Yowan 19:9-32

⁹Le nga imulu a ilo rumu lono lo itoro Yesu mulu nen, “Ai, ong i kupa ke ngai?” Bong Yesu mala be iwete touo kan betanga siap.

¹⁰Motong la Pailot iwete panga nen, “Nga yelei a lom be kuraua betanga kiau tiap nga? Ong i o lom galanga yau tiap, too? Au i gurana kiau ke be amalum yong a kula, inbe gurana kiau ke be awete a tipatotong lo kai palasingi kaini.”

¹¹Pailot iwete nen, motong la Yesu iraua betanga ki nen, “Kumata be Maro yo iyepe ete ni, in ikap gurana pong tiap nga, ngan o taukam gurana yo ke be kudada pok nga. Ngan nen le tool yo itarau la baem i, in noonoo ki mai san le illos noonoo yo kiong nga.”

¹²Ngan Pailot ilongo tina yo Yesu iwete nen nga, le nga ikapye be isere dada yo be imalum panga a ila ye i. Bong ngan di Yuda tina ngan koodi tootoo panga nen, “Tool yo iwete be ya taunu in iyei tool kuto mai pang tana i le imot i, in koi ke Sisa. Le kumata be kumalum pang tool in a ila nga, ngan ong in tool ke Sisa tiap.”

¹³Pailot ilongo tina yo di Yuda tiwete nen nga, le nga lo ipamulu Yesu a isi tana, inbe ya in sila iwur ye kookoowoo ke tool ke karatanga betanga, ye ni atu yo tiweta ye Pat Somai Menmenngana i. (Ngan ni tani in ye di Ibru koodi ngan tiweta ye Gabata.)

¹⁴Ngan ye kene tani in lal kidi Yuda be tipare kaningi pang lal maiyoko kidi yo be lodi tut ye Paskimoolooningi Ke Maro ye i. Ngan ke ise a isolo kati kataunu kat ye so ben ke matana sangaul be ru oo. Motong la Pailot iwete pang di Yuda tina nen, “Kakamata, tool kuto mai tani yo matan kalang le imot i, in bi.”

¹⁵Bong ngan di Yuda tina koodi le mai nen, “Kakauu a ikoo! Kakauu a ikoo! Kupatota lo kai palasingi kaini a imata!” Ngan koodi nen, le nga Pailot iyei ne, “Nga yelei, be apatoto tool kuto mai yo matan kalang le imot i, in ilo kai palasingi kaini, too?” Motong la di tooltool maimai ke paroranga so pang Maro ngan tiraua betanga ki nen, “Am nga, tool sa mulu be iyei kuto mai a matan kalam, nga tiap, bong Sisa ya taleu.”

¹⁶Le nga Pailot imalum pang di a itara Yesu la di tooltool ki ke patokongo baedi be la tipatota lo kai palasingi kaini. Motong la di tooltool ke patokongo tina tikaua Yesu a tila.

¹⁷Ngan ya taunu ikooroo kai palasingi ki, inbe tiyege malala mai a tidu ke diki, motong la tila pang ye ni atu yo tiwete ene ye Tool Kutono Ruruana i. (Ngan ni tani in ye di Ibru koodi nga, ngan tiweta ye Golgata).

¹⁸Tila ye ni tani, motong la tipatota le ipa ye di tooltool ru lapau a tilo kai palasingi kaini nga. Ngan le yaru tituku ye madini tina yo ru nga, inbe Yesu in ituku ke kataunu.

¹⁹Motong la Pailot iwete le tiwodo betanga pattu ilo ye siri, inbe tirauu lo kai palasingi kutono ke Yesu. Ngan betanga tina ngan iwete nen: YESU KE NASARET, Tool Kuto Mai Yo Matan Kala Di Yuda Le Imot I.

²⁰Ngan Pailot iwete le betanga tina ngan tiwodo le tiportak ye di Ibru le di Latin le di Girik koodi. Ngan ye ni tani yo tipatoto Yesu lo kai palasingi kaini ye i, in potai pang ye malala mai lapau. Le di tooltool ke Yuda alunu la man tikamata betanga tina ngan a tikinkati nga.

