Hechos 2:24-43

²⁴Per Dios mseban xaa, namlaat Dios xaa lo re xaa ngut, nel nyent mod le yalgut gan lo xaa.

²⁵Nel rey David leezha ngunii xaa kwent cheen Jesús, nzhé xaa: Tubka nzo Xaa Nabeyy kwaan na, lee xaa nzo lad li lo na, zee tubka nye nzo na.

²⁶Kwaanzee nyak doo lextoo na, nu nzholl na kwaan roo na. Kwaanzee nela na nyent cho kwaan gak na gorna yet na,

²⁷nel nalaat lu na leen Hades, pa nzho re xaa ngut, nu nixa nalaat lu lux kwerp cheen na, kwerp cheen xmos lu, Xaa Nali nak.

²⁸Mlu lu naz cheen yalnaban lo na, nu nyakdoola na nzo lu lo na. Sal. 16:8-11

²⁹’Wech na, kwaane klar doo nak, lee xey be David ngut, nu ngubyo xaa, nu lee baa cheen xaa nzoka axta nal.

³⁰Per David ngok tub xaa mzaa kwent kwaan nzhé Dios lo lee xaa yilo, nu ne wen xaa lee Dios nzhé lo xaa, telisa tub dii cheen xaa nabeyy mod mnabeyy lee xaa.

³¹Snee ngunii David, mod tub xaa mzeen kwaan ded, ngunii xaa cheen yalmroban cheen Xaa Xaal Dios Nabeyy, nu ngunii xaa lee xaa nalaket leen Hades, pa nzho re xaa ngut, nu nixa naluxt kwerp cheen xaa.

³²Kwaanzee nal Dios mle mroban Jesús, nu rese nu nzaa kwent cheen kwaane.

³³Ngulo mroban xaa zee nya xaa mzob xaa lad li lo Dios, nu mkayaa xaa Mbi Naban kwaan nzhé Xuz xaa zaa xaa lo xaa, nu nal mxaala xaa Mbi Naban lo yizhyo ne. Nu Mbi Naban mle kwaan mlu lo gu nu mbin gu.

³⁴Nu nanakt David, xaa nguxoob yiba. Nel leeka David nzhé: Dios, Xaa Nabeyy rese kwaan, nzhé lo Xaa Nabeyy lo na: “Zob lad li lo na,

³⁵axtaka chezhin na rese xaa nayii ne lu, zee kichxub xaa lo lu, nu zee gak xaa mod tub kwaan zhib lu nii lu tich”. Sal. 110:1

³⁶’Sawlazh be, nzhaal ne kwaane: Lee Jesús, xaa mkee re gu lo krus, Dios mle xaa Xaa Nabeyy, nu lee xaa nak Xaa Mxaal Dios Nabeyy.

³⁷Nu gorna mbin re xaa kwaane, nales ngok lextoo xaa nu mnabdizh xaa lo Pér nu lo re xaa mkayaa yalnabeyy lo Jesús, nu nzhé xaa: —Wech, ¿cho kwaan nzhaal le nu?

³⁸Zee nzhé Pér lo re xaa: —Laa gu nalet gu kwaan nawent, nu wii gu lo Jesucrist, nu brubnis kad tub gu kwaan yalnabeyy cheen Jesucrist, zee chee xaa re jwalt kwaan nawent kwaan mle gu, nu zaa Dios Mbi Naban lo gu.

³⁹Nel kwaan nguné Dios zaa Dios, nzho mod kayaa re gu nu re xinn gu, nu noka nzho mod kayaa rese xaa nzho zit. Leeya nak cheen rese xaa nzhekla Dios kwezh, xaa nak Xaa Nabeyy be.

⁴⁰Kwaan re wdizh ne nu stub naza, Pér ngunii lo xaa, nu mzaa xaa kwent lo xaa nu nzhé xaa: —Nzhaal roo gu lo re myet kwaan nle re kwaan nawent.

⁴¹Nu snee kan tub chon mil xaa mbin xtizh Pér, nu mrubnis xaa, nu ngok xaa xaa Jesús.

⁴²Nu rese xaa Jesús tubka ngok lextoo nu nle re xaa re kwaan nlu re xaa mkayaa yalnabeyy lo Jesús lo xaa, nu nzhaw xaa Xchee cheen Xaa Nabeyy, nu nzhedizhno xaa Dios.

⁴³Nu rese myet mdedyall sinka zyen doo kwaan gro nle re xaa mkayaa yalnabeyy lo Jesús.