HECHOS 2:3-29

³Bi nɛqui tengu yʉ t'ʉsibi nɛ 'da'i ts'ʉ bi zox yʉ́ yą yʉ ją'i n'da ngu n'da ʉ mi 'bʉpʉ.

⁴Ngue n'da ngu n'da mi 'bʉpʉ, gätho bin t'un rá Hogandąhi Oją, nɛ bi hąt ra ts'ɛdi xʉn ho ʉ. Nɛ bi mbʉdi 'dahma 'dan'yo bʉ án yą'ʉ n'da ngu n'da'ʉ nangue rá ts'ɛdi rá Hogandąhi Oją in 'yohʉ.

⁵Nɛ nu'ʉ yʉ pa'ʉ bi zøm bʉ Jerusalén ʉ yʉ judío, da 'yøt'a ra dąmpɛti mí xi Oją maya'bʉ, ngue bá nɛxpʉ gätho yʉ häi ua ja ra ximhäi.

⁶Nɛ nu'bʉ mi 'yø'a di hį ʉ yʉ ją'i, bim pɛti bʉ, nɛ n'da ngu n'da ʉ bi zo'ʉ yʉ 'yɛ̨c'yɛi nangue yʉ́ ndesɛ, nɛ him bi zä bi bɛ̨ni ha bin ja.

⁷Nɛ bi hyonya thoho nɛ him bi bądi 'bɛ'a nam bøni, nɛ bin 'yɛ̨mb zɛhɛ ʉ: ―Hague án zä bin ja bʉ, bin 'yɛmp'ʉ. Ha hinga gue'ʉ yʉ mɛngu bʉ Galilea gätho i yą ua ya.

⁸Hanja sä i sijʉ ma ndesɛhʉ n'da ngu n'dajʉ.

⁹Nɛ nujʉ n'da'a n'danni bá nɛxhʉ, nɛ 'dajʉ, 'bʉ'i 'da bá nɛxpʉ Partia, nɛpʉ Media, nɛpʉ Elam, nɛpʉ Mesopotamia, nɛpʉ Judea, nɛpʉ Capadocia, nɛpʉ Ponto, nɛpʉ ra häi Asia.

¹⁰Nɛpʉ Frigia, nɛpʉ Panfilia, nɛpʉ ra häi Egipto, nɛpʉ ra häi Africa jom bʉ Cirene. Nɛ nu'ʉ mi'da yʉ romanos ʉ, madague'bʉ gätho yʉ judío ʉ, nɛ nu mi'da ʉ gue ɛ̨c'yɛi tengugahʉ dyʉ judíohʉ, nɛ 'bʉh mi'da bá nɛxpʉ Creta, nɛpʉ Arabia.

¹¹Nɛ dí øhmbʉ i mam ma ndehʉ nangue yʉ́n t'øt'e gue i øt' rá ts'ɛdi Oją, bin 'yɛ̨mp'ʉ.

¹²Nɛ gätho madi hyonya thoho, nɛ hingui pądi 'bɛ'a da bɛ̨ni. Nɛ n'da ngu n'da bi mansɛ ʉ: ―'Bɛ'a ní mba na in ja ya.

¹³Pɛ nu'ʉ mi'da bi ma: ―Įti ʉ.

¹⁴Nɛ nu ra Pedro bʉya 'darpʉ mí 'bähmbʉ ʉ mi 'dɛ'ma'da yʉ́ 'bäihʉ ra Cristo, nɛ nts'ɛdi bin yą, bi 'yɛ̨na: ―N'yohʉ ahʉ dyʉ judíohʉ nɛ gätho ahʉ guí 'bʉhmbʉ ua Jerusalén, dami 'yøhmbʉ xʉn ho 'bɛ'a ga xi ahʉ ya.

¹⁵Nuje hin dí įtihe tengu guím bɛ̨mhbʉ, nguetho ja gʉto ya.

¹⁶Pɛ nuna guehna gue bin ja ya, gue'a bi man ra Joel rá pøngahyą Oją, bi 'yɛ̨na:

¹⁷Din ja bʉ n'da ra pa ba ɛ̨hɛ, ɛ̨n Oją, gue ga pɛn'nahʉ ma Hogandąhi gätho nangu yʉ ją'i 'bʉcua ja ra ximhäi. Nɛ nu'ʉ ni ts'ʉnt'ʉhʉ nɛ ni t'įxuhʉ dim pøngahyą. Nɛ ni ts'ʉnt'ʉhʉ da nu'ʉ yʉn t'uti tengu yʉ t'į nɛ ni dąc'yɛihʉ da 'uį yʉ t'į.