²¹Motong la di tooltool maimai ke paroranga so pang Maro ngan tila la tiwete pang Pailot nen, “Ai, nga yelei a kuwodo betanga ngo be ‘Tool Kuto Yo Matan Kala Di Yuda Le Imot,’ in nga? Bong be nen ngan kuwodo nen, ‘Tool I Iwete Be Ya In Tool Kuto Mai Yo Matan Kala Di Yuda Le Imot I.’ ”

²²Tiwete nen, motong la Pailot iraua betanga kidi nen, “Dookoot, soo betanga yo awete a tiwodo koot nga, ngan tiwodo oo.”

²³Ye kene tani in di tooltool ke patokongo tina ngan tipatoto Yesu lo kai palasingi kaini a imot, motong la tikap lonloningi ki a tipoto le iken ye budanga pai. Inbe di pai timalimi di ye so tina. Inbe tikaua sousoungu mooloo ke Yesu in lapau a tikamata ngan sousoungu ki tani in tikap touo wam sa matana ki ki a tisaii ye tiap, bong wam ataleu la tisaii ye ke ete a ipa so le idu lopo i.

²⁴Le nga di tooltool ke patokongo tina ngan di tapdi tiwetewete nen, “Nga o ke be tasarraki tiap. Bong be nen ngan takatte madamada ngan ole madamada ipaposo sei tool yo be ikaua sousoungu i.” Ngan dada yo tiyeii i, in le iyeie betanga tina yo iken ye Rau ke Maro nga, ngan le kanono pombe moolmool. Ngan betanga tina ngan iwete nen, “Ole timalimi lonloningi kiau nga, a tikap pang di. Inbe ole tikatte madamada a be nen ngan madamada ipaposo tool yo be ikaua sousoungu mooloo kiau i.”  Le dada i la di tooltool ke patokongo tiyeii i.

²⁵Ngan di garup pattu yo tikodo potai pang ye kai palasingi ke Yesu nga, ngan Yesu tinana, iye Yesu tinana kase, inbe Madia yo Kelopas rimana i, in iye Madia san yo ke malala mai Makdala i.

²⁶Ye kene tani in Yesu be matana nen, ngan ikamata tinana, inbe galiunu yo lono panga mai san i, in ikodo potai ye nga. Motong la iwete pang tinana nen, “Tinak, natum tamoto nain.”

²⁷Motong la iwete pang galiunu tani in nen, “Garup in ong tinam.” Le ye kene in galiunu tani, in imadit tina le ikaua Madia a yaru tilo rumu ki lo iye tiyepe a matan kala.

²⁸Yesu in lon galanga nen, urata ki yo be iyei ngan imot oo, le nga iyei ne, “Au i moorookau.”  Ngan betanga yo iwete nga, ngan le iyei betanga tina yo iken ye Rau ke Maro nga, ngan le kanono pombe moolmool.

²⁹Ngan bor atu yo ooroo wain surunu malingene iken ye i, in iken potai lapau. Le nga tikaua so ben punpun a tisilia du ye ooroo wain surunu tani, inbe tisuiu ye pi kaini, motong la tisulmaii lo pang ye koonoo.

³⁰Yesu iyini touo wain malingene tina ngan kasin a imot, motong la iwete nen, “Imot oo.” Iwete nen le tina gurin maloi, inbe imooroon pattu leu le imata yege.

³¹Ngan ye ke tani in di Yuda be tipare kaningi pang lal maiyoko kidi ke sungunu yo be bongbongini ki ngan pombe i. Ngan nen le di Yuda lodi be tiyege di tooltool tina ngan bobodi sila tituku kai palasingi kaini ye lal kidi ke sungunu, nga tiap. Le nga tila pang ye Pailot be la titoru a be imalum nga, ngan la tiraukat di tooltool tol tina ngan kedi, a nen ngan be timmata nga, ngan tiyun bobodi isi tana.

³²Le nga tila titor ngan Pailot imalum, motong la di tooltool ke patokongo tina ngan tila la tiraukat tool tina ngan atu yo ituku kai palasingi kaini ke Yesu madini i, in kene. Motong la tila tiraukat san yo ituku ke Yesu madini san, in kene lapau.