Tingtoeng 78:13-72

¹³Tuitunli te a phih pah tih amih a kat puei vaengah tui khaw som bangla pai.

¹⁴Te phoeiah amih te khothaih ah cingmai neh khoyin puet te hmai vang neh a mawt.

¹⁵Khosoek ah lungpang rhoek te a hep pah tih tuidung bangla muep a tul.

¹⁶Thaelpang khuikah tuicip a thoeng sak tih tuiva tui bangla a hlawn.

¹⁷Tedae rhamrhae ah Khohni te a koek uh tih a taengah tholh ham koep a koei uh.

¹⁸Amih kah hinglu dongah caak a hoe uh te khaw a thinko neh Pathen ni a noemcai uh.

¹⁹Pathen taengah khaw, “Khosoek khuiah caboei phaih ham Pathen te coeng thai aya?

²⁰Lungpang a boh tih tui a phuet vaengah soklong la long coeng ke. A pilnam ham buh khaw a paek thai vetih maeh a tael pah venim?,” a ti uh tih a thui uh.

²¹BOEIPA loh a yaak vaengah a paan tih Jakob te hmai neh a kolh. Israel taengah khaw thintoek a khuen bal.

²²Pathen te tangnah uh pawt tih Boeipa kah khangnah dongah a pangtung uh pawt dongah ni.

²³Tedae a sokah khomong te a uen tih vaan thohkhaih rhoi te a ong.

²⁴Te dongah amih kah a cak ham manna a tlan sak tih amih te vaan cangpai a paek.

²⁵Hlang loh rhaelnu buh a caak tih lampu khaw amih ham kodam la a thak pah.

²⁶Vaan lamkah kanghawn a hlah tih a sarhi neh tuithim yilh khaw a thawn.

²⁷Te dongah maeh loh laipi bangla, vaa mul long khaw tuitunli kah laivin bangla amih soah tlan tih,

²⁸a dap kaepvai kah a lambong lakli ah a hlak pah.

²⁹Te dongah a caak uh tih muep cung uh. Amih kah ngaihlihnah vanbangla amih te a paek.

³⁰A ka dongah caak a paem uh pueng akhaw amamih kah hoehhamnah te kholong uh tak pawh.

³¹Te dongah Pathen thintoek amih taengla loh pai. Te vaengah amih khuikah thaomthathueng rhoek te a ngawn tih Israel cadongcaloe rhoek te a tulh.

³²Te boeih khui lamkah tholh uh bal pueng tih Boeipa kah khobaerhambae te tangnah uh pawh.

³³Te dongah amih kah khohnin loh a honghi la, a kum khaw lungmitnah neh thok.

³⁴Amih te a ngawn van daengah ni Boeipa te a tlap uh. Mael uh tih Pathen a toem uh.

³⁵Te daengah amih kah lungpang Pathen neh amih aka tlan Khohni Pathen te a ngaidam uh.

³⁶Tedae amah te a ka neh a hloih uh tih a lai neh a taengah laithae uh.

³⁷Amih kah lungbuei te khaw Boeipa taengah hong pawt tih a paipi te tangnah uh pawh.

³⁸A thinphoei loh thaesainah khaw a dawth tih amih te phae pawh. Te dongah a thintoek khaw puet a hnop tih a kosi khaw boeih sah pawh.

³⁹Amih te pumsa lah om tih yilh loh a khum phoeiah ha mael pawt te khaw a poek.

⁴⁰Khosoek ah Boeipa mat a koek uh vanbangla khopong ah Boeipa te a noih uh.

⁴¹Te dongah Pathen te koekthoek a noemcai uh tih Israel kah hlang Cim te a phen uh.

⁴²Rhal khui lamkah Boeipa kut loh amih a lat khohnin te poek uh pawh.

⁴³Amah kah miknoek te Egypt ah, kopoekrhai hno khaw Zoan hmuen ah a tueng sak.

⁴⁴A sokko khaw thii la a poeh sak tih tuicip kangna khaw o uh thai pawh.

⁴⁵Amih aka yok ham pil neh amih aka phae ham bukak khaw a hlah pah.

⁴⁶A cangthaih te phol taengla, a thaphu khaw kaisih taengla a paek pah.

⁴⁷Amih kah misur te rhael neh, a thaihae khaw tlansing neh a ngawn pah.

⁴⁸A rhamsa te rhael taengla, a boiva khaw rhaekhmai taengla a uup pah.

⁴⁹A thintoek thinsa kah a thinpom khaw, yoethae puencawn rhoi at kah kosi neh citcai te khaw amih taengah a sah.

⁵⁰A thintoek ham a hawn a saelh coeng. Amih kah hinglu te dueknah lamkah khaw hnaih pawh. Te dongah a hingnah te duektahaw taengla a paek pah.

⁵¹Egypt kah caming boeih neh Ham dap kah thahuem tanglue te a ngawn pah.

⁵²Tedae a pilnam te boiva bangla a khuen tih khosoek khuiah tuping bangla a hmaithawn.

⁵³Amih te ngaikhuek la a mawt tih rhih uh pawt dae a thunkha rhoek te tuitunli loh a khuk.

⁵⁴Te dongah amah kah bantang kut neh a men tlang cim khorhi la amih te a khuen.

⁵⁵Namtom rhoek te amih hmai lamkah a haek pah tih rho la rhilong te a suem pah. Te dongah Israel koca loh amih kah dap ah kho a sak uh.

⁵⁶Tedae Khohni Pathen te a noemcai uh tih a koek uh, a olphong khaw khoem uh pawh.

⁵⁷A napa rhoek bangla balkhong uh tih hnukpoh uh. Lii a pawl la poeh uh.

⁵⁸A hmuensang neh Boeipa a veet uh tih a mueidaep neh a thatlai sak uh.

⁵⁹Pathen loh a yaak vaengah lungoe tih Israel te rhep a hnawt.

⁶⁰Te dongah Shiloh pohmuen neh hlang lakli kah a khueh dap te a phap sut.

⁶¹A sarhi te tamna la, a thangpomnah khaw rhal kut khuila a paek pah.

⁶²A pilnam te cunghang taengla a tloeng tih a rho taengah khaw lungoe.

⁶³Tongpang rhoek te hmai loh a hlawp dongah oila rhoek thangthen uh pawh.

⁶⁴A khosoih rhoek te cunghang dongah cungku uh tih a nuhmai rhoek khaw rhap uh pawh.

⁶⁵Te vaengah Boeipa loh aka ip muelh bangla, misurtui neh aka tamhoe hlangrhalh bangla haenghang.

⁶⁶A rhal rhoek te tloep a tloek tih amih te kumhal kokhahnah la a khueh.

⁶⁷Joseph kah dap khaw a hnawt tih Ephraim kah mancai te a tuek tloe moenih.

⁶⁸Tedae a lungnah Zion tlang kah Judah mancai te a tuek.

⁶⁹Te dongah a rhokso te a sang la a sak tih kumhal due diklai bangla a suen.

⁷⁰A sal David te a tuek dongah boiva vongup lamkah a loh.

⁷¹A pilnam Jakob neh a rho Israel te luem puei ham ni anih te cacun hnuk lamkah a khuen.

⁷²Te dongah a thinko neh amih te a luem puei tih, a kut kah a lungcuei neh a mawt.