Yabura 78:1-22

¹Asafi xa lɔnni bɛɛti N ma ɲama, wo wo tuli mati n ma xaranyi ra, wo wo, tuli mati n ma masenyi ra.

²N misaali nde falama wo bɛ, n fe dangixie madɔxɔ,

³muxu fe naxee mɛ, muxu fe naxee kolon, muxu babae saabui ra.

⁴Muxu mu nee nɔxunma e bɔnsɔɛe ma, muxu Alatala xa matɔxɔɛ falama nɛ e xanbiratie bɛ, muxu a sɛnbɛ nun a xa kaabanakoe masenma nɛ e bɛ.

⁵Ala bara yaamarie masen Yaxuba bɛ, a sɛriyɛ sa Isirayila bɔxi kui, a won benbae yamari e xa na masen e xa die bɛ,

⁶alako di naxee fama tina, nee xa nɔ a kolonde, e fan xa a masen e gbe die bɛ e fama naxee baride.

⁷Na kui e fama e xa lanlanteya sade Ala ma, e mu nɛɛmuma a xa wali xungbee ma, e e ɲɔxɔ sama nɛ a xa yaamarie xɔn ma.

⁸E mu luma alɔ e benbae, naxee tuli xɔrɔxɔ, naxee findi matandilae ra, naxee tun mu rabɛxi, naxee xaxili mu tixi Ala keren na.

⁹Efiramikae xali kanyie naxa e kobe so gere ra,

¹⁰e mu Ala xa saatɛ rakamali, e mu bira a xa sɛriyɛ fɔxɔ ra.

¹¹E naxa nɛɛmu a xa wali magaaxuxie ra, a nun a xa kaabanakoe ra a naxee masen e bɛ.

¹²A kaabanako raba nɛ e benbae ya xɔri Misira, Sowan fiili ma.

¹³A naxa baa ibɔɔ, a e ragiri, a ye rati alɔ bilixi.

¹⁴A naxa e raɲɛrɛ nuxui saabui ra yanyi ra, a naxa e raɲɛrɛ tɛ yanbɛ ra kɔɛ ra.

¹⁵A naxa fanye ibɔɔ gbengberenyi ma, a ye gbegbe ramini na kui alɔ dabonyi.

¹⁶A naxa ye ramini gɛmɛ longori ra, a lu alɔ xure.

¹⁷Kɔnɔ e mu gbilen e xa yunubi rabafe fɔxɔ ra, e fa Ala matandi gbengberenyi ma.

¹⁸E naxa Ala mato donsee maxɔrinfe ra.

¹⁹E naxa Ala mabere a falafe ra, «Ala nɔma won nabalode yi gbengberenyi kui?

²⁰A bara ye ramini fanye kui, kɔnɔ a nɔma taami fan fide e ma?»

²¹Ala to na mɛ, a naxa xɔnɔ ki fanyi ra, a fa tɛ radɛxɛ Yaxuba xa ɲama xili ma, a fa xɔnɔ Isirayila ɲama ma,

²²barima e mu nu laxi Ala ra, e mu e xaxili tixi a xa kisi ra.