San Juan 20:3-30

³Abiꞌ brii Bëd con bén guin, zë reeman roꞌ baa guin.

⁴Grop reeman ruxüün zë reeman. Per bén guin mazri ruxüünman guial loj Bëd, abiꞌ yaloj laaman bidxin roꞌ baa guin.

⁵Dxel gudixlojman baguiaaman vend bidüüb Jesús, per ad guyutaman.

⁶Dxelri bidxin Simón Bëd, abiꞌ guyuman lën baa guin. Nëgajcaman baguiaa vend guin

⁷Baguiaa tëëman lajd bidüüb guijc Jesús, nadüüban nagaꞌn lood ren, ad nagaꞌtan tijbzi con vend guin.

⁸Dxel guyu bén bidxin roꞌ baa guin yaloj, baguiaaman ni goc, zianz bililadxaman,

⁹guial gocli ad bigniaꞌt reeman ni ca loj xtiidx Dios guial yaban Jesús loj ree bengüt.

¹⁰Dxel zia ree xbejn Jesús lidx reeman.

¹¹Per Li bayaꞌnman roꞌ baa guin cayoonman. Laꞌtgaj cayoonman gudixlojman lën baa guin,

¹²abiꞌ baguiaaman tioꞌp ree anjl, najcw reeman lajd naquich, zojb reeman lod goꞌt xcuerp Jesús, tijbaman lod goꞌt guijcaman, zatijbaman lod goꞌt guiaꞌman.

¹³Dxel gunabdiidx ree anjl guin lojman, rëb reeman: ―Na, ¿chexc zeel roonl? Badxiꞌman laan rëbaman: ―Guial zinë reeman xcuerp Dad Jesús, abiꞌ banczi guin bigsaꞌn reeman laaman.

¹⁴Guloxzi rëbaman zian, badxiꞌ lojman baguiaaman zaꞌ Jesús yagaj, per ad bayünbeetaman laaman.

¹⁵Dxel gunabdiidx Jesús lojman, rëbaman: ―Na, ¿chexc zeel roonl? ¿Chu raguiilil? Gunaladx Li, bén rajp lod yuꞌ ree yagnejxh guinan, abiꞌ rëbaman: ―Dad, bal lüj binë xcuerpaman, guna ban bigsaꞌnl laaman din chigxin laaman.

¹⁶Zianz rëb Jesús lojman: ―¡Li! Dxel badxiꞌ loj Li, rëbaman lojman con diidx hebreo: ¡Rabuni! ―rën guiëban Mextr.

¹⁷Rëb Jesús lojman: ―Ad guquiꞌl naj, din gadan yayaꞌ loj da Dadan. Per baguiaj biguiedx loj ree da bejnan guial yayaꞌ loj da Dadan bén naj gajc xDadidi, loj da Diosan bén naj gajc xDiosidi.

¹⁸Dxel wej María Magdalena bicojnman xbejn ree Dad Jesús guial baguiaaman laaman, bagojn tëëman laa reeman gra ni rëbaman lojman.

¹⁹Chidumingw zii gajc chi ma caxhin, badoꞌp ree xbejn Jesús, nayaaw roꞌ port yuꞌ reeman guial rdxeb reeman guxtis Israel ree. Dxel balüüloj Jesús galay reeman, rëbaman loj reeman: ―Yabeꞌcdxe Dios luxdoodi.

²⁰Chi ma gulox rëbaman zian, balüü yaaman loj reeman në cwëꞌlënman, abiꞌ laa reeman dád babaa reeman baguiaa reeman Dad Jesús.

²¹Dxel rëbaman loj reeman zatijb: ―Yabeꞌcdxe Dios luxdoodi. Ziꞌc guxhaalaman naj, ziangajc rxhialan lëjt.

²²Dxel balüjbaman guijc reeman, rëbaman: ―Gol gubajnnë xSprijt Dios.

²³Bén güündi perdon xtol, chiquied xtol reeman, guiáad bén ad züjntidi perdon xtol, yayaꞌnnë xtol reeman.

²⁴Tumajs, bén rniee reeman Cwajch, achut laaman zaꞌ chi balüüloj Jesús loj ree xbejnman.

²⁵Chi rëb reeman loj Tumajs: ―Ma baguiaan Dad Jesús. Dxel rëbaman: ―Bal id zuguian yaaman lod wëëz clav, abiꞌ bal id zaguꞌ da bacwënan lod wëëz clav guin, bal id zaguꞌ tëë yan cwëꞌlënman lod bidxeelguijdx, ad zaliladxtan.

²⁶Chi goc xhujn dxej, badxajg lasaꞌ ree xbejn Jesús zatijb, per dxel në Tumajs zaꞌnë laa reeman, nayaaw ruyu yuꞌ reeman. Per balüüloj Jesús galay reeman, rëbaman loj reeman: ―Yabeꞌcdxe Dios luxdoodi.

²⁷Dxel rëbaman loj Tumajs: ―Badxeꞌ xbacwënl guie, baguiaa ree yan, banee yaal guie badxeꞌn cwëꞌ lënan. Ad runawëëgril, bililadx.

²⁸Dxel rëb Tumajs lojman: ―¡Da Dadan, da Diosan!

²⁹Abiꞌ rëb Jesús lojman: ―Rliladxil guial ma baguiaal naj. Xiquilbaa ree bén rliladx, majs ad waguiaat reeman naj.

³⁰Zienri ree milagr been Jesús loj ree xbejnman, ni ad cwat ree loj guiꞌch guie.