Yoni 20

1

2

3

4

5

6

7

8

9

10

11

12

13

14

15

16

17

18

19

20

21

¹Sota yupa kola otinegeno Magatala kumate Maliaa natemaa Yisasina he-vai-tenaya komulega umaine. Uno mogeana komumo avayalema aiso hu-malenaya yafana ago alike-li-talenageno avayalela omalegeno moge-maine.

²Mogeteno eteno aiya-yeno Yisasima nehaiya kanoene Saimoni Pitaene mainaale eno mage huno hana-paiye “Alatimona komufitila ago aliya hanatepi atenae.” huno hana-paiye.

³Hana-paigeana haviteana Pitaene Yisasima nehaiya kanoene Yisasi komulega umainae.

⁴Anaiya-yeana ani komulega vaaleti Yisasima nehaiya kanomoa Pitana agaseno aupaa komule hagoteno umaine.

⁵Uteno mope hu-maineno ageana Yisasina aye-gasagi-tenaya kenaage hanegeno ageanagi anifinaga hai-ofalene.

⁶Hai-ofaleno mainegeno Saimoni Pitaa akave eayamo ani komufinaga aupaa hai-fale-maine. Haino mogeana nagoa aye-gasagi-tenaya kena neageno anutema ki-tenaya kenaene Yisasina augafalema aye-gasagi-tenaya kenaene nagopi tokaeno omalenegi aote kaiyaga aye-gafage-kino malenegeno haino moge-maine.

⁸Neagegeno Yisasima nehaiya kanomoa komulema hagoteno umainea kanoa anifinaga hai-faleno mo neageno komufitima he-ti-mainea yafe “Tamage nehie.” huno havino agupi maleno ametiti nehie.

⁹Ani kanafina mukia anagaamoya Anumaya Koti kema kae-malenaya kea havilama ohunae. Ani kemoa mage huno hu-maine “Yisasia fali-mainesifiti he-tigahie.” huya kae-malenaya kemona havilama ohunae.

¹⁰Anakaya Yisasienema tokaeana nemaia kanolatana anifinagati hati-laviana noanilega eteana umainae.

¹¹Maliaa ani yafakamo avayale he-tino maineno avi neateno ape huno ani komufinaga aulu heno neage.

¹²Ageana tole ensole kanolatana efeage kenaani failiana Yisasi augafama malenaya yate mopale mainae. Nago kanoa anuma malenalega maigeno nago kanoa aiyama malenalega maigeno hu-mainaageno anake-maine.

¹³Neanakegeana Maliafe mage hae “Amogae naa higeka avia neatane?” huana havigaageno Maliaa mage huno hie “Alaniamona aliyama mo malaya kumala oagenoa yafe avi neatoe.” huno hie.

¹⁴Nehuno mai-yahae huno ageana Yisasia he-ti-mainegeno ageanagi augosafina agelama ohune.

¹⁵Agelama ohigeno Yisasia mage hie “Amogae naa higeka avia neatane? Tafe ati neayane?” huno havigegeno Maliaa agesafinaga mage huno hie “Ma kanoa hoyalema yagai-mainea kano maine.” huno agesafinaga nehavino mage huno hie “Musekaa nehugi kagayama alika umainenukahena malenesana kumafena naha-paigena molino.” huno hie.

¹⁶Higeno Yisasia mage huno hie “Maliao.” huno higeno ani amoa maiyahae huno Yuta vayamogami kefiti mage huno hie “Laponae.” huno hie. Ani kemoa takai kefina “Hu-lave-nelina kanomogae.” huno hie.

¹⁷Higeno Yisasia mage hie “Nenafa mainelega ohainogi natafa ohuka nagananimogamina mage huka mo hama-paiyo ‘Nagaiene tamakaiene Nelafatega haigahe nehue. Nagai Anumaya Kotitegaene tamakai Anumaya Kotitegaene haigahe nehue.’ huka mo hama-paiyo.” huno hie.

