Y Salmo Sija 89:10-29

¹⁰Jago yumamag iya Rahab ya unfapidaso taegüije y uno ni y mapuno; jago chumalapon y enimigumo ni y canae y minetgotmo.

¹¹Y langet sija iyomo, yan yo tano locue iyomo: y tano yan y binilan sinajguanña ni y plinantamo sija.

¹²Y sanlago yan y sanjaya, jago fumatinas sija: Tabor yan Hermon manmagof ni y naanmo.

¹³Gaegue guiya jago y canae ni y matatnga: sa y canaemo metgot, ya taquilo y agapa na canaemo.

¹⁴Y tininas yan y juisio y plinantan tronumo: minaase yan minagajet manjajanao gui menan metamo.

¹⁵Mandichoso ayo na taotao y tumungo y magof na inagang: sa manmamocat gui mananan y matamo, O Jeova.

¹⁶Sa y naanmo nae manmamagof todot dia: yan y tininasmo nae munafangajulo.

¹⁷Sa jago y minalag y minetgotñija: yan pot y finaboresimo na injatsajulo y canggelonmame.

¹⁸Sa iyon Jeova y patangta: yan y rayta iyon Ayo na Santos guiya Israel.

¹⁹Ayonae unsangan gui guinigüife gui mañantosmo, ya ilegmo: guajo jupolo y inayuda gui jilo y uno ni y matatnga: yan junacajulo y uno na y maayeg gui taotao.

²⁰Jusoda si David na tentagojo; ya jupalae güe nu y santos na lañajo.

²¹Guiya y canaejo munafitme: yan y canaejoja locue munametgot güe:

²²Ya y enimigo taeinamot guiya güiya: ni y lajin y manaelaye ti umanalamen güe.

²³Sa bae juyute papa y contrarioña gui menaña yan jucastiga ayo sija y chumatlie güe.

²⁴Lao y minagajetto yan y minaasejo usaga guiya güiya: yan pot y naanjo na umanacajulo y canggelonña.

²⁵Ya bae jupolo y canaeña locue gui jalom tase, yan y agapa na canaeña gui jalom sadog.

²⁶Sa güiya umalog ni guajo: Jago y tatajo, Yuusso, yan y acho gui satbasionjo.

²⁷Bae jupolo güe locue pot finenana na finañagujo, mas taquiloña qui y ray sija gui tano.

²⁸Y minaasejo bae juadaje pot güiya para taejinecog, yan y tratujo ufitme guiya güiya.

²⁹Y semiyaña locue junasaga para ugaegue taejinecog, yan y tronuña taegüije y jaanen y langet.