Kölfel 31:2-24

²Kopwe aü selingom ngeniei, kopwe müttir amanauaei. En kopwe ai lenien op usun eu föimw mi pöchökül, pwe kopwe amanauaei.

³Ewer, en ai achau, pwal imwei imwen maun. Kopwe emweniei o aiti ngeniei ewe al usun ka pwon.

⁴Kopwe tümwünüei seni ewe sär mi molotä fän itei, kopwe ti seniei feiengau.

⁵Üa atolonga manauei lepoum, kopwe amanauaei, ai Samol mi Lapalap, ewe Kot mi allükülük.

⁶Ka oput chokewe mi fel ngeni anümwäl mi lomotongau, nge ngang üa anomu ai apilükülük womw.

⁷Üpwe mwänek o pwapwa ren om tong ellet, pun ka küna ai riaföü o silei ai kewe weires.

⁸Kosap atolongaei lepöün chon oputaei, nge ka mwüt ngeniei pwe üpwe feila ia üa mochen feila ie.

⁹Ai Samol mi Lapalap, kopwe ümöümöch ngeniei, pun ngang üa nom lon riaföü. Mesei ra toputopula ren ai kechü, nge inisi a apwangapwangala.

¹⁰Manauei a mochomochola ren riaföün letipei, nge ierin manauei ren ai ngüngü. Ai pöchökül a kisikisila pokiten ai riaföü, pwal chüi mwo nge ra apwangapwangala.

¹¹Üa sachowun me ren ekewe chon oputaei meinisin o koput me ren chon ari. Üa och pisekin eniw me ren chon sileei, nge chokewe mi künaei me lon al ra sü seniei.

¹²Üa manlüküla me ren aramas usun eman mi mäla, üa usun eu sepi mi mök.

¹³Ewer, üa rongorong pwe chomong ra möngününgün. Lupwen ra raweei usun ar repwe angei manauei, niuokus watte a nom pwelin ünüki.

¹⁴Nge ngang üa apilükuk, ai Samol mi Lapalap, üa apasa, “En ai Kot.”

¹⁵Fansoun manauei a nom lepoum. Kopwe angasaeila seni ekewe chon oputaei me ekewe chon ariaföüüei.

¹⁶Kopwe netiu won noum chon angang fän kirikiröch o amanauaei lon om tong ellet.

¹⁷Kosap mwütätä pwe üpwe itengau, ai Samol mi Lapalap, pun üa kökköruk. Nge kopwe mwütätä pwe ekewe aramasangau repwe itengau, repwe fanafanala le feitiu lon lenien sotup.

¹⁸Kopwe afanafanalai ekewe chon chofana ra fos sikesik usun chon pwüng lon ar lamalamtekia me oput.

¹⁹Om kirikiröch a fokun somwola, ka eäni ngeni chokewe mi niuokusituk. Ka pwal kirikiröch ngeni chokewe mi eänuk lenien op me fän mesen aramas meinisin.

²⁰Ka nonom rer o aopeer seni än ekewe aramas rawangau. Ka tümwünüöchüür me lon leniom seni än ekewe chon oputeer kapasen efitikoko.

²¹Üpwe mwareiti ewe Samol mi Lapalap, pun a eäni tong ellet mi amwarar ngeniei, lupwen üa osupwang usun chon eu telinimw ra osupwang, lupwen sounfiu ra pwelifeili fän pisekin maun.

²²Üa ekieki lon ai niuokus pwe a asüeila seni fän mesan. Nge i a rongorong ai tüngor, lupwen üa siö ngeni pwe epwe alisiei.

²³Ämi nöün ewe Samol mi Lapalap chon pin meinisin, oupwe echeni i. Ewe Samol mi Lapalap a tümwünü chokewe mi allükülük, nge a liwiningau ngeni ekewe chon lamalamtekia won en me ükükün liwinin an föför.

²⁴Oupwe pöchökül o tipepwora, ämi meinisin mi apilükülükü ewe Samol mi Lapalap.