Yabura 31:2-24

²Alatala, n bara n xaxili ti i ra. I naxa tin n xa lu yaagi kui, i xa kiiti fanyi sa n ma.

³I xa i tuli mati n na, n nakisi. I xa lu n bɛ alɔ fanye, alɔ yire makantaxi alako n xa kisi.

⁴N ma sɛnbɛma nun n ma kantama nan i ra. I xa n xun ti kira fanyi xɔn i xili fanyi xa fe ra.

⁵N yaxuie bara yɛlɛ itala n ya ra, kɔnɔ i fama n natangade na ma.

⁶N bara n xaxili ti i ra. Alatala Nɔndi Marigi, i bara n nakisi.

⁷Kuye batui mu rafan n ma, n tan, nan n taxuma Alatala nan na.

⁸N sɛɛwama nɛ i xa hinnɛ xa fe ra, barima i bara n ma tɔɔrɛe to, n sondonyi na ɲaxankata, i na kolon.

⁹I mu n soxi n yaxuie yi ra, i bara n xɔrɛya.

¹⁰Alatala, hinnɛ n na, barima n na tɔɔrɔfe. N fate birin bara ba n ma.

¹¹N ma simaya na ɲɔnfe tɔɔrɛ kui. N ma duniɲɛigiri xɔrɔxɔ. N sɛnbɛ bara ɲɔn n ma yunubi xa fe ra. N fate bara kana

¹²n yaxuie xa fe ra. N bara yaagi n dɔxɔbooree xɔn ma. N booree, xa na mu a ra naxee n toma taa kui, e e gima nɛ n ma.

¹³E birin bara nɛɛmu n ma alɔ n ɲan bara faxa. N luxi alɔ se lɔɛxi.

¹⁴N bara n yaxuie xui mɛ. Gbaloe na n nabilinyi. E bara lan a ma e xa n faxa.

¹⁵Kɔnɔ n tan bara n taxu i ra, i tan n Marigi Alatala.

¹⁶N na i sagoe. N natanga n yaxuie ma naxee wama n ɲaxankatafe.

¹⁷I xa i xa konyi to, n nakisi i xa hinnɛ ra.

¹⁸Alatala, n na i xili, i naxa n lu yaagi kui. Ala xa mixi ɲaaxie rayaagi, Ala xa e rasabari faxɛ ra.

¹⁹Ala xa e xui radundu, barima yi wule falɛe e yɛtɛ igboma, e yo tinxintɔɛe ma.

²⁰I xa hinnɛ gbo, i naxan nagataxi i yaragaaxuie bɛ, naxee i xa kantari fenma.

²¹I bara e yigiya alako fe kobi rabae naxa e suxu. I bara e ratanga wule falɛe ma.

²²Alatala tantu, barima a bara hinnɛ n na n ma tɔɔrɛ kui.

²³N ma gaaxui kui, n nu bara a fala, «I bara i nɔxun n ma,» kɔnɔ i bara n ma maxandi suxu.

²⁴Danxaniyatɔɛe, wo xa Alatala xanu. Alatala togondiyatɔɛe rakisima nɛ, kɔnɔ a yɛtɛ igboe ɲaxankatama nɛ.