Acts 2:24-43

²⁴Akngeyel renh angkep arrpemarl itethilek, rlterrk ikwerenh-akertel. Arrewaly-rnem awenng-itwek aynteyel. Rernem ywarn-antey ament akemirreyenh. Jesus ra awenngel ayntenh arrpemarl. Akngeyel renh akemelhilek, rlterrk ikwerenh-akertel.

²⁵Atyetyart David-el ingkwernek pip-warl arrwekel-antey Jesus-arl aremirreyenh. Ra alakenh-anyem ingkwernek: ‘Ingkart ra atyeng-itwek arrer aneyel. Artwa ingwer-rnem ywarn atyeng arrkernelheyenh, ayenh ilpertiletyek.

²⁶Ayeng irrkngerney-anem aneyel, Akngeyekant-anem ayeng inkwerelhemel. Ayeng alhewer-anem anayntem, rarl ayenh arntarnt-areyel.

²⁷Ingkartel ayenh iwerl-alhey-angenh awenng-itwek. Ra ayenh arntarnt-areyenh, awenng-itwek, ayenh iwerl-alhey-angenh, ngarl atyeng ilkelheyel.

²⁸Ra ayenh akalty-anthek, arraty-angkwarr anetyek, ayeng aknganekarl iteth aneyenh. Ra ayenh irrkngerney anthek, atyeng-itwek intem-antey aneyenh.’”

²⁹Peter angkek arrpemarl, “Atyenh-rnem, angka David-kenh ayeng arraty angkeyel. Ra ilwek, rernem David renh awenng-warl akwernek. Aleyan awenng ikwerenh aynteyel-antey.

³⁰David ra Ingkart-kenh angkakert anenh. Ra iterl-arek, Akngeyelarl renh alhelek, artwa anyent ikwer-rnem arrernetyek, ra atyetyart ilkwa anetyek.

³¹David ra iterl-arek, Ingkartel angkep anyent impen akemelhileyenh. Ra ilek, Akngeyel renh awenng-itwel iwerl-alhey-angenh.

³²Akngeyel Jesus renh innga akemelhilek, arrewaly-penh itethilemel. Anwernantherr akalty, anwernantherr renh anngetherr aytaremel arek.

³³Jesus ranem alker-warl alpek, Akngey-itwek aney-alpek. Akngeyel Itnweng renh alhelek, renh anthetyek, Jesus ra Itnweng rlterrk anwenhantherr antheyel. Aleyan arrantherr areyel-anem, aweyel-anem, Itnweng renhey-antey.

³⁴David ra alker-warl alhey-angenh. Ra angka nhenh ingkwernek, ament ikwerenh-angkwarr-weny: ‘Ingkart angkek Ingkart atyenh-warl, “Atyeng-itwel ana!

³⁵Artwa apmwernem atha antengiletyek, rlterrk ilkwakertel, renh-rnem ywerrelhilemel, rernem ngkweng awelhetyek.” ’

³⁶Israel-kenh-rnem ingkerrenh, arrantherr nhenhek ingkerrenhel iterl-aretyek, Jesus irrkaty weth nhenhan arrantherr arwerl iylpeyl-atherrel atanthekarl. Akngeyel Christ arrernek, ra Ingkart arrekantherr ingkerrenhek anetyek.”

³⁷Angka rernem awek-penh, rernem ywarn iterremel-anem anenh. Peter-anem rernem ayernek, kwertengerl ingwer-rnem-then, “Nthakenh-angkwarr arrantherr irreman?”

³⁸Peter angkek, “Akngey-warl angkep irrenherr-arey, baptise inemel, itna Jesus-angkwarr, Akngeyelarl apmwa arrekantherrety iwem. Ikwer-penhan Itnweng Rlwart ra antelheyenh arrekantherr-warl, arrekantherr-itwek intem anetyek.

³⁹Alakenh-anyem Akngeyel arrekantherr arrernek, ampernemek-then ingkerrenhek, Itnweng ikwerenh thwenetyek. Apmer ingwer-areny-rnem-then Akngeyel ikwer-rnem arrernek arrpemarl, Itnweng ikwerenh thwenetyek.”

⁴⁰Peter-el renh-rnem akalty-anthek arrpemarl aleth-antey, “Arrantherr artwa apmwernem-they angkep irretyek.”

⁴¹Rernem-anem Peter-ek awelhek. Rernem-anem Peter-warl apetyek, renh-rnem baptise-emeletyek. Arlta ikwerel-antey, Akngeyel artwa 3,000 innga anyentelhilek kwertengerl ikwerenh-rnem-warl.

⁴²Angkakert-rnem rernem-anem ingwer-rnem akaltyilek. Rerneman aleth-antey anyentirrenh, amern arlkwetyek, Akngey-warl-anem rernem angketyek.

⁴³Akngey Ingkartel kwertengerl-rnem akaltyilek, rernem ilek-ilek mpwaretyek. Angkakert rernem ilek-ilek mpwarek. Akngey Ingkart aremirrek, ikwer-rnem-warl, rlterrk ilkwakert. Ingwerel-rnem rlterrk-akert arek-penh, rernem ater-anem irrek.