye kene tani in Yesu imadit lo ikodo, inbe iwete le koonoo maimai nen, “Kumata sei tool be moorooku nga, ngan iman pang yau, a nen ngan man akap ran panga a iyin.

³⁸Yesoo, betanga yo iken ye Rau ke Maro ngan iwete nen, sei tool be itara lono medana pau nga, ngan ole ran yo ke yepongo dook mata i, in pombe lono a rongrongbe a idu.”

³⁹Yesu iwete nen nga, ngan ikatte betanga ye Maro Amunu Silene yo be pang dama ni nga, ngan ole iwanga si ipapon di tooltool yo titara lodi medana panga ngan lodi i. Bong ye kene tani in Maro iwanga Amunu Silene a isi tiao, yesoo iyeie Yesu ene le ilo ete ke be di tooltool tipayiti ye tiao lapau.

⁴⁰Di tooltool malala mai tina ngan tilongo yo Yesu iwete nen nga, le nga kapala tiwete nen, “Moolmool sa! Tool i Maro koonoo tani yo tanamu be isi, in naii.”

⁴¹Tiwete nen, ngan di diedi kapala tiyei ne, “Tiap! Ya in Kirisi, tool tani yo Maro ipootoo be si ipamulu di tooltool ki i.” Ngan tiwete nen, bong ngan di kapala tiyei ne, “Nga yelei, be Kirisi ole ipa ke Galili, too? Tiap yege!

⁴²Betanga yo iken ye Rau ke Maro ngan iwete be Kirisi in ole pombe ye rara ke Dawiti. Inbe ole tipasuiu Betlem ye malala yo muku ngan Dawiti iyepe ye i.”

⁴³Ngan tina di tooltool tiwete gogo betanga ye Yesu nen nga, le nga di tapdi tiparpoto le tiyepe ye budanga ru.

⁴⁴Ngan le di tooltool kapala lodi be tikaua Yesu a tiparama, bong ngan le tool sa itara baene ye tiap.