Yaahaya 4:6-14

⁶Ottuukhule waariwo nlipu wa Yaakhumpa. Yinsa ari wooshokhera nkatthi wa safwari, khulawa khwiikhala nshini wa nlipu. Zarettikhaniye payina ya atuhuri.

⁷Wakathi otthuupule khuta muukha wa Samariiya ottekha maati. Yinsa khumuuza yoori: “Kimeele maati vattitthiiru kinywe.”

⁸(Zarettikhaniye wakathi anakhiyoni awe eettiyeevo ositati wuuzanya etthu-yoojiwa.)

⁹Muukha otule wa Samariiya khumuuzela Yinsa yoori: “Weeyo oyaahuuti onikivekela maati miiyo, muukha wa Samariiya?” (Maana mayaahuuti na asamariiya khansiilana saana.)

¹⁰Yinsa khunjipu yoori: “Weeyo eriwaka waari ojuwa tthuvo ya Nluku na paani anuuvekelaaye maati, weeyo weetta onvekela na-ye eetta owinkha maati ohaayi.”

¹¹Muukha otule khuri: “Mbwana khuna etthu yoottekhana maati maana nlipu opu wiicha. Onttela opattha vayi maati aya apo ohaayi?

¹²Talili weeyo onwulweene zayita papeetthu Yaakhumpa? Ye aninkha nlipu otthuupo aari onywakaavo na aana awe na mompe zawe.”

¹³Yinsa khumuuza yoori: “Otule annywaaye maati apa onlawa eeyane nnyottha theenya,

¹⁴ila otule anttelaaye onywa maati kinttelaaye omwinkha khanlawa wiiyana nnyottha theenya. Olikha toowo, maati kinttelaaye owinkha anttela oretteya naattuuttu wa wiittikha maati a ohaayi wa mileele.”