Yabura 78:13-72

¹³A naxa baa ibɔɔ, a e ragiri, a ye rati alɔ bilixi.

¹⁴A naxa e raɲɛrɛ nuxui saabui ra yanyi ra, a naxa e raɲɛrɛ tɛ yanbɛ ra kɔɛ ra.

¹⁵A naxa fanye ibɔɔ gbengberenyi ma, a ye gbegbe ramini na kui alɔ dabonyi.

¹⁶A naxa ye ramini gɛmɛ longori ra, a lu alɔ xure.

¹⁷Kɔnɔ e mu gbilen e xa yunubi rabafe fɔxɔ ra, e fa Ala matandi gbengberenyi ma.

¹⁸E naxa Ala mato donsee maxɔrinfe ra.

¹⁹E naxa Ala mabere a falafe ra, «Ala nɔma won nabalode yi gbengberenyi kui?

²⁰A bara ye ramini fanye kui, kɔnɔ a nɔma taami fan fide e ma?»

²¹Ala to na mɛ, a naxa xɔnɔ ki fanyi ra, a fa tɛ radɛxɛ Yaxuba xa ɲama xili ma, a fa xɔnɔ Isirayila ɲama ma,

²²barima e mu nu laxi Ala ra, e mu e xaxili tixi a xa kisi ra.

²³Na kui Ala naxa yaamari fi koore naadɛe xa rabi,

²⁴«mana» xa goro e ma baloe ra, naxan findi koore taami ra.

²⁵Birin naxa na sɛnbɛmae xa taami don, e fa wasa na ra.

²⁶Ala naxa foye rafa keli sogetede biri, a foye rafa a sɛnbɛ ra keli yirefanyi ma,

²⁷naxan a niya xɔnie xa goro e ma a gbegbe ra alɔ xube nun baa dɛ mɛyɛnyi.

²⁸A naxa e gbegbe rayolon e yonkinde tagi, e xa kiri banxie rabilinyi ma.

²⁹E naxa na don han e wasa. Ala nu bara e hayi li.

³⁰Kɔnɔ hali e to nu bara donse sɔtɔ, a mu bu

³¹Ala xa xɔnɛ man naxa goro e ma, a Isirayila sɛnbɛmae nun e fonike faxa.

³²Hali na birin to raba, ɲama mu tin gbilende e xa yunubie fɔxɔ ra. E mu la Ala xa kaabanakoe ra.

³³Na kui a naxa e lu e xa fuyante kui, han e xa fe naxa raɲɔn gaaxui kui.

³⁴Fo faxɛ na dutun e ma, e fa so Ala fenfe, e e yɛtɛ ragbilen a ma,

³⁵e e ratu a Ala nan e sɛnbɛ ra, a Ala Xili Xungbe Kanyi nan e rakisima ra.

³⁶Kɔnɔ e nu wama a madaxufe e xa wɔyɛnyie nan na, e wule fala a bɛ e dɛ ra.

³⁷A xa fe mu nu na e bɔɲɛ ma, e mu nu birama a xa saatɛ fɔxɔ ra.

³⁸Kɔnɔ Ala to findi hinnɛnte ra, a naxa e xa yunubie xafari, a e ɲaxankatafe lu naa. A naxa diɲɛ e ma sanya wuyaxi, a mu tin a xa xɔnɛ birin xa mini.

³⁹A nu a kolon a bɛndɛ nan tun lanxi e ma, e ɲɛngi na dan, a mu gbilen sɔnɔn.

⁴⁰Sanmaya yeri e murutama a ma gbengberenyi ma, sanmaya yeri e a raxɔnɔma na yire maxare ma?

⁴¹E nu luma Ala mato ra, e nu ti Isirayila xa Sɛniyɛntɔɛ kanke.

⁴²E mu e ratu a sɛnbɛ ma. E nɛɛmu a ma a e rakisi e gerefae ma tɛmui naxɛ.

⁴³E nɛɛmu a xa tɔnxumae ma a naxee masen Misira bɔxi ma. E nɛɛmu a xa kaabanakoe ma a naxee raba Sowan fiili ma.

⁴⁴A naxa e xa Nili xure nun a salonyie findi wuli ra han e mu nɔ na ye minde.