¹⁸Higeno Magatala Maliaa viayamo Yisasienema tokaeya nemaiya anagaamogamina mage huno hama-paiye “Nagaya Alaniamona ago agoe.” huno nehuno “Nage mage huka hama-paiyo.” hunoma hapaiya kea hama-pai-maine.

¹⁹Yisasia fali-mainefitima he-ti-mainea Sotamona hanipinaga Yisasina alevenia (11) anagaamoya Yuta vayafena koliami huya fita kiya tokiyaage hu-maleteya nopinaga alitalu huya mainae. Mainageno Yisasia evayi huno amunoamifi me he-ti-maineno mage hie “Tamaipamoa falu nehinagetama maiho.” huno hama-paiye.

²⁰Hama-paiteno akaima ayapima nilima he-malenaya afuguene haopafina kevema aye-mainaya afuguene amave-neliye. Amave-ligeya alevenia (11) anagaamoya Alaamimona ageteya amakuamoa tusia muse hia kava hae.

²¹Hageno Yisasia nagoene mage hie “Tamaipamoa falu nehinagetama maiho. Nenafaa hu-na-tenea augafa kava huna nagaya tamakaila hu-nela-matoe.” huno hie.

²²Mani kema nehunoa haimula fu huno neamamino mage huno hie “Tamakaila Alu Aotage Avamula nelamamugi avaleho.

²³Nagoa veamogamina ai-geama-tetama kefo yaamima atale-ma-tesayana Anumaya Kotia ania huno ani kefo yaamia ai-geama-teno atale-ma-tegahie. Kefo yaamima ai-geama-tetama atale oamatesaya veamogamina Anumaya Kotia kefo yaamia ai-geama-teno atale oama-tegahie.” huno hama-paiye.

²⁴Yisasima amakaite evayima hu-mainea yupa alevenia (11) anagaafitila nago kanoa amakaienena omaine. Ani kanoa, Tomasie, nago agia Titimasie, tagai kefina kuyave nafane, ani kanoa omaine.

²⁵Omainegeya amakaya “Tagaya Alatimona age-mainone.” huya hane-paigenoa Tomasia mage hie “Yisasina nilima he-malenaya afuguma oagena, naginagoma nilimo kapima omalena haopafima keve honomuma aye-malenaya afugupima nayama ovainunahena mani kea alina nagupina malena nametitia ohugahue.” huno hie.

²⁶Sevenia (7) kana maiteya Yisasina alevenia (11) anagaamoya eteya ani nopi mainageno Tomasia amakaiene maine. Fita kiya tokiyaage hu-malayanagi Yisasia evayi huno amunoamifi me he-ti-maineno mage hie “Tamaipamoa falu nehinagetama maiho.” huno hie.

²⁷Tomasifena mage hie “Kaginagoa male me maleka nayapi nafugula ago. Kayana nahaopalema hanea nafugupina vaika ago. Ageteka tole kagesama havina kagesa neataleka nagaifena havika kagupi maleka kametiti huo.” huno hie.

²⁸Higeno Tomasia mage hie “Kagaya Alaniamogae Anumaya Kotinimoga mainane.” huno hie.

²⁹Higeno Yisasia mage hie “Kagaya agoma nagana yafe kagupina maleka kametitia nehananagi onagenesaya veanemoyama haviya amakupi maleya amametitima hisaya veamoya tusia muse hugahae.” huno hie.

³⁰Yisasia alevenia (11) anagaamogami amaulagafina alua alua tokiya avameyayaga hu-maineanagi ani yana mukia mani autamafina okaenoe.

³¹Okaenoanagi manima kae-maloa kea tamakaife huno Yisasia, Anumaya Kotina nafaneamoa, tagu tamema ali-gatisia kano maine hutamama havitama tamakupi maletama tamametitima hisaya yafe kae-malenoane. Ani yafe havitama tamakupi maletama tamametiti hisayana Yisasi agileti agola maige maige hisaya tamahaimula aligahae huna kae-malenoe.