Y Salmo Sija 73:12-28

¹²Sa estagüe ya sija y manaelaye; ya sija manmegae gui tano, sa taya chinatsagañija todo y jaane.

¹³Senmagajet na taebale y junagasgas y corasonjo: yan jufagase y canaejo gui guinasgas.

¹⁴Sa todo y inanaco y jaane chatsagayo, yan y castigojo cada ogaan.

¹⁵Yaguin jagasja jualog, bae jusangan este; este na jagasja judague y generasion: y famaguonmo.

¹⁶Yaguin jujaso jaftaemano na jutungo este, sumenmacat para guajo;

¹⁷Asta que jujalom gui sinantos na sagayan gui as Yuus; ya jujaso y uttimoñija.

¹⁸Magajet na jago pumolo sija gui palagse na sagayan; jago yumute sija papa gui jalom y yinilang.

¹⁹Sa jaftaemano na ufanyinilang, gui un rato! sija chadig malimachae ni y minaañao sija.

²⁰Taegüije güinife an magmata; taegüenaoja, O Señot, yaguin magmatajao, unchatlie y jechurañija.

²¹Sa y corasonjo estaba triste, ya matogchayo gui sumanjalom.

²²Na taegüije taejinasoyo, yan taetiningoyo: taegüijeyo y gâgâ gui menamo.

²³Masqueseaja gagaegueyo siempre guiya jago; jago mumantiene y agapa na canaejo.

²⁴Jago umesgaejonyo ni y consejumo, ya despues unresibeyo gui langet.

²⁵Ya jayeyo guajayo gui langet sino jagoja? ya taya gui jilo y tano güinaeyaco, na jagoja.

²⁶Y catneco yan y corasonjo malachae: lao si Yuus y minetgot y corasonjo, yan y güinajajo para taejinecog.

²⁷Sa, estagüe ya ayo sija y mañago guiya jago, na ufanmalingo: jago yumulang todo ayo sija y manjanao guiya jago para inábale.

²⁸Lao mauleg para guajo y juguaguato jijot gui as Yuus: sa jupolo y inangococo gui Señot Jeova, para usiña jusangan todo y chechomo.