Yɛbəc 8:4-32

⁴Alaŋ aŋɛ ŋanasaməsər mɔ, ŋaŋc-cam moloku mɔtɔt mofo fəp mmɛ ŋaŋc-cepər mɔ.

⁵Filip nwɛ ɛnator dare da Samari mɔ, ɛŋc-cam teta Krist, nwɛ Kanu kəyɛk-yɛk kəyɔnɛ Wəbɛ mɔ.

⁶Kənay k’afum kətəŋnɛ disrɛ ŋaŋc-cəŋkəl bel-bel tɔkɔ Filip oŋc-loku mɔ, ntɛ ŋaŋc-ne kɔ ŋac-nəŋk sɔ mɛgbɛkərɛ ma Kanu mmɛ ɔŋc-yɔ mɔ.

⁷Yɔŋk yɛlɛc yoŋc-kulɛ-kulɛ kəwur afum alarəm dəris aka dare dadɔkɔ. Anataməs atorər kɔ afum alarəm akɔ ŋanafi wɛcək mɔ.

⁸Kɔ pəbotu pɔpɔŋ pɛmbɛrɛ dare da Samari.

⁹Wərkun wəlɔma ɛnayi di pac-we kɔ Simɔŋ. Ɛnawon dare dadɔkɔ, pəyɔnɛ dure, pəc-sɔŋɛ aka Samari cusu kəwos, pəc-wenɛ sɔ fum wəpɔŋ.

¹⁰Afum fəp, kəyɛfɛ wanfɛt haŋ wəbeki ŋanaleləs kɔ, ŋac-loku: «Fum wəkawɛ ɔyɔnɛ fənɔntər fa Kanu, fənɔntər fəkɔ aŋwe ‹Fəpɔŋ› mɔ.»

¹¹Ŋanacəmɛ kɔ darəŋ, bawo ɛnawon kəwosəs ŋa cusu teta dureya dɔn.

¹²Mba ntɛ ŋanalaŋ moloku ma Filip, nwɛ ɛŋc-cam moloku mɔtɔt ma dɛbɛ da Kanu kɔ tewe ta Yesu Krist mɔ, k’aŋgbət arkun kɔ aran dəromun.

¹³Kɔ Simɔŋ nkɔn yati ɛlaŋ moloku ma Filip, k’owosɛ kəgbət dəromun. K’ɛŋcəmɛ Filip dəntɔf tɛm fəp. Ntɛ Simɔŋ ɛnəŋk mɛgbɛkərɛ kɔ mes mɛwɛy-wɛy ma Kanu mmɛ meŋc-yi mɔ, kɔ kusu kəwos kɔ.

¹⁴Ntɛ asom a Yesu ŋanayi Yerusalɛm kɔ ŋane a aka Samari ŋawosɛ toloku ta Kanu mɔ, kɔ ŋasom Piyɛr kɔ Saŋ kəkɔ di.

¹⁵Ntɛ Piyɛr kɔ Saŋ ŋantor dare da Samari mɔ, kɔ ŋantolanɛ ŋa ntɛ tɔŋsɔŋɛ ŋasɔtɔ Amera Ŋecempi ŋa Kanu mɔ,

¹⁶bawo haŋ tɛm tatɔkɔ Amera Ŋecempi ŋɛnatorər fɛ nwɛ o nwɛ kərɛsna dəndo. Mɛnɛ kəgbət dəromun gbəcərəm kɔ ŋanasɔtɔ tewe ta Yesu Krist.

¹⁷Awa Piyɛr kɔ Saŋ ŋandeŋər ŋa waca, kɔ ŋasɔtɔ Amera Ŋecempi ŋa Kanu.

¹⁸Ntɛ Simɔŋ ɛnanəŋk a kədeŋər kəca ka asom a Yesu gbəcərəm kənasɔŋ afum Amera Ŋecempi mɔ, k’ɛŋkɛrɛ ŋa pəsam pəc-loku:

¹⁹«Nəsɔŋ im ina sɔ kətam! Nwɛ o nwɛ indedeŋər waca mɔ, wəkayi pəsɔtɔ Amera Ŋecempi ŋa Kanu.»

