Yoãm 19:2-13

²Ha xonat xop te' mĩy 'ũkuxxax, yã mĩmyãm tox mãg hã' mĩy, tu mõktu Yeyox putox yĩmũ' xix, puyĩy xexka xop putuk, tu Yeyox pu mõ' xax tat topixxax 'ãta', puyĩy xexka xop putuk.

³Tu' nũn xonat, tu hãpkute'ex, hu: —'Ãmax. Xate Yoneo xop xat. Kaxĩy. Tu' yĩm hã Yeyox kix.

⁴Ha ta' mõg hãptopa 'ũxehet Pinat, tu Yoneo xop pu hãm'ãktux, hu: —'Ũxupax. 'Ãte tik yõg hãpkummuk mĩy'ax xak, pa' pipi 'ohnãg. 'A' kummuk'ah tihik. 'Ãte nõm hã' nũnnãp-tup, xayĩy yũmmũg 'ãte yõg hãpkummuk mĩy'ax pipi 'ohnãg, ti xũygãp-tup'ah. Kaxĩy.

⁵Ha ta' mõg Yeyox hãptopah, hap-tox yĩmũ' yũm 'ũkuxxax, yã mĩmyãm tox mãg hã' mĩy, ha mõ'tat topixxax 'ãta'. Ha Pinat te: —'Ũpẽnã' tihik! Kaxĩy.

⁶Ha 'ãmãnex xexka xop te hãm'ãktux ka'ok xix Yoneo xexka xop te', hu: —'Ãpu mĩpkupnix yĩmũp-tex pipkup hã, 'ãpu mĩpkupnix yĩmũp-tex pipkup hã. Kaxĩy. Ha Pinat te' xat, hu: —'Ãpu 'ũmõgã, nũy mĩpkupnix yĩmũp-tex pipkup hã. 'Ãte Yeyox yõg hãpkummuk mĩy'ax pipi 'ohnãg, hu' xũygãp-tup'ah. Kaxĩy.

⁷Pa Yoneo xop te hãm'ãktux yãnãn, hu: —'Ũkax'ãmi 'ũgmũ yõg xat'ax, tu nõm te' xat, pup-tex. Hamũn, tute hãm'ãktux, “Ũgmũn yã Topak-tok”. Kaxĩy.

⁸Ha Pinat te' xupak, tu' kuxa nõg nõy nã' mõg.

⁹Tu xe mĩptut hã mõ'nãhã', tu Yeyox pu hãm'ãktux, hu: —Hãm 'ũm tu 'ãnũn? Kaxĩy. Pa Yeyox te hãm'ãktux 'ohnãg.

¹⁰Ha Pinat te: —'Ok hãm'ãktux 'ohnãg? 'Ok xate' yũmmũg, 'ãte' xat, xa mõg, pa' xat hok, xa mõg hok. 'Ãte' xat, puxix xonat 'ãp-tex mĩpkupnix yĩmũ'. Kaxĩy.

¹¹Ha Yeyox te: —Topa te' xat, xa' xat, pa' xat hok, xa' xat 'ohnãg. Xate hãpkummuk mĩy, pa' nõy te hãpkummuk xexka mĩy, nõm te 'ãhak mõgãhã'. Kaxĩy.

¹²Ha Pinat te' xupak, hup-tup, nũy Yeyox xat pu mõg. Pa Yoneo xop te hãm'ãktux ka'ok, hu: —Paxpu Yeyox xat, pu mõg, hu ta Hõm xop xape 'ohnãg 'ãmũn. Hõm xop tep-tup nõg nõm te yãy xexka mĩy. Kaxĩy.

¹³Ha Pinat te' xupak, tu ta xe mõ'nãhã mĩptut hã, tu ta Yeyox mõgãhã hãptopah, tu pa te hãmyũmmũg xop yõg mĩmpe yĩmũ' yũm hãm tu 'ũxuxet'ax Mĩkax Pet Xax. Yã 'ãxet'ax nõy yã Gabatah, yã Yoneo xop yĩy'ax kopah.