⁴⁵A naxa xɛɛrie radin e ma e halakife ra. A naxa lanxansarimae malan mɛnni e kasarafe ra.

⁴⁶A naxa tugumie radin e xa xɛe ma, katoe naxa xɛ bogi don gbiki.

⁴⁷A naxa e xa wɛni sansie kana balabalanyi ra, a naxa e xa sikomoro bilie tuxunsan tunɛ xinbeli ra.

⁴⁸Balabalanyi naxa e xa xurusee faxa, galanyi naxa e xa gɔɔrɛe sɔntɔ.

⁴⁹A naxa a xa xɔnɛ xɔrɔxɔɛ ramini e ma, a bɔɲɛ naxa te e ma, han a naxa malekɛ kasaratie ragoro e xili ma.

⁵⁰A naxa a xa xɔnɛ fulun e ma, a mu e nii ratanga faxɛ ma, a fe xɔrɔxɔɛe radin e ma.

⁵¹A naxa Misira di singe birin faxa, e Hami bɔnsɔɛe fonike birin faxa.

⁵²Na nan a ra a naxa a xa ɲama ramini alɔ yɛxɛɛ gɔɔrɛ, a naxa e raɲɛrɛ alɔ xurusee gbengberenyi ma.

⁵³A naxa e xanin bɔɲɛsa kui gaaxui yo mu e sɔtɔ, kɔnɔ a naxa e yaxuie madula baa ma.

⁵⁴Na ki, a naxa e xanin a xa bɔxi sɛniyɛnxi ma, a xa geya a naxan sɔtɔ a sɛnbɛ ra.

⁵⁵A naxa bɔnsɔɛe keri e ya ra, a fa na bɔxie itaxun Isirayila bɔnsɔɛe ma kɛ ra, a mɛnni findi e sabatide ra.

⁵⁶Kɔnɔ e man naxa geregiri Ala Xili Xungbe Kanyi ma, e tondi a xa yaamarie rabatude.

⁵⁷E naxa e makuya Ala ra, e findi yanfante ra alɔ e benbae a rabaxi ki naxɛ, e lu alɔ xali kanaxi.

⁵⁸E naxa a raxɔnɔ e xa kuye batudee ra, e a ratɔɔnɛ e xa wuri masolixie ra.

⁵⁹Ala to na fe mɛ, a naxa xɔnɔ ki fanyi, a Isirayila rabolo.

⁶⁰A naxa a xa lingira rabɛɲin Silo, a nu naxan tixi mixie tagi.

⁶¹A naxa a xa saatɛ kankira lu yaxui sagoe, e kankan a xa nɔrɛ xa tɔnxuma ma.

⁶²A to xɔnɔ a xa ɲama Isirayila ma, a naxa a niya e xa sɔntɔ santidɛgɛma ra.

⁶³E xa fonikee naxa gan tɛ ra, e xa ginɛdimɛdie mu matɔxɔɛ sɔtɔ,

⁶⁴e xa sɛrɛxɛdubɛe naxa faxa santidɛgɛma ra, e xa kaaɲɛ ginɛe fan mu wa.

⁶⁵Marigi naxa keli alɔ mixi naxan kelixi xi xɔli ma, alɔ sɔɔri naxan nɔma a xa siisi ra.

⁶⁶A naxa a yaxuie bɔnbɔ, a e lu yaagi kui naxan mu ɲɔnma.

⁶⁷A naxa Yusufu bɔnsɔɛ rabɛɲin, a tondi Efirami bɔnsɔɛ sugandide.

⁶⁸A naxa Yuda bɔnsɔɛ sugandi, a nun Siyon geya naxan nu rafanxi a ma.

⁶⁹A naxa a xa hɔrɔmɔlingira ti alɔ yire itexi, alɔ a duniɲa tixi ki naxɛ, a xa bu xɔnkuye ra.

⁷⁰A naxa a xa konyi Dawuda sugandi, a a tongo gɔɔrɛ ya ma,

⁷¹a nu mɛɛnife yɛxɛɛ ma dɛnnaxɛ, alako a xa mɛɛni Ala xa ɲama ma, naxan findixi Yaxuba bɔnsɔɛ Isirayila ra.

⁷²Dawuda naxa mɛɛni e ma a bɔɲɛ fiixɛ ra, a e masuxu xaxilimaya ra.