Yɛbəc 1:11-23

¹¹kɔ moloku: «Afum a Kalile, ta ake tɔ nəŋcəmɛnɛ kəmɔmən kɔm-ɛ? Yesu, wəkakɔ ɛmpɛ dəkɔm fɔr yonu kiriŋ mɔ, tantɛ nəŋgbətnɛ kɔ pəc-pɛ mɔ, t’ endesɔ-der.»

¹²K’asom a Yesu ŋalukus Yerusalɛm kəyɛfɛ nde tɔrɔ tɔkɔ aŋwe «Tɔrɔ ta tɔk ya Olif», mpɛ pɔntɔbɔlɛnɛ dare mɔ. Pəbol-bolu mpɛ dinɛ da aSuyif doŋc-wosɛ fum kəkɔt pabəp dɔsɔk da kəŋesəm mɔ.

¹³Ntɛ ŋambɛrɛ dare mɔ, kɔ ŋampɛ dukəlɔ da kəroŋ nde ŋaŋc-ndɛ mɔ. Afum aŋɛ ŋanayi di mɔ: Piyɛr, Saŋ, Sak kɔ Andəre, Filip kɔ Tɔma, Bartelemy kɔ Matiye, Sak wan ka Alfe, Simɔŋ wəsaŋka-saŋka kɔ Yudas wan ka Sak.

¹⁴Fəp faŋan kəfo kin kɔ ŋaŋc-kɔ kətola Kanu tɛm o tɛm kɔ aran, kəbəp ka awɛŋc a Yesu, kɔ iya kɔn Mari.

¹⁵Dɔsɔk dɔlɔma mata mamɔkɔ disrɛ, afum aŋɛ ŋanayi di mɔ, ŋaŋc-kɔ haŋ afum tasar tin kɔ wəco mɛrəŋ (120). Kɔ Piyɛr ɛyɛfɛ awɛŋc ɔn dacɔ, k’oloku:

¹⁶«Awɛŋc im aŋa: Pənamar yecicəs ya dəkitabu yɛlarɛ. Ti disrɛ Amera Ŋecempi ŋa Kanu nŋɛ Dawuda ɛnanuŋkɛnɛ kəloku teta Yudas, nwɛ ɛnasolɛ aŋɛ ŋanasumpər Yesu mɔ.

¹⁷Analɔm Yudas su dacɔ, səpaŋnɛ yɛbəc yin yayi.

¹⁸Ntɛ elip kəsɔtɔnɛ abɔf pəsam pa kiciya kɔn mɔ, k’ɛŋgbɛknɛ, k’ɛntɛmpɛnɛ tekiriŋ k’ɛwalinɛ kor kɔ tɔsɔŋɛ sumpa sɔn fəp kəsaməsər dəntɔf.

¹⁹Tes tɔ ntɛ aka Yerusalɛm fəp ŋanacərɛ mɔ, it’ ɛnasɔŋɛ pawe dalɛ dadɔkɔ ‹Hakeldama›, itɔ tatɔkɔ kusu kəŋan ‹Dalɛ da mecir›.

²⁰Bawo anacic nde Yabura Dawuda disrɛ: ‹Kəlɔ kɔn kəyɔ fos, ali fum ta pəyi ki!› K’ɛnacicəs sɔ: ‹Wəlɔma pəlɛk dəkəcəmɛ dɔn!›

²¹Mɛnɛ pamɔmənɛ afum aŋɛ ŋaŋc-cəmbər su tɛm ntɛ Yesu ɛŋc-pɛ pəc-tor kɔ səna mɔ, mɛnɛ wəkin pəyi su dacɔ nwɛ endeyɔnɛ wətəŋnɛ mes mmɛ mɛnacepər fɔr yɔn kiriŋ kəyɛfɛ ka Yesu afi dacɔ, mɛnɛ wəkayi sɔ pəyɔnɛ wənatəŋnɛ mes fəp kəlɛk kəgbət ka Saŋ teta Kanu, haŋ dɔsɔk ndɛ Yesu ɛnayɛfɛ su dacɔ mɔ.»

²³Awa kɔ ŋamentər afum mɛrəŋ: Matiyas, kɔ Isifu nwɛ aŋc-we Barsabas, pac-deŋər kɔ sɔ tewe ta Yusutu.