Yabura 144:1-10

¹Dawuda xa bɛɛti Tantui na Alatala bɛ, naxan findixi n ma fanye ra, naxan n bɛlɛxɛ rawalima a xa gere kui,

²naxan findixi n xanuntenyi sɛnbɛma ra, naxan findixi n kantama nun n nakisima ra, naxan nɔma n yaxuie ra alako n xa kantari sɔtɔ.

³Alatala, munse na adama ra i to fa mɛɛnixi a ma? Munse na adama xa di ra i to fa i ɲɔxɔ saxi a xɔn ma?

⁴Adamadi luxi nɛ alɔ ɲɛngi foye, a xa simaya dangima nɛ alɔ niini dangima ki naxɛ.

⁵Alatala, i xa koore rabi i gorofe ra, i fa din geyae ra alako tuuri xa te.

⁶I xa seyamakɔnyi rabula yaxuie rayensenfe ra. Xalie woli alako e xa siga.

⁷I xa i bɛlɛxɛ itala kelife koore ma, alako i xa n nakisi, i xa n natanga n yaxuie ma alɔ mixi ratangama mɔrɔnyie ma ki naxɛ.

⁸N nakisi wule falɛe ma naxee wama n madaxufe.

⁹Ala, n bɛɛti nɛɛnɛ bama nɛ i bɛ n ma kɔra luuti fu daaxi xui ra.

¹⁰N i matɔxɔma nɛ, i tan naxan mangɛe xun nakelima, naxan i xa konyi Dawuda ratangama santidɛgɛma ɲaaxi ma.