¹⁸Nu'bʉ bin ja, nu'ʉ ma 'yɛ̨hɛ, yʉn 'yohʉ nɛ yʉ xisu, ga pɛnpä ma Hogandąhi ʉ, nɛ dim pøngahyą nanguecä.

¹⁹Nɛ ga uh yʉ hmɛpya bʉ magąts'i, nɛpʉ ja ra häi, yʉ hmɛpya ra ji, nɛ ra sibi nɛ ra 'bifi.

²⁰Nɛ nu'a ra hyadi ya hin din ja rán nɛqui, nɛ ra ząna xtan thɛni tengu ra ji. M'bɛt'o nja bʉ din ja, m'bɛjua da zøn ra pa dua ɛ̨h ra Hmu mahɛ̨ts'i, nɛ nu'a ra pa a, nuįxte thoho nɛ nts'utho 'bɛ'a din ja.

²¹Nɛ nu'a ra pa dua ɛ̨hɛ, din ja gue hønt'a to'o xí mba't'a ra Hmu da yąn Oją a. Ngubʉ bi 'yo't'a ra Joel 'bʉ maya'bʉ, bi 'yɛ̨n'a ra Pedro.

²²Nu ra Pedro xø bi 'yɛ̨mp'ʉ mahøn'a: ―N'yohʉ ahʉ dyʉ israelhʉ, dami 'yøhmbʉ ma nde. Dím mangä nangue ra Jesús ra mɛngu Nazaret. Oją bi japi ngue bi 'yøt' yʉn t'øt'e nuįxte nangue rá ts'ɛdi Oją, nɛ yʉ hyonya nt'øt'e, nɛ yʉ hmɛpya, guepʉ da zä gui pąhmbʉ ngue Oją bi zɛ'a.

²³Nɛ maya'bʉ Oją mi pądi 'bɛ'a gá 'yørpahʉ rá Ts'ʉnt'ʉ. Nɛ Oją mi sänni gue gá cuathʉ bʉ ja n'da ra pont'i nangue yʉ́ 'yɛ yʉ tonto, nɛ gá hyohʉ.

²⁴Pɛ nu'a Oją bi xox 'bʉ mí du, nɛ bi hyącua ran dąte, nguetho hin'yʉ rá ts'ɛdi ran dąte xtán zä xtán ząm'ma ra Jesús.

²⁵Nguetho bi man ra David gue 'bɛ'a da nu ra Jesús, 'bʉ mí 'yɛ̨na: Nugä thocua thoho dí nugä Oją bʉ ja ma hmi. Nɛ di 'dac ra ts'ɛdi, janangue'a njon da zä di 'uegagui.

²⁶Janangue'a i hu ma mbʉi, nɛ dadín johya 'bʉ dím mangä nangue'a. Nɛ nu'bʉ din sʉnya ma ją'i bʉ ja ran 'yägui, dí tøp'ma ran ho da t'ørcagui.

²⁷Nguetho hin gui hyɛgä ma te da gopʉ guepʉ o'ʉ xʉn du, Nɛ hin gui japi da 'ya ma ngøc'yɛi, guecä, ni Hoga t'ʉhnigui.

²⁸Nɛ gá 'yurqui 'bɛpʉ dám 'bʉhmi maząi mahøn'a, nɛ nu'i gui jaqui ngue din ja ran johya ma mbʉi nu'bʉ dá nut'a ni hmi, bi 'yɛ̨n ra Pedro tengu bi man ra David.

²⁹Nɛ xø bi 'yɛ̨n'a ra Pedro: ―N'yohʉ ahʉ, da zä ga xi ahʉ majuąni nangue ma ngʉrpa mbombøtahʉ ra David mi 'bʉi maya'bʉ, him bi mansɛ nanguesɛ 'bɛ'a da t'ørpe, nguetho bi du, nɛ guexta'a i o bʉ rán 'yägui i ja ua dí 'bʉhmbʉ.