Matendo 2:3-29

³Ngagapitya malimi kati ga mwoto, ngagabaganika no tu'la panani ya kila mundu.

⁴Boti ngabatwi'li'yi'lwa Loo Mpeleteu, no tumbwa longela kwa luga mbali'mbali', kati Loo mwaayalile.

⁵Bai, ku Yelusalemu kwaabile na Ayahudi babankilikityage Nnu'ngu' babaaumi kila nni'ma wa padunia.

⁶Pabayu'wine malobe go, lipi'nga liku'lu' lya bandu lyaatikongolekana. Boti baating'ondoka muno kwa mwanjaa kila mundu aayu'wine abo aumini, kabalongela kwa luga yake mwene.

⁷Baating'ondoka no sangala kababaya, “Aba boti babalongela, benekaya ba ku Galilaya li?

⁸Iteibuli kai', kila mundu aayu'wa kabalongela kwa luga yake yo belekwa nayo?

⁹Pakati yitu kwina bandu bababu'ka mili'ma ya Palti, Wamedi na Waelamu, bi'ngi' benekaya ba Mesopotamia, Yudea, Kapadokia, Ponto na Asia,

¹⁰Piligia, Pamfilia, Misili na lwingo lwa ku Libya papipi na nni'ma nku'lu' wa Kulene na ageni bu'ka Roma,

¹¹kati yabe kubile na Ayahudi na bandu babaasawi kwikotea dini ya Kiyahudi, bandu ba nni'ma wa Kilete na ku Alabia. Ata nyo twayu'wa boti kabalongela makowe maku'lu' ga iyendo ya Nnu'ngu' muluga yitu yo belekwa.”

¹²Boti baatisangala no ng'ondoka, kabalaluyana, “Makowe ga galombolya ki'li'?”

¹³Lakini bi'ngi' baatikwasalanga, kababaya, “Bandu ba batilobya!”

¹⁴Bai, Petili ngayi'ma papipi na balu' atumilwe bi'ngi' ku'mi na yumo, ngatumbwa kwaalya bandu kwa lilobe liku'lu', “Mwaayahudi ayangu' na mwenga mwaboti mwamutama ku Yelusalemu, mutange likowe li'no na munipi'kanie.

¹⁵Kakape bandu ba banalobyali kati mwamugania, kwa mwanjaa yi'no saa itatu ya kindai' bai.

¹⁶Kakape panga likowe li' nga li'lu' lyalyaabayilwe na nnondoli ywa Nnu'ngu' Yoeli.

¹⁷‘Mumasu'ba galu' ga kuundi'la abaya Nnu'ngu', naalu'a kunnyitanikia Loo ywangu' panani ya bandu boti. Bana binu analu'me na alwawa baalu'a londwa, ansembe binu baalu'a gabona makowe gayambi', na agoi baalu'a lota maloto.

¹⁸Kakape, ata kwa atumisi bangu' analu'me na alwawa, naalu'a kwayityanikia Loo ywangu' na bembe baalu'a londwa.

¹⁹Nanenga naalu'a laya mangelongelo kumaunde na myanju miku'lu' padunia, kwalu'a ba na myai, mwoto, na lyoi litopau.

²⁰Lisu'ba lyaalu'a ba mulubi'ndu' na mwei walu'a ba nkele kati myai, kaliegelya isa lisu'ba liku'lu' lya ngama lya Bwana.

²¹Apo mundu ywoywoti ywaalu'a lu'ba yangatiyiwa na Bwana, aalu'a kosopolelwa.’”

²²“Mwenga mwa Isilaili, mupi'kani mayi'gi'yo ga ganigalongela! Nnu'ngu' aalayite mpu'la bai panga kakape antumike Yesu ywa Nasaleti. Aapangite nyo kwa ndi'la ya mangelongelo na myanju yaapangite pakati yinu, kati mwamumweni mwabene.

²³Nnu'ngu' aatangite no binia bu'ka kwai'mbu' panga Yesu aakamuyilwe mumaboko ginu, na mwenga kummulaga kwa kwalekya bandu alau bammambe munsalaba.

²⁴Lakini Nnu'ngu' ngannyu'ya bu'ka kuuwi'li, ngaankosopolya bu'ka mulwu'ngu' lwake. Kwa mwanjaa yaawesekanikeli ywembe kamulwa na makakala ga kuuwi'li.

²⁵Kwa mwanjaa Daudi aabaite nyinyo kwa ywembe ywo, ‘Naamweni Bwana nnu'ngi' yangu' masu'ba goti, kwa mwanjaa abi kuluboko lwangu' lwa mmalyo, li'nga nakane tenandena.

²⁶Kwa nyo, mwoyo wangu' watenapusika, kai' nilulutika ilulu yo napusika. Yi'ga yangu' yatama muu'bi'lyo,

²⁷kwa mwanjaa loo yangu' wailekali kumambi', wala wannekali ywabile Mpeleteu ywako abole.

²⁸Unilayite ndi'la ya bwu'mi, wanitwi'li'ya pulaa panabaa papipi nawe.’”

²⁹“Mwalongo bangu' ba ku Isilaili, mbala nimmakiange mpu'la gagampatike Daudi, tati' bitu. Ywembe aatiwaa no sikilwa, lisiko lyake libile papanopano mpaka li'no.