Yabura 119:61-84

⁶¹Hali mixi ɲaaxie kankan n ma, n mu nɛɛmuma i xa sɛriyɛe ma.

⁶²Kɔɛ tagi, n kelima nɛ, n i matɔxɔ i xa kiiti tinxinxi xa fe ra.

⁶³I yaragaaxui birin findixi n ɲɛrɛboore nan na, nun naxee i sago rabatuma.

⁶⁴Alatala i xa xanunteya na duniɲa birin ma, n xaran i xa yaamarie ra.

⁶⁵Alatala, i bara fe fanyi raba n tan i xa konyi bɛ, alɔ i a laayidixi ki naxɛ.

⁶⁶N xaran fe tagi rasade nun fe kolonyi ra, barima n laxi i xa yaamarie ra.

⁶⁷N nu bara lɔɛ beemanu i xa n ma fe magoro, kɔnɔ yakɔsi fa n na i xa masenyi nan nabatufe.

⁶⁸I fan, i fe fanyi rabama, n xaran i xa yaamarie ra.

⁶⁹Hali yɛtɛ igboe wule sama n xun, n i xa yaamarie rabatuma nɛ n bɔɲɛ birin na.

⁷⁰E bɔɲɛ xɔrɔxɔ alɔ gɛmɛ, kɔnɔ i xa sɛriyɛ ɲɔxun n bɛ.

⁷¹N ma tɔɔrɛ bara n mali i xa yaamarie kolonfe ra.

⁷²I xa masenyi fan n bɛ xɛɛma nun gbeti ra.

⁷³I tan nan n daaxi, i tan nan n nafalaxi i xɔnyɛ ra. Fahaamui fi n ma i xa yaamarie kolonfe ra.

⁷⁴I yaragaaxuie xa sɛɛwa n tofe ra, barima n xaxili tixi i xa masenyi ra.

⁷⁵Alatala, n a kolon i xa kiiti tinxinxi ra, n a kolon i n ma fe magoroxi xanunteya nan ma.

⁷⁶Yandi, i xa xanunteya xa n madundu, alɔ i a laayidi n tan, i xa konyi bɛ ki naxɛ.

⁷⁷I xa kinikini n ma alako n xa kisi, barima i xa sɛriyɛ rafan n ma.

⁷⁸Yɛtɛ igboe xa yaagi sɔtɔ, barima n mu fe yo rabaxi e ra e n tɔɔrɔma naxan ma. N tan ɲɔxɔ sama i sago nan xɔn ma.

⁷⁹I yaragaaxuie xa gbilen n ma, a nun naxee i xa masenyi kolon.

⁸⁰N bɔɲɛ xa i xa yaamarie suxu, alako yaagi naxa fa dusu n xun na.

⁸¹A xɔli n ma n xa i xa kisi sɔtɔ, kɔnɔ n xaxili tixi i xa masenyi nan na.

⁸²N i xa laayidi rakamalixi mamɛfe. N a falama n bɔɲɛ kui, «I n madunduma mun tɛmui?»

⁸³N luxi alɔ kundi naxan na raxarafe, kɔnɔ n mu nɛɛmuma i xa yaamarie ra.

⁸⁴N xa mamɛ ti han mun tɛmui, beenun i xa n yaxuie ɲaxankata?