Woo Bɛ Ŋɑ 2:3-29

³Si ɑnyiɛ ŋɔi ɑ̀ yɛ nɡɔɡɔ bɛi ɑmɛi inɑ í nɑ í lesi irii ɑŋɑ fei ɑkɑ̃ ɑkɑ̃.

⁴Ŋɔi ɑŋɑ iyi ɑ̀ wɑ bɛ fei ɑ̀ kɔ̃ò Hundei Ilɑɑɔ̃ nɔ ɑ̀ wɑɑ fɔ fee mmu ɡɔ ŋɑ, si bɛi Hundei Ilɑɑɔ̃ í mu nŋɑ ɑŋɑ fei ikɑ̃ ikɑ̃.

⁵Wee wɑɑti bɛɛbɛ Zuifu ɡɔ ŋɑ iyi ɑ̀ mɑ̀ bɛɛrɛi Ilɑɑɔ̃ ɑ̀ nɑɑ hɑi ilɛ fei ɑ̀ wɑ Zeruzɑlɛmu.

⁶Iyi ɑ̀ ɡbɔ ibɑu, ŋɔi zɑmɑɑ nkpɔ nkpɔ í sɛi í koo í tɔtɔɔ bɛ nɔ ɑ̀ biti jiidɑ jiidɑ si nɑ iyi í jɔ̀ ɑ̀ ɡbɔ woo dɑsi Jesu nɑɑnɛ ŋɑu ɑ̀ wɑɑ fɔ feei ɑŋɑ ikɑ̃ ikɑ̃.

⁷Ŋɔi í mu ŋɑ biti hee í cɑɑ, nɔ ɑ̀ bee njɛ ɑ̀ wɑɑ ni, inɛ ŋɑ iyi ɑ̀ wɑɑ fɔ ideu bɛ, n jɔ ɑŋɑ fei inɛi Gɑlilee ŋɑi mɛɛ.

⁸Nɔ bɛirei í ce ɑwɑ fei ɑ̀ ɡbɔ ɑ̀ wɑɑ fɔ ide do fee nwɑ ikɑ̃ ikɑ̃.

⁹Si inɔ nwɑ inɛ ɡɔ ŋɑ ɑ̀ nɑɑi hɑi ilɛi Pɑɑti do hɑi Mɛdi do Elɑmi, do hɑi ilɛi Mezopotɑmi do Zudee do Kɑpɑdosi do Pontu do hɑi ilɛi Azii.

¹⁰Inɛ ɡɔ ŋɑ mɔ hɑi ilɛi Firizii ɑ̀ nɑɑ do Pɑnfili do Ezibiti do hɑi ikpɑ Libi iyi í wɑ kɔkɔi Sirɛni. Inɛ ɡɔ ŋɑ mɔ ɑ̀ nɑɑ hɑi Romu.

¹¹Inɛ ɡɔ ŋɑ Zuifu ŋɑi ɑ̀ bí ŋɑ, inɛ ɡɔ ŋɑ mɔ ɑ̀ wɑɑ too kucei Zuifu ŋɑ. Inɛ ɡɔ ŋɑ ɑ̀ nɑɑ hɑi ilɛi Kɛrɛti do hɑi Arɑbi. Do nŋu fei, ɑwɑ fei ɑ̀ ɡbɔ ɑ̀ wɑɑ fɔ fee nwɑ ŋɑ ikɑ̃ ikɑ̃ ɑ̀ wɑɑ sisiò mii nlɑ ŋɑ iyi Ilɑɑɔ̃ í ce.

¹²Ŋɔi ɑŋɑ fei ɑ̀ biti hee ɑ kù mɑ̀ bɛi ɑɑ lɑsɑbu nɔ ɑ̀ bee njɛ ɑ̀ wɑɑ ni, yoomɑi í jɛ yɑɑsei mii nɔu ihɛ̃.

¹³Ammɑ inɛ ɡɔ ŋɑ ɑ̀ yɑɑko ŋɑ ɑ̀ wɑɑ ni, inɛ ŋɑu ɑ̀ mɔ ɑtɛ̃i hee í cɑɑ.

¹⁴Ŋɔi Piɛɛ í dede do woo bɛ mɑɑtɑkɑ̃ ŋɑu ɑjɔ́ nɔ wɑ lɑ hee lele í sɔ̃ zɑmɑɑu wɑ ni, iŋɛ Zuifu ŋɑ do iŋɛ mɔ iyi ì wɑ Zeruzɑlɛmu fei, i sotĩ i ɡbɔ ŋɑ.

¹⁵Ǹ bi i mɑ̀ ŋɑ iyi inɛ ŋɑu ihɛ̃ ɑ kù mɔ ɑtɛ̃ si bɛi ì wɑɑ tɑmɑɑ ŋɑu bɛ, domi ɑ̀ wɛɛ si dɑɑdɑɑkɔ, bɑɑ isɔ mɛɛsɑ̃ kù lɔ titɑ̃.