²⁰Mba kɔ Piyɛr oloku kɔ: «Kanu kəsɔŋɛ məlɛcɛ kɔ pəsam pam, bawo məŋcɛm-cɛmnɛ kəsɔtɛnɛ pi kəpocɛ ka Kanu!

²¹Məna məyɔ fɛ daka, məyɔ fɛ tofokəl nnɔ tes tantɛ disrɛ, bawo abəkəc ŋam ŋolomp fɛ fɔr ya Kanu kiriŋ.

²²Məluksərnɛ Wəbɛ Kanu, məlɛtsɛnɛ kɔ, mətola kɔ ntɛ tɔŋsɔŋɛ pəŋaŋnɛn’ am mɛcɛm-cɛmnɛ mɛlɛc ma abəkəc ŋam mɔ, kɔ Kanu kəwosɛ ti-ɛ.

²³Bawo inəŋk fɔ mɛcɛm-cɛmnɛ mɛlɛc ma kəraca mɛntam əm, kɔ kətɔ-lomp kəsekət’ əm.»

²⁴Kɔ Simɔŋ oloku kɔ: «Nətolan’ em Kanu Wəbɛ, ntɛ tɔŋsɔŋɛ mamɛ nəloku mɔ ta tɔlɔm o tɔlɔm tɔsɔt’ em.»

²⁵Piyer kɔ Saŋ ŋaŋcam ntɛ ŋananəŋk kɔ tɔkɔ ŋanane teta Yesu mɔ, kɔ ŋalukus Yerusalɛm, ŋac-cam toloku tɔtɔt ta Kanu sədare səlarəm sa Samari.

²⁶Mɛlɛkɛ ma Wəbɛ mɔlɔma mender nde Filip eyi mɔ moc-loku: «Məkɔ ntende kəca-kətɔt, məsolnɛ dɔpɔ deyer-yer ndɛ dɛŋyɛfɛ Yerusalɛm doc-tor Kasa mɔ.»

²⁷Kɔ Filip ɛyɛfɛ katin, k’ɛntas. Wərkun wəpɔŋ wəka Ecopi ɛnayi pabanɛ kɔ. Nkɔn ɛnatɔmpər kəcəmbər-cəmbər ka daka da Kandas, wəbera wəka atɔf ŋa Ecopi fəp. Ɛnader Yerusalɛm kədekor-koru Kanu.

²⁸Kəlukus k’ɛŋc-ndɛ ndɔrɔn pəndɛ pɛyɛksɛnɛ pɔn kəroŋ, pəc-karaŋ pəpɔŋ buk ba aŋnabi Esayi.

²⁹Kɔ Amera ŋa Kanu ŋoloku Filip: «Məcɔŋnɛ məlɔtərnɛ pəyɛksɛnɛ mpɛ.»

³⁰Kɔ Filip ɛyɛksɛ kəkɔ dəndo, k’ene wəka Ecopi nwɛ pəc-karaŋ buk ba aŋnabi Esayi. K’eyif kɔ: «Məŋcərɛ ntɛ məyi kəkaraŋ mɔ ba?»

³¹Kɔ wəEcopi nwɛ oloku Filip: «Cəke c’ intam ti kəcərɛ-ɛ, k’intɔyɔ nwɛ ɛntəks’ em mɔ?» K’oloku Filip a pəpɛsɛ pəndɛ kɔ kəsək pɛyɛksɛnɛ pɔn kəroŋ.

³²Moloku ma kitabu mmɛ ɛŋc-karaŋ mɔ mɛnayɔnɛ mmɛ: «K’aŋkekərɛ kɔ dəkədif pəmɔ aŋkesiya. Pəmɔ aŋkesiya ŋowut nŋɛ ŋɔntɔkulɛ-kulɛ wəfon wəka ŋi dəntɔf mɔ, ɛnawani fɛ kusu.