Yabura 18:30-47

³⁰Xa won birin na a ra, n mu gaaxuma gali xungbe gerede. N nɔma gere xɔrɔxɔɛ ra Ala xa mali saabui ra.

³¹Ala xa kira fan. Alatala xa masenyi tinxin. A mixie kantama naxee yigiya fenma a ra.

³²Ala gbɛtɛ mu na, fo Alatala. Sɛnbɛma mu na, fo won Marigi Ala.

³³Ala nan sɛnbɛ fima n ma, a n naɲɛrɛ sɛniyɛnyi kui.

³⁴A n malima n xa lu alɔ xeli, naxan fata ɲɛrɛde yire xɔrɔxɔɛ.

³⁵A bara n nafala gere kui, a n malima xali fanyi rawalide.

³⁶I bara n xun nakeli, i bara n tongo i xɔnyɛ i, i bara i ɲɛngi sa n xɔn ma. Na nan a niyaxi n dariyɛ sɔtɔxi,

³⁷n sɛnbɛ sɔtɔxi, alako n naxa bira.

³⁸N birama n yaxuie fɔxɔ ra han n e suxu. N mu gbilenma e fɔxɔ ra fo n nɔ e ra.

³⁹N nee rabirama nɛ han e mu nɔ kelide sɔnɔn, e fa lu n sanyi bun.

⁴⁰I sɛnbɛ soma n yi ra n ma gere kui. I n yaxuie ragoroma n bun ma,

⁴¹i a niya n xa nɔ e ra. N xɔnmixie mu wɔyɛnma sɔnɔn.

⁴²E mixie xilima e xa fa e mali, kɔnɔ mixi yo mu e rakisima. E Alatala xilima, kɔnɔ a fan mu e yaabima.

⁴³N e luxutama nɛ e fa lu alɔ xube, foye naxan xaninma. N e boronma alɔ bɛndɛ.

⁴⁴I bara n natanga ɲama murutaxi ma, i fa n findi sie xunyi ra. N mu naxan kolon na bara lu n bun ma.

⁴⁵E n xui rabatuma, xɔɲɛe wɔyɛn ɲɔxunmɛ falama n bɛ.

⁴⁶E mu suusama n ya ra. E minima e xa tɛtɛ makantaxi kui gaaxui ra.

⁴⁷Alatala sɛnbɛ mu ɲɔnma abadan. Tantui na n ma Kantama bɛ. Tantui na n Marigi Ala Marakisima bɛ.