Waiwia 26:7-30

⁷Nan i inau o, me at kainok eijokriau kin kaporoporeki, me re pan pwaiki on ar nantion kaudok on Kot ni ran o ni pon. Main nanmarki Akripa iei kaporopor me i pan kila ren Juj oko.

⁸Da me komail jota kamelele, me Kot kotin kaiajada me melar akan?

⁹Maj o i kiki on, me i en wiada meakan, me kaokaoe mar en Iejuj en Najaret.

¹⁰I me i pil wiadar nan Ierujalem; o me jaraui kan toto me i jaliedier on nan imaten murin ai aleer manaman jan ren jamero lapalap akan o irail lao kamelar, nai pil jauaja.

¹¹I kame irail pan pak toto nan jinakoke kan karoj, o koidon on irail, re en lalaue, o nai linaranar kaualap pa ’rail; i kin kame irail lel on kanim en wai kan.

¹²A ni ai wiawia mepukat, o kokolan Damajkuj ni manaman en jamero lapalap,

¹³Main nanmarki, nin jauaj i ap kilanadar nani al o marain eu jan nanlan, me linan jan katipin, me jenjereda imp ai o me ian ia kai.

¹⁴Kit karoj lao pupedier nani pwel, i ap ronadar nil eu, katitiki on ia ni lokaia en Ipru: Jaul, Jaul da me koe kamekame kin ia? Nan a pan apwal on uk, en tametame tek o.

¹⁵Nai ari idok: Ij komui Main? Kaun o ap kotin majani: Nai Iejuj, me koe kin kame.

¹⁶Koe ari paurida, kajinenda, pwe i me I pwaraki don uk, pwen kajapwil uk ada, pwe koe en papa o jaunkadede men en meakan, me koe kilanada, o meakan, me I pan kapwara don uk.

¹⁷O I pan dondoro jan uk ni pa en aramaj akan o men liki kan me I pan kadar uk wei on,

¹⁸Pwen kapad pajan maj arail, pwe re en wuki jan rotorot, wuki on marain, o jan ni manaman en Jatan on Kot, pwe re en lapwa jan dip ar akan, o ren ale ar jojo ren me kamakelekele kidar pojon.

¹⁹Ari main nanmarki Akripa, i jota jopeiki on kajanjal en nanlan o.

²⁰Pwe maj i padaki on toun Damajkuj o Ierujalem, o jap en Iudäa kan, o men liki kan, en kalula o wuki on Kot, o kapwaiada wan kalula mau.

²¹Nan i me Juj akan jaik ia kidi nan im en kaudok o, o re jon kame ia la.

²²Ari jo, en Kot a kotin ieian ia, me i mimieki lao lel ran wet, padapadaki me tikitik o me laud akan, o jota me i inda, i eta, me jaukop akan o Mojej pil majanier, me pan wiaui:

²³Ieteten, Krijtuj en kamekam, o me a pan men maj en me pan iajada jan ren me melar akan, o padaki on toun wei o pil on men liki kan duen marain o.

²⁴A ni a kapun kila mepukat, pein i Pejtuj ap nil laudeda majani: Pauluj, koe iakalar! Om jukujukul toto me kapwepwe uk adar.

²⁵A Pauluj kotin majani: I jota iakalar main ijou Pejtuj, a i kin kida kajoi melel o pun.

²⁶Pwe nanmarki kotin mani duen mepukat; i me i pil aima padapadakieki on i, pwe i aja, jota meakot, me a jota kotin ereki, pwe kaidin waja rir, me mepukat wiauier.

²⁷Nanmarki Akripa, komui pojon jaukop akan? I aja, me komui kin pojon.

²⁸Akripa ap majani on Pauluj: Me tar kij, a komui pan kainon on ia en jaulanala.

²⁹Pauluj majani: I nonki on Kot, me komui o karoj, me roneron ia ran wet, en dueta nai, a iermen jal mata pot et.

³⁰Nanmarki, o kopina, o Pernije, o me ian irail kaipokedi waja o, ap kotida,