Waiwia 8:16-27

¹⁶Pwe a jaikenta moredi on amen irail. Re paptaijelar eta ni mar en Kaun Iejuj.

¹⁷Ira ari kotiki on po ’rail lim ar akan, irail ap aleer Nen jaraui.

¹⁸Jimon lao kilaner, me Nen jaraui kokido en wanporon oko ara pwil po ’rail lim ar akan, ap men ki on ira kijin moni.

¹⁹Indada: Koma pil kotiki don ia manaman wet, pwe ma i pan pwil pon amen pa i kat, i en ale Nen jaraui.

²⁰A Petruj majani on i: Noum moni en ian uk lokidokila! Pweki om kiki on, me mana en Kot kokido moni.

²¹Nan jota pwaij om de om tunol ni dodok wet, pwe monion om jota inen mon Kot.

²²Ari, kalukila om jued wet, o poeki ren Kaun o, ma a jota pan kotin makeki lamelam jued nan monion om.

²³Pwe i kilaner, me koe me dir en edi katik o teniten ni me japun.

²⁴Jimon ap japen indada: Koma kotin kapakapa kin ia ren Kaun o, pwe mepukat, me koma majani on ia, ender pwai don ia.

²⁵A ira lao katitiki o kotikida majan en Kaun o, ap purelan Ierujalem, o padak jili ronamau nan kijin kanim en Jamaria toto.

²⁶A tounlan en Kaun o majani on Pilipuj: Uda kola pali air pon al o, me kodi jan Ierujalem, ko on Kaja me tan!

²⁷I ari uda japalewei. A kilan, ol en Etiopia, jaumaj manaman en Kandaje, li nanmarki en Etiopia, me kokoaki a dipijou karoj, me kotido, pwen kaudok nan Ierujalem.