1Yisasia katega neuno nago kanoa atenea kanalegati aulaga asu humai kano moge-maine.
2Mo neagegeya agaiaenema tokaeya nemaiya anagamoya mage huya havige-mainae “Hula-ve-nelina kanomoga ta hia kefo yamo alino aulaga asu hu-maine akaiafi itaafoamoa kefo ya haa yamo aulagamoa asu hu-mainefi?” huya havigae.
3Havigageno Yisasia mage hie “Mani kanomo itaafoamoa akaiaene kefo yama hia yamo alino aulaga asu ohunegi Anumaya Kotia tokiya yamaa alino kanale hu-tesigeya mukia veamoya agesaya yafe aulagamoa asu hu-maine.
4Menima yagema hanesiamaaene hu-natenea kanomo aliyana alige alige huta maisune. Hanima kisiana nago kanomoa aliyana oaligahie.
5Menima ma mopalema mainoa-maahena nagaya ma mopafina kani aye-halesua kano mainoe.” huno hu-maine.
6Mani kea huno nehuno avetuna mopafi heteno mopaene ayegakalifeno aulagama asu hu-mainea kanomo aulagale malegamaetene.
7Malegamaeteteno mage huno hapaiye “Kagaya Siloamu ti kotute mo sese huo. Ani li kotumo agia tagai kefina ‘Hu-tene.’ huya nehae. Ani li kotute kaugosa mo sese huteka eteka eno.” huno higeno mo sesema hiana aulagamoa kanale higeno neageno nomaalega emaine.
8Nomaalega egeya agaia kumate vayaene nayoma mani kanomoa monehema aukaya nehigeya neagaya veamoyaene mage huya hu-mainae “Ma kanoa nayoma felu maineno monehema aukaya nehia kanofi alu kanoe?” huya nehae.
9Nehageya nagoa veamoya “Ani kanoe.” nehageya nagoa veamoya “Alu kanogi vuohe ani augafa kanomo nehigi.” huya hageno agaia nehuno “Nagaya mani kano mainoe.” huno hu-maine.
10Nehigeya mukia veamoya havige-mainae “Hanaa hanageno kaulagamoa kanale hu-maine?” huya havigae.
11Havigageno mage hie “Nago kanoa, Yisasie kanomoa, hapa talo huteno alino naulagale maleteno ‘Siloamu ti kotutega kaugosa mo sese huo.’ huno higena naugosa mo sese hutena agoana aupaa naulaga age-mainoe.” huno nehie.
12Higeya veamoya “Ani kanoa hanate maine?” huya hageno “Nagaya oagenoe.” huno hu-maine.
13Aulagama asu hu-mainea kanomona Falasia vayatega avaleya umainae.
14Yisasia hapama ali gakalifeteno ani kanomo aulagama alino kanalema hu-teneana Sapati kanae.
15Falasia vayamoya nagoene mage huya havigae “Hanaa hanageno kaulagamoa kanale hu-maine?” huya hageno “Hapa ali gamaeno naulagale malegena mo sese hugeno naulagamoa kanale higena age-mainoe.” huno nehie.
16Higeya nagoa Falasia vayamoya mage hae “Ani kavama hia kanoa Sapati kanamona akave omalea yafe Anumaya Kotia ani kanoa hu-tegeno omene.” huya nehageya nagoa vayamoya mage hae “Kefo yamaa hanesia kanomoa ani tokiya avame yana talo ohileasine.” huya nehageya huteya tolefi ali fako hu-mainae.
17Naa huteya aulagama asu hu-mainea kanoa eteya havige-mainae “Ani kanoma kaulagama alino lamama hu-gatea kanohena naane hu-mainane?” huya hageno mage hie “Anumaya Koti aune kanoe.” nehie.
18Higeya Yuta vayamoya “Mani kanoa aulagamoa asu hu-maineanagi menia aulaga ago agegali hu-maine.” huyama haya kehena “Havige nehae.” huya haviya amakupina maleya amametitia ohuya aulagama asu hu-mainea kanomona itaafoamoganifeene ke hageya emainae.
19Aageya itaafoamoganife mage huya hana-vigae “Mani kanoa atenaa kanafi aulagamoa asu hu-mainea nafanetani maineano? Naa higeno menia aulaga neage?” huya hana-vigae.
20Hanavi-gageana itaafoamogania mage hae “Taagai nafane maineanagitaa taagaya ago age-mainoe. Aulagama asu hu-mainea nafanema atenoamaa ago age-mainoanagi aulagama age-maineamaa oagenoe. Tapiga aulaga alino kali hu-teneafe tamakaya agai havigeho. Alopa ve maineanagino agaia tamaha-paigahie.” huana nehae.
