Yohanis 4:6-14

⁶Nai ndia hambu oedolu esa nade, ‘oedolu Yakob’. Ledo namatetu boe ma Yesus asa losa ndia. Ana nameda manggu neme sila lalaꞌon mai, de Ana nanggatuuk hahae aok nai oedolu ndia. Boe ma Ndia ana mana tungga nala laꞌo ela Ndia mesa kana nai ndia, fo leu hasa nanaꞌak nai kota. Boe ma inak esa neme kota ndia mai, fo neu lemba oe nai oedolu ndia. Yesus noke ndia nae, “Kaꞌa aa. Au bisa oke oe nininuk fa do?”

⁹Tehuu inak ndia nggengge, huu hataholi Yahudi la taa lateme lakabubua lo hataholi Samaria. Boe ma ana natane nasafali Yesus nae, “Wei! Ama hataholi Yahudi do? Au ia hataholi Samaria. Taa sala ia do? Ama moke au oe fo minu do?”

¹⁰Yesus nafada nae, “Leoiak: mete ma kaꞌa bubuluk hata fo Manetualain nau fee basa hataholi la, ma bubuluk Au mana noke oe ia See, na, neu ko kaꞌa moke masafali oe neme Au mai. Boe ma Au fee oe maneni sodak.”

¹¹Inak ndia nae, “Ama samba dodolu oen taa. Ma oedolu ia, madema. Neme bee mai Ama hambu oe fo maneni sodak ndia? Do oe ndia nai bee bali?

¹²Neme bee mai Ama lena heni ai baꞌin Yakob! Ndia ndia ela oedolu ia neu ai. Ma ndia boe oo, ninu neme oedolu ia. Ndia ana nala, ma ndia sapi nala boe oo leondiak.”

¹³Yesus nataa nae, “Masanenedak baa! Huu hataholi mana ninu neme oedolu ia mai, neu ko ana maa mada bali.

¹⁴Tehuu hataholi mana ninu oe fo Au feek ndia, neu ko tana maa mada seluk bali. Huu oe fo Au feek ndia, sama leo oe matak esa fo nasambumbulak deak mai. Oe ndia, neni soda tetebes fo taa hambu namaketu.”