Yohansi 19:2-13

²Noma makodi keki-rautu re rhi'a wutu-lai ida de rnairi pu'na-kiarit ruri pa rkow nana la Yesus o'tani, nhor nia'nama rohoga emeka ray-ray naniair plalahwani mak ungu pa Nnairia.

³Riy rla'a-rmai lia Yesus gaini ralamni na'nama rakot la riwra: “Mmuormiori plalahwa Ray Yahu'du ne!” Nhorwua demade rpahara klili-kdioria.

⁴Nhor nioma Pilatus nlergot owa'an pa nakot la riy mutlialawna re niwra: “Mimkek memna agodia hadi tiy miy totpena miat muemna, de a'g edon liernana riy di halli.”

⁵Noma Yesus Nlergot de Nnairia wutu-lai rururi-karkiarti me Nnairia naniairi plalahwa hor ungu. Na'nama Pilatus nakot la re niwra: “Mimkek la riy dee!”

⁶La'pa imam re o'tani-matni rora mak katiak reri Uplerlawna roma kreini re ramkeka Yesus noma rhaun pa riwra: “Mlia mpuairia la auwlakra, mlia mpuairia la auwlakra!” Mere Pilatus niwra: “Mia'ala pa orgahami mlia mpiairia la auwlakra hananni, yoma a'g edonna liernan riy di halli kuku' eti.”

⁷Riy Yahudi re rwahla Pilatus lirni riwra: “La'a a deulu-tatar mamni de riy mak emkare de rukum penan memna, yoma Eniwra E de Uplerlawna A'nani E'a.”

⁸La'pa Pilatus natlin nan rakot emkare, noma Pilatus yeher to'ama namta'ata.

⁹Noma nler owa'an la rialma, ne la'pa rodia Yesus pa rler la rialma, noma Pilatus natiana niwra: “O' di de makden meni id O'a?” Mere Yesus lir ta'a-waw ta' to'owa.

¹⁰Pede Pilatus natian owa'ana: “O' edonna Multier mai a'u? Totpa Muatgo, a'g ed mak kodi plolli pa agolin doin O'ola la' lira tunmu wawannu me a' niekpa kodi plolli pa wuairi O' la' auwlakra.”

¹¹Noma Yesus Nakota la Niwra: “La'pa Uplerlawna edonna Nala plola tiy o' pa omukmua A'u, de o' edonna muodi plolli mai A'u. Pede la'pa riy mak kal A lia o'a pa mukmua A'u, de hota e do'oni-halli narehi-nalawan tiy o'a.”

¹²La'pa Pilatus natlin nan maka Ha Nakota re, dewade nahak talan totpena na nolin doin Yesus, mere riy Yahudi re rhaunu-rhaun pa riwra: “La'pa tuna nod nian hade, de tuna edon nkar wiut lia Kaisar, hairi Roma rayni de! Riy maka kwet inonni la ray, de hota e' ed maka kora ray Kaisar kwahapra lia'ara.”

¹³La'pa Pilatus natlin nan lira re, dewade nodgiota Yesus la pliorni dewade Pilatus namtatan la liwangeni nhiudi-pniara, la'a gen miaka ra'atria watu, maka ha rweta la yawala Ibrani de riwra Gabata.