¹⁶Ammɑ iyi ì wɑɑ yɛ dɑɑkɔɔyiu ihɛ̃ ŋɑ, iyi wɑlii Zoɛli í fɔu mbɛ iyi í ni,

¹⁷Ilɑɑɔ̃ í ni, si ɑjɔi ɑnkɑ̃ɑnyi ŋɑu ɑn dɑɑ inɛ fei si Hundem. Amɑ inɛmɔkɔ do ɑmɑ inɑɑbo nŋɛ ŋɑ ɑɑ ce wɑlii. Awɑɑsũ nŋɛ ŋɑ ɑɑ yɑ mɑɑ ce kuyɛ ŋɑ, Nɔ mɔkɔ nɡbo nŋɛ ŋɑ mɔ Ilɑɑɔ̃ ɑ́ bɑ ŋɑ ide ku fɔ si ɑlɑ.

¹⁸Wɑɑti bɛɛbɛ, ɑn dɑsi Hundem si inɛmɔkɔ do inɑɑbo woo ce icɛm ŋɑ, Nɔ ɑɑ ce wɑlii.

¹⁹An nyisi mii mɑɑmɑɑke ŋɑ ikpɑ lelei Aɔ̃, Nɔ ɑn jɔ̀ inɛ ŋɑ ɑ yɛ mii mɑɑmɑɑke ŋɑ mɑ́ si ilɛ. Inɛ ŋɑ ɑɑ yɛ njɛ̀ do inɑ do cuɑi inɑ.

²⁰Inunu ɑ́ kuku inyɑ Nɔ cukpɑ ku kpɑ̃ bɛi njɛ̀. Si ɑnyii nŋui ɑjɔi Lɑfɛ̃ɛ ɑ́ to wɑ, ɑjɔ nlɑ ilu ɑmboeu.

²¹Ammɑ inɛ ŋɑ iyi ɑ̀ wɑɑ kpe Aɔ̃ Lɑfɛ̃ɛ fei ɑɑ bɑ fɑɑbɑ.

²²Iŋɛ inɛi Izirɛli ŋɑ, i sotĩ i ɡbɔ ideu ŋɑ. Ilɑɑɔ̃ í jɔ̀ ì mɑ̀ yiikoi Jesu inɛi Nɑzɑrɛtiu ŋɑ nɑ mɑɑmɑɑke do nyindɑ ŋɑ iyi í jɔ̀ Jesu í ce si ɑnini nŋɛ, si bɛi iŋɛ tɑkɑ nŋɛ ì mɑ̀ ŋɑ.

²³Jesuu, Ilɑɑɔ̃ tɑkɑɛi í lɑsɑbu hɑi sinte í jilɔɔ si ɑ dɑɑ inɛ ŋɑ si ɑwɔ. Nɔ iŋɛi ì dɑɑ ilu dulum ŋɑ si ɑwɔ ì jɔ̀ ɑ̀ kpɑkpɑɛ si jĩi ku ɡɑɑu ɑ̀ kpɑɑ ŋɑ.

²⁴Ammɑ Ilɑɑɔ̃ í jũu hɑi si bɑlɛ, í nyɑɑ hɑi si wɑhɑlɑi iku domi iku kù nɛ ɡbuɡbɑ̃ kɑ̃mɑ siɛ hee ku ɡɛɛɛ bɛ.

²⁵Ideɛi Dɑvidi í kɔ í ni, Ǹ wɑ n yɛ Aɔ̃ Lɑfɛ̃ɛ ɑjɔ fei, Domi í wɑ ɑwɔ njɛm ku bɑ n mɑɑ̀ n yɑyɑ.

²⁶Nɑ ŋɔi í jɔ̀ idɔm wɑ dɔ̃, nɔ ǹ wɑ n fɔ ide do inɔ didɔ̃. Nɔ bɑɑ bii í jɛ ɑn ku ǹ nɛ kpɑ̃ɑ ku cɔ,

²⁷Domi ɑwɔ Ilɑɑɔ̃ i kɑɑ jɔ̀ hundem bi ku wɑi iku ŋɑ. Bɛɛbɛ mɔi i kɑɑ jɔ̀ ɑrɑi Inɛ Kumɑ́ɛ ku sɑ̃mi.

²⁸Ì nyisim kpɑ̃ɑ iyi wɑ bɔɔm si kuwɛɛ. An wɛɛ do ɑwɔ si inɔ didɔ̃.

²⁹Si ɑnyii nŋu nɔ Piɛɛ í ni mɑ́, iŋɛ kpɑɑsim ŋɑ, ǹ wɑ n sɔ̃ ŋɛ nɔ kù nɛ sikɑ kɑ̃mɑ, Dɑvidi bɑlɑ nwɑ í ku nɔ ɑ̀ suu. Bɑlɛɛ mɔi í wɑ si ɑnini nwɑ ihɛ̃ hee do nnyi fei, mɑ̀ irei.