22Itaafoamogania Yuta vayafe koli huana mani kea hu-mainae. Yuta vayamoya kea hu-lokiya vaiya mage hu-mainae “Nagoa veamoya ‘Yisasina Anumaya Kotia taugafa ali-gatigahema hu-tenea kanoa ma maine.’ huya hisaya veamogamina agola mono nopitila amati-talegahune.” huya hu-mainaya kehe koli nehuana “Agaya alopa ve mainegi agai havigeho.” huana hu-mainae.
24Nagoene eteya aulagama asu hu-mainea kanohe ke hageno egeya mage hu-mainae “Kagaya Anumaya Koti aufi tamage-lafa huka kea huo. Tagaya agonana ani kanoa kefo kavaage nehia kanoe.” huya hae.
25Hageno kenonaamia mage huno hie “Nagaya oagenogi agaya kefo kava nehia nepi nohia nepi oagenogi nagokeya kanoama agoana hagotenoa naulagamoa asu humaineanagi menia naulaga agegali nehue.” huno hie.
26Higeya mage huya havigae “Naa hu-ga-tene? Hanaa huno kaulaga alino kali hu-ga-tene?” huya havige-mainae.
27Havigageno “Nagaya agoma tamaha-nepauvana tamakaya kenia nohaviye. Naa higetama etetama nahavi-negae? Tamakaienena agaiaene tokaeya nemaiya anagamogamipi maigahe nehao?” huno havige-maine.
28Higeya amakaya huya akaya ateya mage hae “Kagaikage Yisasienema tokaeka nemaina kanoa mainanagi tagaya Mosese kema nehavuna vayala anale haita mainone.
29Tagaya ago havimainone Anumaya Kotia Mosesena kea hapai-maineanagi ma kanomoa hanategati emainenoe tagaya agaila noagonane.” huya hae.
30Hageno aulagama asu hu-mainea kanomoa mage hie “Avo namayo neaiye. Tamakaya alu kegefa nehae. Tamakaya hanategatipiga emainea ke ohavinayanagi naulagama alino kali hu-na-tenea kano afa kanoa omaine. Anumaya Kotitegati emaine.
31Tagaya ago havimainone Anumaya Kotia kefo kava nehaya veamogami kea nohavie. Nagoa veamoya Anumaya Koti agi alisaga nehuya agaima haiya kavama hisaya veamogami kea Anumaya Kotia havigahie.
32Ehema fusa kanafima ma mopama taloma hu-malenelegatima emaineana nago atenea kanalegati aulaga asu hu-mainea kanoa alino kali hu-tene huya haya kea ohavinonane.
33Anumaya Kotima mani kanoma hu-tegenoma omeneleasina nago yana agaya ohisine.” huno hie.
34Higeya kenonaa mage hu-mainae “Kagaya kefo yapiti falote huka emainananagika tagaila menia hu-lave-ligahe nehano?” huya nehuya mono nopitila avaleya kumatega hagayu hu-talenae.
35Yisasia mono nopitima anati-talaya kea haviteno ani kanoa atiyeno mogeteno mage hie “Kagaya ikapinagati emainea kanoa vayamo atenea kanomofena havika kagupi maleka kametitia nehano?” huno havige.
36Havigegeno ani kanomoa mage hie “Ani kanoa tae? huka nehapi? Nagaila naha-paigena havina nagupi malena nametiti hano.” huno hie.
37Higeno Yisasia kenonaa mage hie “Kagaya agaila ago neagane. Ani kanoa menima kagaienema maineno kea kea nehaane.” huno hie.
38Higeno ani kanomoa mage huno hie “Ayenio Alamogae menia kagaifena havina nagupi malena nametiti nehue.” huno muse nehuno aiyafi aleya aye-maineno Yisasi aiyale ali-soso nehuno agi alisaga nehie.
39Yisasia mage hie “Nagaya ma mopale veamogami fako hu-ma-tesua yafe emainoe. Ali fako hisugeya amaulaga asu humai veamoya amaulaga agesageno amaulagama hanea veamoya amaulagama asu hugahie.” huno hie.
40Higeya nagoa avate maiya Falasia vayamoya anima hia kea nehaviya agaifena mage huya havigae “Tagaifena tamaulaga asu hu-maine huka nehano?” huya havigae.
41Havigageno Yisasia mage huno hie “Tamaulagamoa asuma hu-mainesina kefo yatamia omalesinagi tamakaya ‘Taulagamoa kali kali hu-maine.’ hutama haya yafe kefo yatamimoa hane.” huno hu-maine.
