Kap 89:10-29

¹⁰Gak da Isip dakon tapmɨm madepni tuwɨlek obɨsi aŋupbal agɨl. Aŋek tapmɨm madepgokon da uwalgo pabɨŋ yopgul.

¹¹Kundu gat mɨktɨm gat uŋun gak dakon gɨn. Gak da mɨktɨm gat yo morap uŋudon toŋ gat wasagɨl.

¹²Gak da not tetgɨn dakon mɨktɨm wasagɨl, ae saut tetgɨn dakon mɨktɨm kɨsi wasagɨl. Ɨleŋ Tabor gat ae Ɨleŋ Emon gat gak do kɨsɨk kɨsɨk aŋek kap yaŋ gamamal.

¹³Yawe, gak tapmɨmgo madepsi. Tapmɨmgo pɨdaŋbisi.

¹⁴Gak kɨla amɨn madep egek aŋpak kɨlegɨkon da amɨn kɨlani aŋek gen kokwin pi kɨlegɨsi asal. Gak mɨŋat amɨn do but dasi galak taŋ yomɨŋek gengo aŋteban aŋek tagɨsi paŋpulugosol.

¹⁵Amɨn gak gawak gamɨŋek kap yaŋ gamaŋ uŋun kɨsɨk kɨsɨk tagɨ ani. Yawe, amɨn morap gak da ɨŋamon teŋteŋɨgokon akwaŋ uŋun kɨsɨk kɨsɨk tagɨ ani.

¹⁶Uŋun amɨn aŋpakgo kɨlegɨ do gɨldat kɨnda kaloŋ uŋun do nandaŋek kɨsɨk kɨsɨk aŋek mango aŋkɨsaŋ.

¹⁷Gak kaloŋgɨn teban toknin, ae gak do kɨsɨk kɨsɨk madepsi nandamaŋ. Nin do nandaŋ yawok nimɨŋek paŋpulugaŋaki emaron teban tomaŋ.

¹⁸Asisi, Yawe uŋun pasɨknin egɨ nimɨsak. Gak Israel amɨn nin dakon Piŋkop Telagɨsi nin da kɨla amɨn madepnin nimgul.

¹⁹Kalɨpsigwan oman amɨn kabɨgo tagɨsi do dɨpmɨn yolɨgɨl, aŋek yaŋ yoyɨgɨl, “Nak da emat amɨn tagɨsi kɨnda kɨlɨ manjɨgɨm. Nak da mɨŋat amɨnyo da binapmon naŋ kɨla amɨn madep egɨpjak do abɨdagɨm. Aŋek kɨla amɨn madep dakon pelɨt kɨnda busuŋɨkon yɨpmaŋ ɨmgum.

²⁰Nak da oman amɨno Dewit kɨlɨ manjɨgɨm, aŋek yɨpbo ji dakon kɨla amɨn madep dagagɨt.

²¹Nak tapmɨmno yɨpbo uŋun gat toktogɨsi egɨpdamal. Nak dakon tapmɨm da aban teban tokdɨsak.

²²Uwalni da emaron arɨpmɨ dɨma abɨŋ yɨpni. Ae amɨn yokwi da arɨpmɨ dɨma abɨŋ yɨpni.

²³Nak da uwalni bamaŋ yomdɨsat, aŋek amɨn nandaba yokwi taŋ ɨmni amɨn dapbo kɨmotdaŋ.

²⁴Nak da but dasi galak taŋ ɨmɨŋ kɨmagek uŋun gat toktogɨsi egɨpdɨsat. Uwal gat emat wamni bɨsapmon nak da aŋpulugaŋapbo pabɨŋ yopdɨsak.

²⁵Nak da mɨktɨmni abo tap ɨdap Mediterenian uŋudon da wasaŋek kɨŋ pakbi madep Yupretis da arɨpmon kɨkdɨsak.

²⁶Aŋek Dewit da yaŋ nayɨkdɨsak, ‘Gak Datno ae Piŋkopno. Gak da tɨp tebano egek toktogɨsi aŋpulugosol.’

²⁷Nak da manjɨko monjɨno mibɨltogɨ dagosak, ae kɨla amɨn madep mibɨltogɨ dagaŋek mɨktɨmon kɨla amɨn madep morap yapmaŋ mudosak.

²⁸Nak toktogɨsi but dasi galak taŋ ɨmɨŋ kɨmotdɨsat. Aŋek uŋun gat saŋbek saŋbek aŋapdo saŋbek saŋbek uŋun toktok teban taŋ wɨgɨkdɨsak.

²⁹Toktogɨsi uŋun da kabɨkon kɨnda da kɨla amɨn madep egɨ egɨ akdɨsak. Kundu da toktogɨsi tosok uŋun da tɨlak, uŋun da kabɨkon kɨla amɨn madep kɨnda da toktogɨsi Israel amɨn kɨla akdɨsak.