Wotet 2:24-43

²⁴“Tage Yowbad bo iyamov Yeisuw, kanig mouvitan bo ilisow. Nag kadilok kanig bitawtoun Yeisuw waseg, nag.

²⁵“Liva̱nen mtowen kweiboug Deibid bo ilivan Yeisuw anilivan mamagina, ‘Tut babaw nakikineim yak gunguyaw yak wamatag. Guntawtoun bisigeg, peinan ya̱koum wagunka̱tay nukuses. Mapun, wadoug waseg allivan, peinan gunmwa̱saw avakaein. Igaw woug waseg nases ven watinow, bo banmiseim gunguyaw ya̱koum bukwatinabweig. Peinan kwayuseig, awoum kululuwag bisesuna wa̱Tum. Awoum woug beipwas; awoum. Bo nukwatimlakeig ked towen kabmwamov kidenen. Wamatam bo bukuvag gunmwa̱saw bivakaein.’

²⁹“Sigwey yakamiy, adok balivan liva̱nen datoveks towen Deibid; livan kamnat balivan. Towen Deibid bo ikanig, itakus wakalawagan waseg; e, alawag towen, igaw tut towen wadavanuys nises.

³⁰“O peinan Deibid palopit, bo ikakin sinapun Yowbad; o Yowbad bo itabudabod, idibek Deibid, ilana, ‘Mounid wabuya̱vim igaw mo bisap tabum ya̱koum, towen bo biguyaw, bikow kid mukwaleiwag.’

³¹“O kweiboug, peinan Deibid ikakin mtowen Kelis kanig bo bilisow, bitamanaw vayuwein, liva̱nen bo ilivan mamagina: ‘Awoum bisesuna wa̱Tum. Awoum won beipwas; awoum.’

³²“Yowbad gog nivag mtowen Yeisuw mo itamanaw vayuwein; o yakamey bo nakakin.

³³“O tut towen, mtowen Yeisuw, Taman nisek nakaleiwag avakaein, o nises Taman wanaka̱tay. O peinan Taman anilivan, bo bisek Kululuwan Towen Bwanabwein, nagein gog bo isek, katipel mo nisekem yakamey; nawotet towen kukines o kuliganes.

³⁴“Deibid ta-imwen in walba̱lab; Yeisuw gog imwen in walba̱lab. Liva̱nen Yeisuw nilivan ma̱wana, ‘Yowbad bo idibek gunguyaw, ilana: Kusin wagunka̱tay. Tage tasiyas nikamliweims igaw mo bavag beibus, bimlavags mamagina mukwabtatet.’

³⁶“Kuliganes beibwein, o kadiloka min-Yisleil babaw yakamiy bukukwakins kamnat waseg, Yowbad bo ikatigik guyaw teitan takatinabweids ya̱kids, towen yagan Kelis, mtowen Yeisuw nukuweiys waklos.”

³⁷Gamag tasiyas iliganes, bo igeg ninous, ibwayouys avakaein, ikatugwans waseg Pita siney Yeisuw nagamags, ilansa, “Tawaw, bo igak! Ama̱wan bakavkek?”

³⁸Pita ikatimop asilivan, idibakes, ilana, “Kulavewas amisinap kalbaleb, mo bakabapta̱yseimiy tatanok tatanok yakamiy, Yeisuw Kelis yagan waseg; mo biwid mikalbaleb, binumlev, nasiwa̱youb mo bisekeimiy, Kululuwan Towen Bwanabwein.

³⁹“Peinan Yowbad bo ilivnek mounid bisiwyoubuds ya̱kids sidayas nitidayas, o bisiwyoubus vena babaw gimgilis, kalisiy daGuyaws Yowbad bidawes. E, Kululuwan bo isekeids sidayas tasiyas.”

⁴⁰Anilivan ma̱wan mo igeiguy avakaein, idibakes, “Kadiloka kulavewas simiyas, peinan takakons tasiyas.”

⁴¹Gamag mwasanin iliganes anilivan; yam towen mo ibaptayses, mo iyakelesiys tasiyas, babiweis mamagina kweitoun tawsan gamag.

⁴²Tasiyas bo itoukums. Yeisuw nagamags asilivan iliganes, o sisiyas tasiyas nisesus, ininitougs Yowbad waseg; o bled ikikivis, ma̱wan asisinap.

⁴³Gamag babaw bo igoulus Yowbad; peinan ikines Yeisuw nagamag siwotet singaya tawtoun.