San Juan 20:3-30

³Chiyru Bed cun stuby xpɨnnyqui zégacdeb ruu baaqui.

⁴Iroptedeb rlluuindeb zédeb, per stubybɨ rlluuinrub que Bed ax nidoote laab bdzɨnbɨ ruu baaqui.

⁵Chiy guzurlob bguiaab láani baaqui, ax gunáb de vend ni bduuibny, per quɨt biiutib.

⁶Chiyru bdzɨny Simóny Bed, ax biiub láani baaqui. Ziyza laab gunázacbɨ de vendqui.

⁷Ne gunázacbɨ lady ni bduuiby quia Jesús quɨt nágaatini rut nágaa de vendqui sino que duuibni chiy zuubni irɨnquɨ lat.

⁸Chiyru biiuza stuby xpɨnny ni bdzɨny gulo ruu baaqui, ax gunáb ni gucqui ax güeldilaazbɨ.

⁹Per zeczi gady gacbeetideb ni rnii lo xquiits Dios dec Jesús sbíi ibánny,

¹⁰chiyru biecqui de xpɨnnyqui lizdeb.

¹¹Per María biianacbɨ ruu baaqui ruunbɨ. Lalzi ni cayúunbɨ, ax guzurlob bguiaab láani baaqui.

¹²Chiy gunáb tiop de ánglɨ nacudeny lady nguits, zubdeny láani baaqui. Tubyny zub nez rut guut quia Jesús, stubyny zub nez rut guut de niiny.

¹³Chiy raipdeny laab: —Nan, ¿xínii ruunbiu? Laab cuaibbɨ: —Te pur azénedeb Dad Jesús, ne quɨt gántia calí güelduudebny.

¹⁴Gulull guniitisbɨ ziy deni bziecquilob ax gunáb Jesús zuguaany ruy. Per quɨt bambeetibny.

¹⁵Chiy gunabdiidxny laab: —¿Xínii ruunu, gunaa? ¿Tú rguíiliu? María blilob dec bniety ni rcualo huertquiy, ax raipbɨny: —Dad, belati laabiu zénebiuny, guniibiu nare calí nez güelduubiuny te chacáany.

¹⁶Chiyru raipy Jesús laab: —¡María! Laab bziecquilob ax raipbɨny cun diidx hebreo: —¡Raboni! (zelo diidxqui, Maistrɨ).

¹⁷Jesús raipny laab: —Bldá nare, te pur zeczi gady cháatia rut rbez Xtada. Per quegüe chiy guts de xpɨnnia dec cháa rut rbez Xtada ni racza Xtadtɨ, ne Xtioza ni náza Xtiostɨ.

¹⁸Chiyru güetixtee María Magdalena lo de xpɨnny dec agunáb Dad Jesús ne gudixteezacbɨ lodeb irate ni raipny laab.

¹⁹Lagac chitmingu gudxiqui, chi biiu guxin, deni adxidzɨɨts ruu yuu rut dxasaa de xpɨnny pur ni rdxibdeb de ni rnabee Israel, Jesús bliulony glaydeb, ax raipny laadeb: —Dios iguaadny laat guelnaldiulaaz.

²⁰Chi gulull guniiny ziy, bliuuny laadeb de naany ne cueláanny. Ax quesentiand rzaclaazdeb gunádeb Dad Jesús.

²¹Chiyru gubíi raipny laadeb stuby: —Dios iguaadny laat guelnaldiulaaz. Ne zec ni bxiaald Xtadnɨ Dios nare, ziyza rxiaalda laat.

²²Chiyru blduibny quiadeb, guniigany: —Guldezné Spíritu Sant.

²³Chi iniit xa xquel gac bniety perdón, ni gún cuendni anáb perdón. Ne ni quɨt gún cuendni quɨt nátib perdón.

²⁴Per Mally, ni raipzadeb Cuach ni náza tuby xpɨny Jesús, quɨt zuguaatib chi bliulo Jesús lo iraru de xpɨnny.

²⁵Parzi chi raipy iraru de xpɨny Jesús laab: —Agunán Dad Jesús. Chiy raipy Mally laadeb: —Quɨt chaldilaaztia axtisy bel quɨt iniáa de herid ni guc de laznaany pur de guɨ́chguiib, ne axtisy bel quɨt iquiznaa rut bguiz de guɨ́chguiibqui cun cueláanny rut guc herid.

²⁶Chi guc xon dxi, gubíi bdxasaa de xpɨny Jesús, per chiyru a né Mally. Ax dxidzɨɨts ruu yuu rut dxasaadeb, per Jesús bliulony glaydeb, raipny laadeb: —Dios iguaadny laat guelnaldiulaaz.

²⁷Chiy raipny Mally: —Bquiznaa rurén, bguiaa de naa. Ne dané noo, gudaan cueláania. Quɨtru runtioplaazu, güeldilaaz.

²⁸Chiyru raipy Mally laany: —¡Laabiuy Xtada ne Dios xtena!

²⁹Ax raipy Jesús laab: —Mally, anru areldilaazu pur ni agunoo nare. Per xíclabaa de ni reldilaaz nare, masquɨ gady iniádeb naa.

³⁰Zienziru de milagrɨ ni baany Jesús nez lo de xpɨnny ni quɨt cáti láani librɨré.