Yohane 20:3-30

³Kuya Petiri ne imwanang'ina yungi waghenda mmango.

⁴Wose weli tsawatsuma, lekeni yula imwanang'ina yungi katsuma kubita Petiri, kalongola kupfika mmango.

⁵Kenama kasungulila mghati, tsakona sanda, lekeni ng'engile bae mghati.

⁶Kuya Simoni Petiri, iyakalile kuchughu kwake, kapfika kengila mmango. Kona isanda,

⁷na chighwanda ichohighwe mwitwi mwa Yesu, ng'achikalile bae hamwe ne isanda ila chipfingilisa na chikala chiliyeka.

⁸Kuya imwanang'ina yula yungi iyandusile kupfika mmango, pfipfila kengila mghati, kona, katoghola.

⁹Tsawang'ali ng'awoghamanya bae Ghamaandiko Maenzeluka ighalongile Yesu kobamighwa yatsilihuke.

¹⁰Kuya iwanang'ina woya ukaye.

¹¹Mariya tsakema kunze mwa imango kolila. Hayang'ali yolila, kenama kasungulila mghati mwe imango,

¹²kawona malaika weli iwapfalile ghamaghwanda matselu, wakala hanu halukalile lukuli lwa Yesu, yumwe tsakakala halikalile litwi, yungi kakala haghakalile ghamaghulu.

¹³Wamghutsa, “Mai, angu choulila choni?” Mariya kawedika, “Wamsola Imtwatsa wangu, na simanyile bae wamwikile kwani!”

¹⁴Kuya Mariya kahunduka kamwona Yesu kema hala, lekeni ng'amanyile ka tsakakala Yesu.

¹⁵Yesu kamghutsa, “Mai, angu choulila choni? Umbama nani?” Mariya kapfikitsa kolonga ne imbetetsi wa imghunda we imibiki, apfo kamlongela, “Imtwatsa, ka kumsola, nongele umwikile kwani, ng'ende nikamsole.”

¹⁶Yesu kamlongela, “Mariya!” Mariya kamuhundukila kamlongela kwa Chihebulaniya “Raboni!” Mana yake Imlangulitsi.

¹⁷Yesu kamlongela, “Leka kunikinda, kwaapfila sina ng'ende bae kwa Aba. Ghenda ukawalongele ndughu tsangu nene nakuya kwa Aba wangu na Aba wenu pfipfila, Imulungu wangu na Imulungu wenu.”

¹⁸Mariya Magidalena kaghenda kawalongela iwanang'ina ka kamwona Imtwatsa, kawalongela achila Yesu chayamlongele.

¹⁹Mihe ila mne litsuwa lya mwanduso lya juma, iwanang'ina hawetingane hamwe aku imibani ihindighwa kwa kuwapfuka iwakulu we Wayahudi, Yesu katsa, kema mghati mwawo, kawalongela, “Mkale tseghamba.”

²⁰Hayamalitse kulonga ghano, Yesu kawalangusa ghamoko ghake na lubapfu lwake. Iwanang'ina tsawadeng'elela hawamwonile Imtwatsa.

²¹Yesu kawalongela keli, “Mkale tseghamba. Ka Aba pfayanitumile nene, na nene nomtumani mwemwe.”

²²Kuya kawahumulila, kawalongela, “Bokeleni Ghumuhe Mwenzeluka.

²³Mng'awaleghusila nzambi iwanu, iwanu awo woleghusighwa nzambi, ka ng'amuwaleghusila nzambi, iwanu awo ng'awoleghusighwa nzambi bae.”

²⁴Mwanang'ina yumwe mne iwanang'ina kumi na weli, Tomasi, iyakemighwe Basa, ng'awile baho hayatsile Yesu.

²⁵Apfo iwanang'ina wangi wamlongela, “Tumwona Imtwatsa!” Lekeni Tomasi kawalongela, “Ka sitsona bae ng'opfu tsa misumari mne ghamoko ghake na kwika chidole changu mne ng'opfu atso, na kwika ghumoko ghwangu mlubapfu mwake, sitoghola bae.”

²⁶Haghabitile matsuwa manane iwanang'ina wetingana keli mng'anda, na Tomasi tsakakala nawo. Imibani tsaihindighwa, lekeni Yesu katsa, kema mghati mwawo, kawalongela, “Mkale tseghamba.”

²⁷Kuya Yesu kamlongela Tomasi, “Wike chidole chako hano, ulole ghamoko ghangu, kuya gholosa ghumoko ghwako ughwike mlubapfu mwangu. Leka kulema kutoghola, utoghole!”

²⁸Tomasi kamwidika, “Imtwatsa wangu na Imulungu wangu!”

²⁹Yesu kamlongela, “Kwotoghola kwaapfila kumbona? Wabweda awala iwotoghola bila kumbona!”

³⁰Yesu tsakatenda pfihulo pfingi hayakalile ne iwanang'ina wake, ila ng'apfandikighwe bae mne ichitabu chino.